Filipenses 3

Da lyac da qaỹauatton So Cristo

1Qaq nagui qami' ỹaqaỹarolqa, qantoñiitapeguec qome da qana'ayeetaua'a So Qarataxala'. Qaq aỹem saishet da huo'otaq ñasamtapiguiñi da she'eguelaxattalec de'era maye sogote da shiyiñi co'ollaxa, cha'aye damaye saỹateeta da ỹataqta qarviñiqui. 2Qaq maxatchaxa, qarvichiỹa'aguet qome na shiỹaxauapi maye nqaigaxat,#3.2 Shiỹaxauapi maye nqaigaxat: Na griego de'era na'aqtac naigui da pioxoppi. Qaq damaye la'aqtac na judiopi co'ollaxa da isheuen nam saishet da judiopi. Qalaxaye so Pablo iuen damaye da 'eetega nam judiopi maye ỹamaqtalec nam 'amqaanataxanaxaicpi maye saishet da judiopi da iuen da ỹo'ot ca la'anaxat na lo'oc qataq napaxaguena na laỹepi lataxac maye maiche la'amqaanataxanaxac na judiopi. qataq ỹo'otta'ape naua qauema, qataq ipelectac na lo'oc. 3Cha'aye nam ỹoqta na'añeguishecpi qataq ỹataqta 'eesa, qaq nache qomi' maye chegoqchigui So Saqcha'a La'añaxac Ñim Lo'onatac 'Enauacna maye sho'oxonnaqtac, qataq ỹo'ot da qana'amqaanaxac, cha'aye qomi' lalamaqa'ate So Cristo Jesús, qataq nache saishet da ñaquitaqtega ca choche la'añaxac ca shiỹaxaua. 4Qaq aỹem ye nataqa'en ỹataqta ñaquita'a co'ollaxa namayepi, qaq ỹoqo'oye da huo'o ca lỹa da 'eetega ỹactec da naquittega namayepi, nache aỹem ỹactec da ñaquitaxac namayepi. 5Cha'aye aỹem co'ollaq mashe sevi' soua ocho na'axa'te da ñañiguiñi, nache qaỹauo'o so la'anaxat na ỹo'oc,#3.5 La'anaxat na lo'oc (circuncisión): Qaimeten ye Romanos 2.25 maye ỹa'axat da ỹoqta naigui de'era na'aqtac. cha'aye aỹem ỹataqta ỹalamaxat ihuo' na Israel le'ecpi, sachegoxoigui na llalaqpi so Benjamín, aỹem hebreo le'ec,#3.5 Hebreo le'ec: Ana dalaxai nere qaỹamata'ac hebreo le'ecpi nam judiopi maye saq nqaalec yem ỹataqta lalamaxat na'alhua namayepi, qalaxaye queto'ot da huo'o naq naigui naqa'en da maiche lataxac qataq da la'amqaanataxanaxac na judiopi qataq detaqtapiguilo naua arameo la'aqtaqa. ñapacalec nam ỹataqta qalota maye 'eetega naxa da hebreo le'ecpi. Da ỹataxac aỹem fariseo le'ec, cha'aye shecteguelo naua nqataxaco maye chegoqo'oto so Moisés. 6Qaq ỹataqta huo'o da iuogoxo da sepaqueelec co'ollaxa na namaxasoxonaxacpi, ỹoqo'oye sevira'a da secaatac nam ỹa'amaqten so Jesús. Qaica ca ishet da ỹauo'o ca ỹasouaxashet da 'eetega da sa sepaguelec na namaxasoxonaxacpi. 7Qalaxaye 'enauac ne'enapi maye ỹataqta huo'o naq 'enec ñaqa'en co'ollaxa, nagui qalaq 'eeta'am ñaqa'en da ỹataqta qaica ca naigui, souaxat So Cristo. 8Qaq saishet da nacherata de'era, cha'aye 'enauac nam ishettaxa da ỹalamaxatpi, qalaq 'enauac salat, cha'aye ỹataqta saishet da huo'o ca ivi' ñaqa'en da lyacỹaxac da ỹauattonaxanaxac So Cristo Jesús maye Ỹataxala'. Qaq souaxat So Cristo, nache imauec da deqat ñaqa'en nam ỹalamaxatpi co'ollaxa, qataq 'eeta'am ñaqa'en da ỹataqta qaica ca naigui, cha'aye mashe sauatton Somaye, 9qataq yaqto' aỹem qaila'a da ña'attaua'a So Cristo. Qaq saishet da chegoqchigui da no'on ỹataxac souaxat da salaxaguet na namaxasoxonaxacpi, nacherata da no'on nataxac maye ỹanem Ñim Lo'onatac 'Enauacna cam ỹa'amaqten So Cristo, dam no'on nataxac maye chegoqchigui da npi'iỹaxac. 10Qaq ỹoqo'oye dam 'oonolec maye ỹataqta seyaqa'a, damaye sauotaique da ỹataqta sauattoota So Cristo, qataq da ñauane' da la'añaxac co'ollaq nca'aleeguesop da nleuaxa, yaqto' ñeuanaua'a da nque'eenaxac, qataq sevira'a da shena'am Somaye da l-leuaxa. 11Nache huo'o da ihuataxanaxac da salectoigui qome na leuaxaicpi qom qaltaq qanca'alaxatec.

Da 'añaxataxac da yaqto' qaivira'a ca naloqnec

12Qaq aỹem saishet da sheetega da mashe sevi' 'enauac nam sa'axattac, huo'otaq da mashe nalochiguiñi da ỹataxac. Qalaxaye aỹem ashecta, huo'o da ña'añaxataxac da yaqto' sevira'a da nalochiguiñi da ỹataxac, cha'aye nachera da huo'omshe aỹem nca'alaxatec So Cristo Jesús. 13Qami' ỹaqaỹa't, aỹem saỹateeta da saxanaxa da sevi' ye naloqnec, qalaxaye ỹataqta ñaỹateetela't da saishet da ñamatta'a nam mashe semat, nacherata da ña'añaxat, qataq selotelec da so'ottac nam saxanaxa da semat. 14Qaq ỹoqo'oye nache ashecta da saỹa'a ca naloqnec, yaqto' saconeguet qome cam ỹachaxanapec Ñim Lo'onatac 'Enauacna, cam huo'omshe qomi' iỹaxanalo chegoqchigui So Cristo Jesús.

15Qaq ỹoqo'oye 'enauac da shenaqta maye mashe nalochiguiñi da qarpi'iỹaxac, no'on da nache 'eeta'a't da qarhuennataxa. Qalaxaye da huo'otaq huo'o ca lỹa qarhuennataxaqui, qalaq Ñim Lo'onatac 'Enauacna ishet nataqa'en da qami' itauneque da qauaỹaañi camaye. 16Qaq de'era ỹataqta ỹaỹamaqchiguiñi, qataq iuen da nachera qome da qarataxac.

17Qami' ỹaqaỹa't, no'on da ỹataqta qoquiitegue da ỹataxac. Qataq qauaỹataxayiñiita nataqa'en nam quetegue da nataxac maye qami' sapaxaguenaxaque. 18Qaq mashe qalota da qami' sa'aqtaxaateguema naxa, qalaxaye nagui qaltaq ñeỹeetalec da she'eguelaxalec da qami' sa'aqtaxanema, cha'aye ỹataqta qalota nam dataỹa'aguet da na'aqtaguec da l-leuaxa So Cristo, co'ollaq qaiuaxaneguet so npe'enaxaqui. 19Ne'ena shiỹaxauapi namayepi taỹa'a da qaỹasaxaña cam nhuaxanaqa' na 'etaxaloxoicpi. Cha'aye nda'a't da quetague' da ño'oxonnaxac da huo'o ye ỹo'ot, cha'aye da ỹoqta ỹaỹateeta taxa, nache huo'o da la'agaxa. Qataq namayepi nda'a't da iuennatega na qauem maye huetalec ana 'alhua. 20Qalaxaye qomi' qarma' da piguem, dam chegoxogue Som Qarataxala' maye Qarca'alaxaqui qom ñe'eguelaq. 21Qaq Somaye naralaxat qome da qaro'ocỹaxac maye qaica ca la'añaxac, da yaqto' 'eeta'am naqa'en dam lo'ocỹaxac maye ỹo'oxoraq. Qaq damaye ỹachegoxotchigui da la'añaxac maye nachera da do'onataxana qome da ilo'ogue 'enauacna.

Currently Selected:

Filipenses 3: LÑLE13

Highlight

Copy