Proverbios 8
8
Da lỹaxanaxac da naỹaanec
1Da naỹaanec ỹataqta nlamaxaren da deỹaxaatac,
da naỹaanataxanaxac qaỹa'axaỹa naqa'en da lavilỹaxac.
2Nachaañi hueta'a aca qaỹoqotcheguemec lcomaraxalate,
qataq hua'a ca nqa'aic maye hua'axagui ca lỹa nqa'aic,
3nache ỹo'ot da qaỹa'axaỹa da lavilỹaxac da naloteuga ca lasom,
ca ñegueuo maye taỹaua'a ca huaqta'a't nỹecpi, 'eeta':
4«Qami' shiỹaxauapi, 'enauac da qoñiita
qami' ỹalamaxatchiguilo naua ỹa'aqtaqa.
5Qami' nsoxoppi maye qaica ca qauaỹaañiỹa'a,
qanapaxagueñiỹa qome da sa qanqalaache,
qataq qami' 'enaqaiqa qanapaxagueñiỹa qome
da qami' huattonaxanaxaiqa!
6Ñaq aỹem qana'axaỹaxañiỹa
cha'aye qami' sanema naua ỹoqta huo'o naq 'eneque,
qataq naua ỹa'aqtaqa maye ỹaỹamaqchiyiñi.
7Cha'aye de'era shenapec damaye ỹataqta 'eesa,
aỹem sa saỹamaxaren da ñasaxauec ca saq'en.
8'Enauaque naua ỹa'aqtaqa ỹataqta ỹaỹamaqchiyiñi,
namayepi saishet da ỹalectaigui ca saq 'en.
9Naamaye ỹataqta ỹataqteguelo naqa'en ca ỹaanataxanaxaic,
qataq saishet da imaqta'ape ca ỹaanaxanaxaic.
10Ỹataqta qauacoñeeguet qome da ỹapaxaguenataxanaxac
saishet da 'eeta'am qanqa'eñi ca plata,
qataq na nauattonaxanaxaco saq 'ena'ama qanqa'eñi ca oro.»
11Da naỹaanec napacalec da lyacỹaxac ca no'on coma',
qataq saishet da qanaloqneguet ca ỹaguec da qanqopita.
12«Aỹem naỹaanec, nache soota'aguet da naỹaanataxanaxac,
qataq aỹem hueto'ot da nauattonaxanaxac qataq da nqataxac.
13Da huo'o naq 'enec qanqa'en Ñim Nataxala'
qalaq nachera da ỹo'ot da qaỹaỹemec na qauem.
Aỹem saỹemec da 'amqaanaxac qataq apagaqaanaxac,
qataq da qauem nataxac qataq na qauema na'aqtaqa.
14Aỹem nache aỹem hueto'ot da nqataxac qataq da ntelaqchec,
aỹem nache aỹem nauattonaxanaxac qataq na'añaxac.
15Nache aỹem chegoqchigui da huo'o da lo'onataxanaxac na nta'alpi,
qataq na nataxala'pi da ishet da lapaxañi ca no'on lataxac.
16Aỹem chegoqchigui da huo'o naq 'enec na llalaqpi na nta'alpi,
qataq na nataxala'pi da ishet da ilo'ogue na shiỹaxauapi maye huetalec ana 'alhua.
17Aỹem sauotec ca aỹem ỹauotec,
qataq ca aỹem nmittaique aỹem ỹanata.
18Aỹem hueto'ot da nsallaxa qataq da ño'oxoyec,
qataq da na'amaqchec qataq da qaica ca qaiueetac.
19Qaq cam san qalaq napacalec da lyac ca oro,
qataq ca aỹem chegoqo'ot napacalec ca 'onaxaic lcat plata.
20Aỹem shectegue so nalochiguiñi nqa'aic,
qataq da llec naua no'o'n lataxaco.
21Ca aỹem ỹauotec qalaq sanem ca lalamaxat,
qataq ñelaxatchigui ca lma' da lsallaxa.
22Ñim Nataxala' aỹem ỹo'ot
co'ollaq cheta'ague da ỹo'ot na lo'onatacpi,
co'ollaq saxanaxa da ỹo'ot 'enauacna.
23Aỹem la'auaxanec da aỹem ỹo'ot
co'ollaq cheta'ague da ỹo'ot 'enauacna,
co'ollaq saxanaxa da ỹo'ot ana 'alhua.
24Aỹem nañiguiñi naqa'en co'ollaq saxanaxa da huo'oi naua late'el auaxai,
co'ollaq saxanaxa da yo'oq na talapi qataq na mpaxaatasheguem 'etaxat.
25Sañiguiñi co'ollaq saxanaxa da qalapaxañi
ana lcomaraxalatepi qataq ana qasoxonaxapi,
26co'ollaq Ñimaye saxanaxa da ỹo'ot ana 'alhua qataq naua no'onaxaye,
qataq co'ollaq saxanaxa da ỹo'ot so 'alhuolec
maye chegaqaigui naqa'en da ỹo'ot ana 'alhua.
27Ñimaye co'ollaq ỹo'ot na piguem,
da yaqto' npa'aỹañi naqa'en na 'etaxat
maye huetangui aso auaxai,
qaq aỹem nache ñachattaua'a.
28Qataq co'ollaq ỹo'ottac na lo'oc na piguem,
qataq ỹaỹamaxattapiguiñi na qaỹoqchiguingui laponqa' na 'etaxat aso auaxai,
29qataq co'ollaq ỹauo'oi naua loga'te aso auaxai
da yaqto' saishet da jec na 'etaxat,
qataq co'ollaq lapaxañi so lo'oxonaxala' ana 'alhua,
30qaq aỹem ñachattauo, sootaua'a na laỹe Ñimaye.
Qaq aỹem machiguiñi naqa'en Ñimaye,
qataq 'enauaque naua na'axa'te da aỹem imeteetac da sa'aistac,
31qaq aỹem ñetootapigui' da sootalec ana 'alhua maye lo'onata Ñimaye,
ỹataqta samachiguiñi souaxat da ỹo'ot na shiỹaxauapi.
32Qaq nagui, qami' ỹalaqpi, aỹem qana'axaỹaxañiỹa,
qoquiitegue qome da ỹataxac yaqto' qauamaichiguiñi.
33Qauloitelec qome na ỹapaxaguenataxanaxacpi yaqto' qami' ỹaanaxanaxaiqa,
saishet qome da sa qauacoñeeguet da naỹaanec.
34Machiguiñi qome ca shiỹaxaua maye aỹem na'axaỹaxana,
qataq ca 'enauaque naua na'axa'te
da deuataxaatac da hueta'a ñi lasom ñi ima'.
35Cha'aye ca aỹem ỹanata qalaq ỹanata da lca'alaxa,
qataq ỹaconeguet da lchoxonnataxanaxa Ñim Nataxala',
36Qalaxaye ca aỹem ca'ai qalaq huetalec da lchec da nachaalataxac,
¡qaq ca aỹem nquiỹa, qache ỹauotec da nleuaxa!»
Currently Selected:
Proverbios 8: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.