Proverbios 11
11
1Ñim Nataxala' sa ỹaỹamaxaren
aca naloqnaxanaxaqui sa naloguiñi,
qalaxaye ỹaỹamaxareeta aca naloqnaxanaxaqui maye nalochiguiñi.
2Da 'amqaanaxac ỹo'ot da qaica ca ño'oxoyec,
qaq da naỹaanec qalaq hueta'aguet na qaica ca la'amaqchec.
3Na no'on da lataxac qalaq taỹa'a da no'oitegue da llecỹaxac,
qaq na saq ỹataxalec da lataxac qalaq ilaxachigui da maiche lle'etaxaloxo.
4Da nsallaxa qaica ca naigui da ivita ca na'a'q da qanmit 'enauacna,
qalaxaye ca ỹaỹamaqchiguiñi lataxac nca'alaxateeguesop da l-leuaxa ca shiỹaxaua.
5Da ỹaỹamaqchiguiñi lataxac ỹaỹamaxaañi da llecỹaxac ca no'on da lataxac,
qaq ca qauemaic qalaq maiche cañe' na qauem maye ỹo'ottac.
6Da ỹaỹamaqchiguiñi lataxac huesochiguiñi naqa'en ca ỹale no'on da lataxac,
qaq da nqopitaxanaqtaic qalaq icoñerai' ca saq 'e'n naua la'aqtaqa.
7Ca qauemaic da ivita da ileu,
qalaq lỹachiguiñi' da naquitaxac qataq nam tatapigui lauelpi.
8Ca no'on da lataxac nca'aleeguesop da nque'eenaxac,
qaq da nque'eenaxac camaye pa'aiguet da talec ca qauem da lataxac.
9Naua la'aqtaqa ca qauemaic ique'emaqchet ca lỹa,
qaq ca no'on da lataxac qalaq deca'alligui da lauattonaxanaxac.
10Ca no'on da lataxac da ivita da qaica ca iueetac,
nache machiguiñi naqa'en ca netaña ca huaqta'a't nỹecpi,
qaq ca qauem da lataxac da ileu qalaq qantootapeguec.
11Da nchoxonnataguec ca no'on da lataxac
ỹo'ot da nquictauec naqa'en ca huaqta'a't nỹecpi,
qaq naua la'aqtaqa na qauemaicpi qalaq nlaxaañi camaye.
12Ca qaica ca ỹaỹaanapec qalaq quetapeguelec ca nauochaxaua,
qaq ca ỹaanataxanaxaic qalaq ñe'emaxatta.
13Ca na'aqtaqa lo'o' qaica ca ỹoxottapiguiñi,
qaq ca shiỹaxaua maye npe'et qalaq choche ñe'emaxatta.
14Ca huaña da sa qaỹaỹaten da qaỹaueca'aguet
na shiỹaxauapi nache namayepi ishet da taỹañicra,
cha'aye da la'añaxac namayepi chegoqchigui
na qalota maye ỹaỹaten da lqataxac.
15Ca ỹa'aalaxanaxan ca shiỹaxaua maye sa qaỹauatton
nache camaye maiche na'aqcheela't,
qaq ca ivita'aguet da na'aalaxanaxac
qalaq camaye lactapiguiñi.
16Aca 'alo choxonnataxanaxai acamaye huo'o da ño'oxonnataguec,
qaq ca ỹale 'onataxanaxaic qalaq huo'o da lsallaxa.
17Ca choxonnataxanaxaic, camaye maiche no'onaxaala't,
qaq ca sancherapec qalaq maiche nque'emaqcheela't.
18Ca qauemaic ỹaconeguet ca nsheetenaguec maye saq'en,
qaq ca ỹaỹamaqchiguiñi ca lo'onataxanaxac
camaye ỹoqta 'eesa ca nsheetenaguec.
19Ỹoqo'oye da qanayectegue da ỹaỹamaqchiguiñi lataxac
qalaq huo'o da nca'alaxa,
qaq da qanayectague' da qauem qalaq taỹa'a da nleuaxa.
20Ñim Nataxala' ỹaỹemec na qauema naua lhuennataxaco,
qalaxaye ỹaỹamaxareeta na ỹaỹamaqchiguiñi da lataxac.
21Qaq ỹoqta 'eesa da ca qauemaic
saishet da sa qaỹauo'o ca nhuaxanaguec,
qaq na no'on da lataxac qalaq nca'alec.
22Aca 'alo 'onaxai qalaxaye qaica ca ỹaỹaanapec,
nache acamaye 'eeta'am aca chiguishaqte oro da netagui na lmic aca cos.
23Naua 'eetapegueco na no'on da lataxac
naamaye ivira'a da ỹaỹamaqchiyiñi,
qaq da naquitaxac na qauemaicpi qalaq taỹa'a da qauem.
24Ca shiỹaxaua sa naloqnañi na ỹan,
nache nataqa'en ỹactec ca ỹaconeguet,
qaq ca shemataqaic qalaq taỹa'a da lachoxoyec.
25Ca choxonnataxanaxaic qaica ca iueetac,
qataq ca chetaqtaxanaxaic nataqa'en huo'o ca ỹaconeguet.
26Qaq ca imattega't na ala na trigo,
qalaq na shiỹaxauapi isheuen camaye,
qaq ca imen namaye qalaq qaichoxoren.
27Ca ỹo'ottac ca ỹaỹamaqchiguiñi qalaq camaye qaỹaỹamaxareeta,
qaq ca nmitta'ai da ỹo'ot na qauem camaye talec na qauem.
28Qaq ca pe'etega da maiche lsallaxa qalaq naañi
'eeta'am ana deqaqta laue ana qo'oipaq.
Qaq ca no'on da lataxac qalaq ñaxatec 'eeta'am ana lcoue ana qo'oipaq.
29Qaq ca maiche nlaxaañi ca lma' nache qaica ca no'ono'ot camaye,
qataq ca qaica ca ỹaỹaanapec qalaq choche l-latac ca ỹaanaxanaxaic.
30Da ỹaỹamaqchiguiñi lataxac chegaqaigui da achaalataxac,
qaq da loquiaxac qalaq ilaxachigui da achaalataxac.
31Ca no'on da lataxac da ỹaconeguet ca nsheetenaguec da ñaq hueta'a ana 'alhua,
qaq nache 'eetec nataqa'en ca qauemaic qataq ca 'etaxaloxoic.
Currently Selected:
Proverbios 11: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
