Proverbios 25
25
1Ne'ena nataqa'en la'aqtacpi so Salomón, maye nataqa'en ỹiyiñi co'ollaxa so leraxanaxanecpi so Ezequías, som nta'a ye Judá, 'eeta':
2Ñim Lo'onatac 'Enauacna huo'o da llo'oxoyec
souaxat da huo'o na saqcha'a naqa'en da lataxac,
qataq na nta'alpi huo'o da llo'oxoyec da ỹaỹaten ne'ena saqcha'api.
3Ye lshequitcheguema na piguem,
qataq ye lshecchiguiña ana 'alhua,
qataq na lhuennataxacpi na nta'alpi,
namayepi saishet da qaivi' da qaỹaỹaten.
4'Anqat qome na mpa'aỹauec lshepaxanaxa ca lcat plata,
yaqto' ca lcat lo'o ishet da ỹo'ot aca ỹomaxaqui,
5qataq 'anqateua'a na qauemaicpi
maye do'onataxaatacot ca nta'a,
yaqto' da lo'onataxanaxac camaye
ishet da na'attalec da nalochiguiñi lataxac.
6Saishet qome da 'ana'amaqten
da 'auatato'ot ca nta'a,
qataq saishet da 'ampa'axanapec da qoueta'a
ca lanataqa' na 'amaqtaqaicpi,
7cha'aye no'on da maiche 'am qaỹaviguisheguema camaye,
qaq saq 'ena'am da qaỹauota'a da 'ara'aloxo
da 'am ỹauaachigui na 'amaqtaqaicpi.
Ỹoqo'oye da huo'o ca 'auauaachigui,
8nache saishet da 'auỹalapegue'
da 'aua'axateua'a ca huaña da huo'o na qanmit,
cha'aye saiuena'a da huo'o ca lỹa shiỹaxaua 'am iqoleguet,
huaña, nache sa 'auaỹaten ca qonetec.
9'Anqoleguete' ca 'am ỹasaqtapeguelec 'arasouaxashet ca 'arỹa,
qataq saishet da 'auchoxot ca ỹaqa'a qoỹoxottapiguiñi,
10cha'aye sa iuena'a da huo'o ca 'am hua'aqchigui,
nache ỹauota'a da 'ara'aloxo,
nache da qauem 'ana'aqtaguec saishet da qanqatsheguem.
11Naua na'aqtaqa ỹaỹamaqchiguiñi
maye qanasaxarec da huaqchigui da qaiue'n,
naamaye 'eeta'ama aca no'onata manzana,
maye chegaqaigui na oro qataq qalapaxalec na plata.
12Qataq 'eeta'am nataqa'en aca chiguishaqte
huo'otaq aca nqola maye chegaqaigui na ndota't oro,
cam ỹaỹaten da na'axaỹaxana ca la'aqtac ca ỹaanaxanaxaic.
13Que'eca namaxashec maye ỹataqta ipacchiguilo naua la'aqtaqa ca na'aco',
camaye 'eeta'am na latomaxa ana aloñi ca na'a'q maye napaxaỹañi,
cha'aye ỹo'ot da dalaxaic la'añaxac ca na'aco'.
14Qataq ca huo'o ca ỹachaxanapec da ỹan,
qalaxaye saỹauana da huo'o ca ỹan,
camaye 'eeta'am da naueguelec na piguem
qataq da anac na la'at qalaxaye qaica ca auot.
15Da nhualaxavic ishet da nmooñi da lalemataic ca nta'a,
qataq naua huesotte' na'aqtaqa ishet da nlaxaayiñi
naua qaramte' nhuennataxaco.
16Da 'aulalec ca te'esaq lta'a lli'i
qalaq saishet da ỹaguec ca qollec,
cha'aye sa iuena'a da ỹaguec ca qollec nache 'auanol.
17Da 'anamaqtega ca 'anauochaxaua,
qalaq saishet da nache 'avi'eguelaqta'a,
cha'aye sa iuena'a da 'am nasamiisop
nache 'am ỹaỹemec.
18Ca shiỹaxaua maye choche datenataxaalec ca nauochaxaua,
camaye 'eeta'am aca nhuaxanaxanaqte qo'oipaq,
ỹeelonec qataq aca checna ỹaxarai.
19Da qaipe'etega ca saq ñara'ac aloic da qanayeuaigui da qui'ic,
qalaq 'eeta'am ca huacagaxaic na lche,
huo'otaq da qaiquia'axana aca nhue maye huo'o na lauac.
20Da qaỹo'onaxaalec ca shiỹaxaua maye daquicotac,
damaye 'eeta'am ca lataxa 'euaxaic
da qaicorelec ca ncolaxa,
huo'otaq da qanqa't naua anogo da huo'o na latomaxa.
21Ca 'am nquiỹatega da ilem na lqouaxa,
qalaq 'auquia'axan,
qataq da huo'o na laquip qalaq 'anỹomaxan,
22cha'aye da 'auo'ot de'era nache camaye
ishet da na'agui 'anqa'en na lashec da la'aloxo,
nache Ñim Nataxala' ỹauo'o da 'ansheetenaguec.
23Na quenaquiaxaic maye chegaqa'ague da sheu'
ishet da anacot na auot,
qataq naua qauema na'aqtaqa ỹo'o't da qauem da nasheguiỹaxac.
24Qataq na'aictoxo' da qanayeetaña
na laỹolec ca pa'asheguem ca nỹec,
qalaxaye saq 'ena'am da qanayeetaigui
na lauel ca lta'araic nỹec da nauoreua aca 'alo petaxai.
25Qataq 'eeta'am da qanỹomigui na 'etaxat atom
da qailem na naquip,
da 'eetec da nvi' ca no'on na'axaỹaxac
maye chegaqa'a ca qaỹoqta 'alhua.
26Ca no'on da lataxac da iviloxol
da datato'ot ca qauemaic,
camaye 'eeta'am na imalaqta 'etaxat
qataq aca nshere maye nshepaxan na le'ec.
27Qataq saỹaỹamaxañi da sa qaỹala'ac
da qanallec ca te'esaq lta'a lli'i,
qataq saỹaỹamaxañi
da qanmitta'ai da maiche ño'oxoyec.
28Ca saỹaỹaten da nllañi da lhuennataxac,
qalaq 'eeta'am ca nỹecpi maye nlaguiñi
qataq qaica ca lpaqtaxat.
Currently Selected:
Proverbios 25: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
