Proverbios 12
12
1Ca ỹauotec da napaxaguenataxanaxac
camaye ỹauotec da naỹaanec,
qaq ca saiuooneguet da qaiviraxato'ot
camaye qaica ca ỹaỹaanapec.
2Ñim Nataxala' ỹaỹamaxareeta ca ỹale soxoraic,
qaq ca 'etaxaloxoic qalaq Ñimaye ỹauo'o ca nhuaxanaguec.
3Da qauem saishet da nache 'eetai' da na'attañi naqa'en ca shiỹaxaua,
qaq ca no'on da lataxac qalaq nache 'eetai' da na'attañi qaica ca iraxanai'.
4Aca 'alo no'on da lataxac acamaye ỹo'ot da llo'oxoyec ca lhua,
qaq aca qauem da lataxac qalaq ivitta'a da nlachiguiñi naqa'en ca lhua.
5Na shiỹaxauapi no'on da lataxac lhuennataxat
da ỹo'ot ca nalochiguiñi lataxac.
Qaq na qauemaicpi qalaq lhuennataxat da natenataxanaxac.
6Naua la'aqtaqa ca qauemaic
'eeta'ama aca nqoina maye dalaataxan,
qaq naua la'aqtaqa ca no'on da lataxac qalaq deca'alaqtaxa'n.
7Na qauemaicpi qalaq huañi, nache imeuo,
qaq na llalaqpi ca no'on da lataxac qalaq nache 'eetai' da na'attañi.
8Ca ỹale qaỹo'oxoren souaxat da huo'o na laỹaanec,
qaq ca qauema naua lhuennataxaco qalaq nda'a't da no'otanaguec.
9Qaq ỹactec da no'on ca ỹale da no'otanec
qalaxaye huo'o na lamaxashecpi,
qaq saq 'ena'am ca na'amaqteetai' da 'eetega sallaxanec
qalaxaye qaica ca aloq.
10Ca no'on da lataxac ỹaỹaten da ntela'a na na'atetpi,
qaq ca qauemaic qalaq sa ỹaỹaten da dechoxonnataxan.
11Ca do'onataxaatapeguelec ca na'alhua qalaq sa qoue na aloq,
qaq ca imelec da lqueuoxoc qalaq huetague' na qaica ca naigui.
12Na qauem qoỹeetapeguec nachena na loxonaxanaxat na qauemaicpi,
qaq na no'on da lataxac qalaq ñaxatec, nache huo'o da alaỹaxac.
13Ca qauemaic qalaq lpachigui da maiche latenataxanaxac,
qaq ca ỹale no'on da lataxac qalaq qaica ca nqalanaxac da huo'o ca huaigui.
14Ñi 'oonolec ỹaconeguet ca alaỹaxac na maiche la'aqtacpi,
qataq ỹaconeguet da lashiichiỹaxac cam ỹo'ottac.
15Ca qaica ca ỹaỹaanapec ipi'itaxana
da ỹaỹamaqchiguiñi 'enauac na ỹo'ottacpi,
qaq ca ỹaanaxanaxaic qalaq iloteguet na nqataxacpi.
16Ca qaica ca ỹaỹaanapec qalaq saqaỹaloq da ỹachaxan da lalemataic,
qaq ca huo'o na ỹaỹaten qalaq saishet da qochetega ca mpa'aguenataguec.
17Ca ỹoqta 'eesa ca ỹa'axat qalaq ỹa'axat ca ỹoqta 'eesa lataxac,
qaq ca saq'en qalaq ỹa'axat ca saishet da 'eesa.
18Huo'o na shiỹaxaua deque'emaqtaxa'n naua la'aqtaqa,
qaq naua la'aqtaqa ca ỹaanaxanaxaic qalaq datannaxa'n.
19Ca 'eesora naua la'aqtaqa qalaq qaỹoqtec da nachaalataxac,
qaq ca shepecaic qalaq saqaỹaloq da imeuo.
20Na lhuennataxacpi ca qauemaic qalaq nda'a't da natenataxanaxac,
qalaxaye huo'o da ntonaxac na ỹo'ottac da nlagaxayec.
21Ca ỹale no'on da lataxac qalaq saishet da nque'eteetapigui na qauemsat,
qaq ca qauemaic qalaq talec 'enauac na sa ỹaỹamaxañesat.
22Ñim Nataxala' ỹataqta ỹaỹemec na shepecaicpi,
qalaxaye ỹaỹamaxareeta na ỹo'ottac na 'eesa lataxac.
23Ca qaica ca nqalaate' saishet da ño'oxoreetapigui da laỹaanec,
qaq ca qaica ca ỹaỹaanapec qalaq ño'oxoreetapigui da no'oopashaxac.
24Ca do'onataxaatac qalaq ishet da damaxasoxonapec,
qaq ca hualaic qalaq choche qailattac.
25Da qui'icỹaxac damaye ỹaquicoqchet ca ỹale,
qaq naua no'o'n na'aqtaqa qalaq ỹo'ot da namaicỹaxac.
26Ca no'on da lataxac ishet da ỹaueca'aguet ca 'eeta'am lỹa,
qaq na qauemaicpi qalaq taỹa'a da iqataqchet da maiche llecỹaxac.
27Ca 'ipiaxaic maye hualaic saishet da huo'o ca ỹachiguiñi,
qaq ca hualaxaunaxaic qalaq ishet da ỹachiguiñi da nsallaxa.
28Da llecỹaxac da nalochiguiñi lataxac chegaqaigui da nca'alaxa,
qaq se'eso nqa'aic qaica ca nleuaxa.
Currently Selected:
Proverbios 12: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.