Proverbios 5
5
Da nqataxac da yaqto' qaivita'aguet aca 'alo 'etaxaloxoi
1'Am ỹalec, 'alotelec qome da ỹaỹaanec,
qataq 'ana'axaỹaxanalo naua ỹaỹaanataxanaxaco.
2Yaqto' da 'autaqa qalaq 'aloteguelo naua 'ara'aqtaqa,
qataq huo'o da 'arauattonaxanaxac.
3Cha'aye naua la'aqtaqa aca 'alo 'etaxaloxoi ỹataqta huo'o da lamai'c,
qataq da lavilỹaxac ỹataqta isotta,
4qalaxaye da ivita ye loga't naamaye,
nache napacalec da lchemaxa aca chemaxarai,
qataq napacalec na llaxa ca ỹeelonec maye dos naua llaqa'ate.
5Qaq da qannaicapegue' acamaye nache dauegaqtaxana da nleuaxa,
cha'aye naua lqauaxaqui' ỹalamaxattalo aca huachiqui.
6Acamaye ỹataqta sa itena'a da llec da achaalataxac,
qataq sa ila'a da saỹaỹamaxañi da lqauaxac.
7Qaq ỹoqo'oye 'am ỹalec, aỹem 'ana'axaỹaxana qome,
saisheto' da qoca'ai na ỹapaxaguenataxanaxacpi.
8Qaỹoqta qome 'anqa'en aca ỹaqa'a 'alo,
qataq saishet da saqaỹapeque 'anqa'en ca lasom ca lma',
9yaqto' saishet da ỹaqa'a ca taỹot da 'ara'añaxac,
qataq da 'anachaalataxac da hueto'ot ca qaica ca iren,
10yaqto' ca ỹaqa'a saishet da imatta't ca 'ara'añaqteguishec
cam chegaqaigui da 'ara'añaxac qataq da 'aro'onataxanaxac.
11Ten qom huo'o ca na'a'q nache choche 'antogottac,
qom ivita da imeuo da la'añaxac da 'aro'ocỹaxac.
12Qaq qoneta' qome: «¡Che'eeto' co'ollaxa da sa saconeguet so nhuogoqtaxanaxac!
Qataq ¡che'eeto' co'ollaxa da sa saconegueta naua ñeviraqtagueeco!
13¡Qataq da sa ña'axaỹaxana so ñapaxaguenaxala'pi,
qataq saishet da selo'oguet som aỹem huaqattegapi,
14qaq saxanaqca qapio'olec nache sevita da qauem,
da aỹem ỹauaachigui 'enauac na shiỹaxauapi!»
15Qaq 'anỹomgui qome ca 'etaxat,
maye chegaqangui aca maiche 'aralamaqte 'arshere,
cam 'etaxat maye chegaqangui aca 'aralamaqte 'araquipiaxaqui.
16Qaq saishet qome da 'aucorec ca 'etaxat maye 'aralamaxat,
saishet da choche 'aue'en da 'aucorelec da huangui ca nqa'aic.
17Cha'aye aca 'arshere qataq ca 'etaxat maiche 'aralamaxat,
nache saishet da 'anhuaata'ai' ca ỹaqa'a.
18¡Ỹataqta huetalec qome da no'on aca 'aralamaqte 'anỹomaxaqui!
¡Qaq no'on da 'antonaxaua aca 'ananacte' 'arhua,
19acam 'eeta'am aca ñi'imshe maye huotaxanaqtaqai!
¡Acam nache 'eetai' da lauotaxanaqtaic!
¡Qataq nache 'eetai' da lauoche da qoneta!
20'Am ỹalec, ¿ta'ainco' taxa da 'anañaneguet aca ỹaqa'a 'alo?
¿Ta'ainco' taxa da 'anshetaique da 'anqapale' aca ỹaqa'a 'alo?
21Cha'aye Ñim Nataxala', ỹaatec naqa'en da lataxac ca shiỹaxaua,
qataq ỹaỹaten 'enauaque naua lqauaxaqui'.
22Cam qauemaic qalaq maiche lqoishec da qauem lataxac,
ca maiche lasouaxashet 'eeta'am ca nañec da icoñerai' camaye.
23Dam sa ỹaỹamaxañi lataxac nachera da ỹauecta'a da nleuaxa,
qataq souaxat da qaica ca ỹaỹaana'a nache taỹa'a da daqat.
Currently Selected:
Proverbios 5: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
