Apocalipsis 2
2
Da na'aqtac maye qaỹamaxa so 'amqaanataxanaxaicpi maye netaña ye nỹecpi ye Éfeso
1«'Auamaxa qome aca 'ere ñi namaxashec#2.1 Namaxashec: Qaimeten ye Apocalipsis 1.20. maye ilotague' na 'amqaanataxanaxaicpi maye netaña ye nỹecpi ye Éfeso. Qoneta':
‹Aỹem maye llasoqta'alo naua siete huaqaañi netaigui na ihuaq aỹoiguishec, qataq sootangui na laiñi naua siete ncoỹaraxanaxaqui' maye chegaqaigui na oro. Ñaq 'ana'axaỹaxana dam 'am sa'aqtaxanem:
2Aỹem saỹaten 'enauac nam 'auo'ottacpi, qataq saỹaten da souaxat da Aỹem 'aualaxaguet, nache qalota na 'avireguet lqalaic. Nataqa'en saỹaten da ỹataqta 'anala'aguet damaye cha'aye huo'o da 'arhualaxavic qataq saishet da 'auaconeguet nam qauemaicpi. Qataq saỹaten da 'am 'avi'igue'n naua 'eetregalo da lamaxa'she So Jesús qalaxaye saq 'en. Qataq 'am 'auachaxa'n naamaye da choche tenataxanaxaiqa. 3Qataq ỹataqta huo'o da 'anhualaxaunaxac. Qataq souaxat da Aỹem 'aualaxaguet, nache lta'araic da 'anque'eenaxac. Qalaxaye na'aictaxa da nache 'eetec de'era, qalaq ñaq 'eetalec da saishet da 'anasamiisop da Aỹem 'aualaxaguet.
4Qalaxaye ñaqaiyeta huo'o da sa saỹamaxaren da qoneta, cha'aye mashe saishet da ỹoqta 'eesa da Aỹem 'auauotec, saq 'ena'am dam hua'auchiguiñi 'arauotaxanaqtaic Aỹem can ñaq cheta'ague da 'aua'amqaanataxan. 5Qaq ỹoqo'oye 'auennate qome da 'auachegoqta'ague, ime, nache 'avi'eguelaxa da 'auauotec Ñim Lo'onatac 'Enauacna. 'Axaañi da 'auo'ottac da qauem, nache 'avi'eguelaxa da hua'auchiguiñi 'arataxac. Qaq da saishet da nache qonetec de'era, nache Aỹem 'am ñeqo'ona da sauo'o ca 'anhuaxanaguec, qataq ñeqochenaxat añi ncoỹaraxanaxaqui maye 'am hueto'ot.
6Qaq dam saỹamaxareeta 'arataxac, nachera da sa 'auoten nam quetague' na lapaxaguenataxanaxacpi na nicolaitapi qoneta'am Aỹem.#2.6 Nicolaitapi: Qaica ca saỹatenaq se'eso shiỹaxauapi. Qaq dam la'aqtaxanaxac ana Apocalipsis 'eeta'am da se'eso shiỹaxauapi 'eetega da huesochiguiñi da na'amqaanataxanaxac, ỹoqo'oye ỹasheeta da qanatamnot na choche ne'enaqtacpi maye saq 'en qataq na laỹepi nataxacpi.
7Qaq cam huo'oi naua ltela lauaco, qaq no'on da na'axaỹaxana da la'aqtac So Saqcha'a La'añaxac Ñim Lo'onatac 'Enauacna da 'enapega na 'amqaanataxanaxaicpi, 'eeta':
Nam saishet da iqallem 'enauac nam lqalaiguesat qataq saishet da ỹaxanec da lpi'iỹaxac Aỹem, nache sami' da chec ana ala ara qo'oipaq maye chegaqaigui da nca'alaxa. Aram qo'oipaq maye nañaxattalec ye qaica ca 'ena'am da lyac lanaxanaqa' Ñim Lo'onatac 'Enauacna.›»
Da na'aqtac maye qaỹamaxa so 'amqaanataxanaxaicpi ye Esmirna
8«'Auamaxa qome aca 'ere ñi namaxashec maye ilotague' nam ỹa'amaqten So Jesús maye netaña ye nỹecpi ye Esmirna. Qoneta':
‹Aỹem maye Aỹem la'auaxanec qataq sepa'atec.#2.8 Aỹem maye Aỹem la'auaxanec qataq sepa'atec: Qaimeten ye Apocalipsis 1.8. ¡Aỹem seleu co'ollaxa, qalaxaye qaltaq she'eguelaxalec da ñeca'alec! Ñaq 'ana'axaỹaxana dam 'am sa'aqtaxanem:
9Aỹem saỹaten 'enauac nam lqalaiguesat maye qouetaigui nagui, qataq saỹaten da 'am choxoraq, na'aictaxa da ỹataqta lta'araic da 'arsallaxa maye saqcha'a. Nataqa'en saỹaten naua ltaxaỹaxaco qauema maye 'am ỹasaqteguelec nam 'eetega da judiopi, qalaxaye namayepi ỹalectaigui nam lalamaxatpi so pa'aguenataxanaxaic.
10Saishet da 'añi'iỹa nam 'aỹa'aguet 'anque'eenaxacpi. Cha'aye so pa'aguenataxanaxaic, huo'o qome ca ỹamaxaigui añi ncoñetaxanaxaqui da qoñiita, da yaqto' ỹaỹaten da 'eesa da Aỹem qaua'amaqchiñiitac. Qami' ỹataqta qalota qome na qaviyeeguet lqalaic, qalaxaye saq qaỹauec. Qaq da huo'o da qarpi'iỹaxaqui Aỹem choche ivitta'a da qaullivi, nache Aỹem qami' sanema da nca'alaxa maye chochaq tatec da qaraviguiiqui.
11Qaq cam huo'oi naua ltela lauaco, qaq no'on da na'axaỹaxana da la'aqtac So Saqcha'a La'añaxac Ñim Lo'onatac 'Enauacna da 'enapega na 'amqaanataxanaxaicpi, 'eeta':
Nam saishet da iqallem nam lqalaiguesat, qataq nache queto'ot da lpi'iỹaxac Aỹem, nache Ñim Lo'onatac 'Enauacna saishet da ỹalat namayepi.›»
Da na'aqtac maye qaỹamaxa so 'amqaanataxanaxaicpi ye Pérgamo
12«Nataqa'en 'auamaxa qome aca 'ere ñi namaxashec maye ilotague' nam ỹa'amaqten So Jesús maye netaña ye nỹecpi ye Pérgamo. Qoneta':
‹Aỹem maye sauota'a na ỹainec maye ỹataqta shetteguet qataq dos naua ala'api. Ñaq 'ana'axaỹaxana da 'am sa'axatem:
13Aỹem saỹaten da qoueta'a nam nỹecpi maye netaña añi nso'onaxaqui so pa'aguenataxanaxaic.#2.13 Nỹecpi maye netaña añi nso'onaxaqui so pa'aguenataxanaxaic: Pérgamo, le'enaxat ye nỹecpi maye huetaña na qalota qanatameetacotpi maye choche ne'enaqtacpi qataq saq 'en. Qataq nacheye ye hua'auchiguiñi da no'oxoosheguem aso no'onaxanaxaqui da huaña da qaỹo'oxoren so nta'a maye lma' ye Roma. Ỹoqo'oye som ỹiyiñi ana'ana nere ỹa'axat da so pa'aguenataxanaxaic ilotague' yemaye. Qalaxaye na'aictaxa da nache 'eetec de'era qalaq nache 'ena'am qoqueto'ot da huo'o da qarpi'iỹaxac Aỹem. Qataq saishet da 'axaañi da Aỹem 'aua'amaqteetac, na'aictaxa co'ollaq da huaña ne'ena nỹecpi maye qoueta'a da qaỹalauat so Antipas, som nache 'eetai' naxa da ỹachaxaata da lpi'iỹaxac Aỹem.
14Qalaxaye Aỹem nache 'ena'am huo'o da sa saỹamaxaren da qoneta, cha'aye 'auaconeguet nam quetague' da qauem lataxac so Balaam. Cha'aye somaye ỹapaxaguenec co'ollaxa so Balac dam 'eetec naqa'en na Israel le'ecpi da yaqto' somayepi nache queto'ot da ỹo'ottac na qauem, qataq ỹayen da yaqto' somayepi chec nam mashe qoỹanot na ne'enaqtac nqui'ipi maye qanatameetacotpi qataq saq 'en, qataq da yaqto' sa ỹalaxaguet Ñim Lo'onatac 'Enauacna.
15Qataq nataqa'en 'auaconeguet nam quetague' da lapaxaguenataxanaxac som nicolaitapi. 16Qaq ỹoqo'oye, no'on da 'avi'eguelaxa da 'aualaxaguet Ñim Lo'onatac 'Enauacna, cha'aye da saishet da nache qonetec de'era, nache 'am ñeqo'ona da 'am seroleguete da la'añaxa'c naua ỹa'aqtaqa da sauo'o ca 'anhuaxanaguec qataq nam nicolaitapi qataq nam quetague' namayepi.
17Qaq cam huo'oi naua ltela lauaco, qaq no'on da na'axaỹaxana da la'aqtac So Saqcha'a La'añaxac Ñim Lo'onatac 'Enauacna da 'enapega na 'amqaanataxanaxaicpi, 'eeta':
Nam saishet da iqallem na lqalaiguesat maye ivireguet, qataq queta da ỹa'amaqteetac Aỹem, nache sami' da chec aca Maná maye saqcha'a, chegoqo'ot Ñim Lo'onatac 'Enauacna, qataq nataqa'en sami' ca coma' lapagaxaic. Qaq que'eca coma' nanettalec ca dalaxaic ne'enaxat maye qaica ca ỹaỹaten, nachaqcata cam ỹaconeguet maye ỹaỹaten que'eca ne'enaxat.›»
Da na'aqtac maye qaỹamaxa so 'amqaanataxanaxaicpi ye Tiatira
18«Nataqa'en 'auauo'o aca 'ere, nache 'auamaxa ñi namaxashec maye ilotague' nam ỹa'amaqten So Jesús maye netaña ye nỹecpi ye Tiatira. Qoneta':
‹¡Aỹem maye Aỹem Llalec Ñim Lo'onatac 'Enauacna! Naua ỹa'ai'te 'eeta'ama na le'eraxa na norec, qaq naua ichel qalaq qashelectrapiguiñi 'eeta'am da lqashelgaxa na lcat le'enaxat bronce da ime da nqatelaguec. Ñaq 'ana'axaỹaxana dam 'am sa'axatem:
19Aỹem saỹaten 'enauac na 'auo'ottacpi. Saỹateeta da Aỹem 'auauotec qataq saishet da 'axanec da 'arpi'iỹaxac Aỹem. Nataqa'en saỹaten da qouetague' na laỹepi shiỹaxauapi. Qaq nagui de'era 'artaunaxanaxac namayepi ỹataqta ỹactec 'anqa'en, saq 'ena'am so hua'auchiguiñi.
20Qalaxaye huo'o da sa saỹamaxaren da qoneta. Cha'aye 'am ỹataqta 'aua'aqta'a añi 'alo le'enaxat Jezabel#2.20 Jezabel: 'Era da le'enaxat co'ollaxa aso lhua so nta'a Acab, maye ilotague' so Israel soua qaỹoqteguelo vi'iye co'ollaq saxanaxa da nvi' So Cristo. Asa'aso Jezabel 'enapega co'ollaxa na Israel le'ecpi da ỹo'oxoren nam choche ne'enaqtacpi qataq saq 'en. Qaq ỹoqo'oye yi'iye 2.20 choche qaỹaloqnaxana asomaye. da queto'ot da ỹatenachettac nam Aỹem quetague'. Aña'añi 'alo ỹa'axattac da 'eetega nacheñi Ñim Lo'onatac 'Enauacna da namaq añimaye, qataq da'aqtaxaateguem nam ỹo'onataxanaxanecpi da ishet da qanallec na mashe qoỹanot na ne'enaqtac nqui'ipi maye saq 'en, qataq ỹayen namayepi da yaqto' sa ỹalaxaguet Ñim Lo'onatac 'Enauacna. 21Qaq Aỹem mashe sami' da ldaqa' añimaye, da yaqto' ỹe'eguelaxa da ỹalaxaguet Ñim Lo'onatac 'Enauacna. Qalaxaye añimaye saishet da ỹalaq da ỹo'ot damaye, qataq saishet da ỹaxaañi da ỹa'amaqteetac na ne'enaqtac nqui'ipi maye saq 'en.
22-23Qaq ỹoqo'oye Aỹem so'otec qome aña'añi 'alo da ỹataqta sa no'on, qataq ileu ñaqa'en nam ỹalaxaguet añimaye naua lapaxaguenataxanaxaco, qataq quetague' da ỹa'amaqteetac na ne'enaqtac nqui'ipi maye saq 'en. Qalaxaye da ntouen qataq ỹe'eguelaxa da ỹalaxaguet Ñim Lo'onatac 'Enauacna, nache saishet da huo'o ca so'otec qauem.
Qaq huaña qome nache na 'amqaanataxanaxaicpi ỹaỹaten da Aỹem saỹate'n naua lhuennataxaco qataq lqopitaxanaqtaico na shiỹaxauapi. Qataq ñi 'oonolec namayepi sauo'o ca nhuaxanaguec maye chegaqaigui da qauem ỹo'ottac.
24Qalaxaye nam hueta'a ye nỹecpi ye Tiatira maye saishet da quegue naua lapaxaguenataxanaxaco aña'añi 'alo, qataq sa ivita da ỹauatton nam qoỹeetega saqcha'a lataxacpi so pa'aguenataxanaxaic, qaq Aỹem sami' de'era 'oonolec iqataxac: 25da nache queto'ot da Aỹem ỹa'amaqteetac, choche ivitta'a ca laloqo' da ñe'eguelaq.
26-28Qaq na saishet da iqallem na lqalaiguesat, qataq saishet da ỹaxanec da lpi'iỹaxac Aỹem, nache sami' da la'anaxat da dauegaxan namayepi aca huaqaañi yo'oxoñi lashe. Qaq da nache 'eetai' da Aỹem ỹalaxaguet, nache sami' da la'añaxac da ilo'ogue 'enauac na ỹotta'a't shiỹaxauapi ana 'alhua, 'eeta'am da 'eetec Ñim Ita'a da Aỹem ỹami' de'era na'añaxac. Da ilo'ogue ne'ena ỹotta'a't shiỹaxauapi qalaxaye ỹataqta sa icherapec; ¡ỹataqta ilaxachigui 'eeta'am naqa'en aca no'onata taxaqui maye qaỹachegoxotaigui na 'alhua!
29Qaq cam huo'oi naua ltela lauaco, qaq no'on da na'axaỹaxana da la'aqtac So Saqcha'a La'añaxac Ñim Lo'onatac 'Enauacna da 'enapega na 'amqaanataxanaxaicpi.›»
Currently Selected:
Apocalipsis 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
