Proverbios 9
9
Da naỹaanec qataq da qaica ca qaỹaỹaana'a
1Da naỹaanec no'oxoosheguem so lma',
nache siete naqa'en soua llo'oxoraqte lauoqtel.
2Ime, nache ỹalauat so na'atetpi da yaqto'
ỹo'ot so lquia'axac qataq ỹauo'o so no'on lataxa,
nache ỹaỹamaxaañi so lquia'axala',
3nache ỹamaq aso lamaxashepi,
da tasheguema so qaỹoqotcheguemec
so huaqta'a't nỹecpi da deỹaxan, 'eeta':
4«¡Qauanaỹeecna'a qami' nsoxoppi 'enaqaicpi!»
Qataq ỹamaxa so la'aqtac so qaica ca ỹaỹaanapec, 'eeta':
5«Qauanaqui da sacheguenaq na anoq,
qataq qanỹomiigui na no'on lataxa maye seqataxaatai'.»
6Qaỹa'axañiiuec qome da qane'enaxaqui yaqto' qarca'alleeuec,
qataq qoquiigue da llec da naỹaanataxanaxac.
7Ca iviraxato'ot ca nogaqaic qataq qauemaic,
nache camaye ỹe'egueeta'a da qaisheuen qataq qainogoqchet.
8Saishet da 'aviraxato'ot ca nogaqaic ten qom 'am nquiỹa,
'aviraxato'ot qome ca ỹaanaxanaxaic yaqto' 'am ỹauotec.
9'Auapaxaguen ca ỹaanaxanaxaic nache camaye nquiguec da laỹaanec,
'auapaxaguen ca no'on da lataxac yaqto' nquiguec da laỹaanec.
10Da naỹaanec chegoqchiguiña da huo'o naq 'enec qanqa'en Ñim Nataxala',
da qaỹauatton Ñim Qui'itta nachera da ỹo'ot da qaỹachiguiñi da naỹaanataxanaxac.
11Aỹem 'am sanem da logoraic da 'anachaalataxac,
qataq da qaỹoqtrec naua vi'iye da 'anachaalataxac.
12Da 'am ỹaanaxanaxaic, nache ỹataqta huo'o da 'ana'achecỹaxac,
qaq da 'am nogaqaic qalaq maiche 'anque'etaxangui damaye.
13Da qaica ca qaỹaỹaana'a qalaq 'eeta'am aca 'alo na'aqtaqa lo'o',
'oopai qataq qaica ca ỹaỹaanapec.
14Acamaye netoigui ca lasom ca lma' da nso'ootañi,
qataq huo'o da nso'ootaña ca qaỹoqotcheguema
pa'asheguem ca huaqta'a't nỹecpi,
15nache iỹaxaatague' na petañepi,
maye quetague' so no'on nqa'aic, 'eeta':
16«¡Ña qauanaỹeecna'a qami' nsoxoppi maye qaica ca qauaỹaañi!»
Qataq ỹanem da la'aqtac na qaica ca ỹaỹaana'a, 'eeta':
17«Ca ncachaxat 'etaxat ỹataqta ama,
qataq ca nallec maye qoỹoxottañi da qanallec
camaye ỹataqta huesotta da lamaic.»
18Qalaxaye namayepi sa ỹaỹaten da na icoyeguen asomaye,
taỹa'a da ileu tangui na pa'aguiñi aca huachiqui.
Currently Selected:
Proverbios 9: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
