Filipenses 4

Nqataxacpi maye talec na 'amqaanataxanaxaicpi

1Qaq ỹoqo'oye qami' ñauochaxau' ỹaqaỹa't, aỹem ỹataqta huo'o da iyaxa da qami' ñauaneto, cha'aye qami' maye nacheqami' qauo'oche da ñetonaxac, qataq qami' ỹo'oxore'te. Qaq qami' ñauochaxau' nache 'eetai' qome da qoquiitague' So Qarataxala'.

2Qataq huo'o da ñachoxonnaxac da aca Evodia qataq nataqa'en aca Síntique da caamaye no'on da ỹataqta nhuoteeta't, cha'aye caamaye nache 'eeta'a't da ỹa'amaqteeta'ape So Qarataxala'. 3Qataq 'am ỹo'onataxanaxaua maye saishet da aỹem 'aỹotec, 'am shenapega da 'autaua'n qome que'ecaua qarqaỹa't, cha'aye caamaye ỹataqta qalota da ltaunaxanaxa'c aỹem, da sa'axattac da nca'alaxa, nataqa'en ca Clemente qataq cam laỹepi ỹo'onataxanaxauapi de'era qaro'onataxanaxac. Qaq Ñim Lo'onatac 'Enauacna mashe ỹerelec aca naneraxalate na chochaq tatec da lca'alaxa, nam le'enaxatpi namayepi.

4Qaq ỹataqta qantoñiitapeguec So Qarataxala' 'enauaque naua na'axa'te. Qaq de'era ỹa'aqtac ỹataqta she'eguelaxattalec da ỹataqta qantoñiitapigui' qome. 5Qaq 'enauac qome na shiỹaxauapi ỹataqta qami' ỹauattoote' qom qami' huotaxanaqtaqaiqa. Cha'aye So Qarataxala' mashe saqaỹapeque da nvi'.

6Qataq saishet da huo'o ca qami' ỹaquicoqchetta'ape, nacherata da ỹataqta qaua'aqtaxañiitem Ñim Lo'onatac 'Enauacna da ivita da qanqouagaxauñiitacot. Qauỹaxañiỹot Ñimaye cam qaviñiitaique, qataq nataqa'en qaỹa'añiitacot da qana'achecỹaxaqui. 7Yaqto' Ñim Lo'onatac 'Enauacna qami' ỹanema da l-lagaxayec, qaq de'era nlagaxayec damaye sa ivi' da ỹaỹaten na shiỹaxauapi maye huetalec ana 'alhua, qaq damaye npaxattalec da lquiyaqteỹaxac, qataq da lhuennataxac nam mashe lalamaxatpi So Cristo Jesús.

Qailotegue da lataxac ca ỹaỹamaqchiguiñi

8Qaq de'era pa'atec qami' ỹaqaỹa't, 'eeta': ỹataqta qauennataxañiitelec cam ỹataqta 'eesa, qataq 'enauac cam ishet da huo'o naq 'enec qanqa'en, qataq 'enauac cam nalochiguiñi, qataq ca 'onaxaic, qauennataxañiitelec nataqa'en cam no'on nataxac, qataq 'enauac cam ishet da ỹo'ot da ño'oxonnataxanaxac.

9Qataq ỹataqta qauo'oche qome 'enauac nam qami' sapaxagueneque, qataq nam iqataxacpi maye qami' sanema, qataq nam ỹa'aqtacpi maye qaua'aqaichigui, qataq nam so'otpi maye qauauañiichigui, nachena qauo'oche qome. Qaq Ñim Lo'onatac 'Enauacna maye chegoqo'ot da nlagaxayec, nache 'eetai' qome da qami' hueta'agueta.

Aso ltaunaxanaqte so Filipos le'ecpi maye ỹamaxa so Pablo

10Qaq aỹem ỹataqta huo'o da ñetonaxac So Qarataxala', souaxat da chegoqchigui Somaye da qaltaq aỹem qauennachiỹa'a. Qaq saishet da huo'otaq sheetega da aỹem qaucoviỹa'ai, cha'aye saỹaten da choche qaica ca qardaqa'ai da aỹem qautauañi. 11Qaq saishet da shenapec de'era souaxat da huo'o ca iuenaxanaxa, cha'aye aỹem saỹaten da ñetootapeguec cam huo'o. 12Aỹem sanaỹa'ac da sootaigui da ỹachoxoyec, qataq sanaỹa'ac da sootaigui da qaica ca seueetac. Qataq aỹem saỹaten da sataỹa'aguet ca camachaqca aỹem nvirelec, na'aictaxa da sa seuena'a ca sachec, huo'otaq da qaica ca sachec, huo'otaq da qaica ca seuen, huo'otaq da huo'o ca iuenaxanaxa. 13So Cristo aỹem ỹami' da ỹa'añaxac da yaqto' ñala'aguet da sataỹa'aguet 'enauac nam sevireguet. 14Qalaxaye qami' ỹataqta ỹaỹamaqchiguiñi de'era qartaunaxanaxaqui, da aỹem qautauañi souaxat da huo'o da iuenaxanaxa.

15Qataq qami' maye qoñiitaña na nỹecpi na Filipos, nataqa'en qauaỹaañita co'ollaq cheta'ague da sa'axat da no'on na'axaỹaxac maye chegaqaigui da nca'alaxa. Qataq co'ollaq sheca'ai ye 'alhua Macedonia, qalaq qaica ca aỹem itauan nam laỹepi 'amqaanataxanaxaicpi, nacheqamiita da aỹem qanamaqỹa co'ollaxa aso qartaunaxanaqchi. 16Nataqa'en co'ollaq soota'a ye nỹecpi ye Tesalónica, qalaq nache qoquiito'ot da aỹem qanamaqaitega aso qartaunaxanaqchi, souaxat da iuenaxanaxa. 17Qalaxaye aỹem saishet da shenapec de'era da sauotaique da qaltaq qauauo'oi ca aỹem qaỹa'añim, nacherata da sauotaique da yaqto' Ñim Lo'onatac 'Enauacna ilochigui de'era aỹem qauo'ochec nache isheeten qome. 18So Epafrodito aỹem ỹami' aso aỹem qanamaqỹa, qaq asomaye ỹataqta ỹapacauec. De'era qartaunaxanaxaqui ỹataqta ama da laitaỹaxac, 'ena'am da alaitaỹaxac aca nachetaqtaxanaqte maye qoỹanot Ñim Lo'onatac 'Enauacna da ỹataqta ỹamaateguet. 19Qaq Ñim Ita'a maye Lo'onatac 'Enauacna, qami' ỹanema qome 'enauac cam qaviñiitaique ỹachegoxotchigui dam qaica ca 'ena'am lsallaxa, qataq da llo'oxoyec maye hueto'ot So Cristo Jesús. 20¡Qaq Ñimaye maye Qarta'a, nache 'eetai' qome da qaỹo'oxoreetac! Aja', nache 'eetec.

Da pa'atec nquinaxanaxac

21Samaxa da iquinaxanaxac cam ỹaqaỹañicpi maye ỹa'amaqteetac So Cristo Jesús. Qataq nataqa'en naua qarqaỹa't maye aỹem hueta'agueta qami' ỹamaxalo da lquinaxanaxac. 22Nataqa'en qami' ỹamaxalo da lquinaxanaxac 'enauac nam 'amqaanataxanaxaicpi maye hueta'a na lma' ñi nta'a na Roma da do'onataxaatacot.

23Qaq So Qarataxala' Jesucristo, qami' ỹanema qome da lta'araic lqouagaxanaqtaic. Aja', nache 'eetec.

Currently Selected:

Filipenses 4: LÑLE13

Highlight

Copy