Mateo 22

Qaỹaloqnaxana so naronaxac maye qaique'elec

1So Jesús qaltaq ỹe'eguelaxalec da ỹauo'o so daloqnaxana co'ollaq datata'aguet so ltaxaỹaxanaxanecpi na shiỹaxauapi da qaitaxaỹapegue' Ñim Lo'onatac 'Enauacna qataq som lataxala'pi na judiopi qataq so chegaqaigui na fariseopi, 'eeta':

2«De'era lo'onataxanaxac Ñim Lo'onatac 'Enauacna, 'eeta'am ca nta'a da ỹauo'o ca lquia'axac da ỹo'oxoren da laronaxac ca llalec. 3Nache ỹamaq so lamaxashecpi da yaqto' icoyeguen 'enauac som huotaique da ỹalectauo naqa'en se'eso lquia'axac. Qalaxaye som qaicoyeguenpi saishet co'ollaxa da huo'o ca anac. 4Nache so nta'a qaltaq ỹauo'o so ỹamaq laỹepi lamaxashecpi, nache ỹache naqa'en da la'aqtac, 'eeta': ‹Da nallec mashe imeta. Mashe samaxasoxoolec da qaỹalauat som ỹataqta no'on ilo huaca llalec. ¡Qauanaiua'a da naronaxac!›

5Qalaxaye som ncoyeguenatacpi saishet da ỹalaq. Nachaqrata da ñi 'oonolec ỹaqa'a na ỹo'ot. Huo'o so nqo'oneuga ca na'alhua, qataq huo'o so nqo'ona ca nmenaqa', 6qaq so laỹepi qalaq ỹataqta ỹaconeua'a so lamaxashecpi so nta'a, nache iuaxaatac, choche ivitta'a da ỹalauat.

7Nache se'eso nta'a ỹataqta dalemata, nache ỹamaq so nalleppi, da yaqto' ỹalauat 'enauac se'eso ncoyeguenatacpi qataq da ỹavigaxat 'enauac na lma'pi somayepi. 8Ime, nache so nta'a 'enapega so lamaxashecpi, 'eeta': ‹Da tonaxac da qantonec da naronaxac mashe qaỹacoolec, qalaxaye nam temaq qanhuanaxauapi saq anac. 9Qaq ỹoqo'oye qoqui qome, qoquiiguelo naua lta'al nqa'aico. Nache qaucoyiguiñi 'enauac cam qanateñiỹa'aguet da yaqto' naua'a da naronaxac.›

10Nache som namaxashecpi jec da queguelo naua nqa'aico da icoyeguen so qalota shiỹaxauapi, somayepi huo'o na qauemaic, qataq huo'o na 'onaxaic da lataxac, qaq huaña, nache ỹataqta nlaqchigui se'eso nỹec maye huaña se'eso naronaxac.

11Qaq co'ollaq pa'auo so nta'a da demeenaxaneua'a som ncoyeguenatacpi, nache ila'a so 'oonolec da saishet da ỹaatrañi naua anogo maye lataxaua da qaỹalegueua'a de'era naponaxac, 12nache 'enapega somaye, 'eeta': ‹¡'Am iỹa! ¿Ca 'eeteco' da 'ausheto' co'ollaxa da 'ampa'auo ye 'aỹa'aatrañi naua anogo maye saishet da lataxau' da qaỹalegueua'a de'era naponaxac?›

Qalaxaye somaye saishet da ỹasat. 13Nache so nta'a ỹamaxalec so lamaxashecpi, 'eeta': ‹Qaucoñiyiỹa't naua lchel qataq naua lhua'q, nache qauasaqaiuga ye napalaxa, yem huaña da na shiỹaxauapi ỹataqta nỹen qataq inaga't naua lhue da nqui'ic.›

14Qaq nache 'eetec de'era cha'aye qalota na qaicoyeguenpi da ỹalegueua'a da lo'onataxanaxac Ñim Lo'onatac 'Enauacna, qalaxaye saq 'amaqtaq nam ỹaỹamaxareeta Ñimaye.»

Qainataxaateguec da nsheetenaguec ca nta'a maye netaña ye Roma

(Marcos 12.13-17; Lucas 20.20-26)

15Qaq huo'o so na'a'q nache nam ỹalectaigui na fariseopi detaxaỹapega't da naỹaana't da huo'o ca nasaxauec la'aqtac qanqa'en So Jesús cam chegoqchigui da qaỹauo'o ca lasouaxashet. 16Huaña, nache huo'oi soua qaỹama'q nam lapaxaguenatacpi somayepi, nnaictague' qanqa'en nam ỹalectaigui na quetague' so nta'a Herodes, da yaqto' 'enapega So Jesús, 'eeta':

–'Am Napaxaguenataxanaq, qomi' saỹaanaq da 'am ỹataqta 'eesora naua 'ara'aqtaqa, qataq 'auapaxagueeteguec na shiỹaxauapi da 'enauac ỹalaxaguet Ñim Lo'onatac 'Enauacna. Qataq saishet da 'auqochetega nam quetapeguelec da 'arapaxaguenataxanaxac, cha'aye 'am saishet da 'autaqtac da 'auauotaique da 'am ỹaỹamaxareeta namayepi. 17Qaq ñaq qomi' 'aua'axatema nagui ca 'arhuennataxac dam senataxanaqtapeguec maye, 'eeta': ¿Ỹaỹamaqchiguiñi peta'a da sesheetenaq ñim lta'a na nta'alpi maye netaña ye Roma qalqo' saishet?

18Qalaxaye So Jesús ỹaỹaten dam qauem 'eetapeguec somayepi. Nache 'enapega, 'eeta':

–Qami' maye qoñiitega da qami' 'eesora, ¿ta'ainco' ye Aỹem qavi'iguiñiitac? 19Ñaq Aỹem qauachaxañiỹa qome acam anom lcatole maye qaisheetenaxana da qaisheeten ca nta'a.

Nache qandoua'a aso 'oonole anom maye chegaqaigui na lcat plata, 20nache So Jesús inat somayepi, 'eeta':

–¿Negue't lashec ñim huetalec ana'ana lcatole? Qataq ¿negue't le'enaxat yem nanettalec?

21Nache somayepi 'eeta':

–Qomye nacheñi ñi lta'a na nta'alpi maye netaña ye Roma.

Nache So Jesús 'enapeco':

–Qaỹa'añim qome ñim lta'a na nta'alpi cam lalamaxat ñimaye, qaq Ñim Lo'onatac 'Enauacna qalaq qaỹa'añim cam maiche lalamaxat nataqa'en.

22Qaq co'ollaq hua'aqchigui de'era so chegaqaigui na fariseopi, nache somayepi ỹataqta huo'o da la'aalaxa, nache jec.

So saduceopi detaqtague' So Jesús

(Marcos 12.18-27; Lucas 20.27-40)

23Qaq nacheso se'eso na'a'q huo'o so ỹalectaigui na saduceopi da nqo'oneua'a So Jesús. Cha'aye namayepi sa ỹa'amaqten da qaltaq qanca'alaxatec na leuaxaicpi, 24nache somayepi inattac So Jesús, 'eeta':

–'Am Napaxaguenataxanaq, so Moisés co'ollaxa 'enapec da huo'otaq huo'o ca ỹale da huaron, qaq da ivita da ileu da huo'otaq qaica ca llalec, nache ca lqaỹa ishet da qaltaq huaroneguet aca llo'oxoua, da yaqto' huo'o naqa'en ca llalec som lqaỹa maye saqca, yaqto' saishet da deqat da le'enaxat.

25Qaq ne'ena souaqta'a huo'oi co'ollaxa soua siete nqaỹa't. So nqaỹa ỹe huaron, qaq co'ollaq qaỹata'ague nache ileu, qalaxaye saxanaqca ca llalec. Nache aso lhua somaye no'ona'aguet so lqaỹa na'asa, ime nache huaroneguet asomaye. 26Qalaxaye nache 'ena'am co'ollaq qaỹata'ague nache nataqa'en ileu somaye, qalaxaye nataqa'en qaica ca llalec. Qataq jec so lỹa lqaỹa. Nache queto'ot de'era, choche ivitta'a som pa'atec se'esoua siete nqaỹa't. 27Qaq co'ollaq mashe nmichiyiñi 'enauaque soomaye, nache pa'atec da ileu asa'aso 'alo.

28Qaq da ivita da qaltaq qanca'alaxatec na leuaxaicpi, nache ¿chaq negue't ca ỹoqta lhua se'esoua siete nqaỹa't asa'aso 'alo ye 'enauaque soomaye huaroneguet asomaye?

29Nache So Jesús 'enapeco':

–Qami' qausomiỹapec, cha'aye saishet da qauaỹachiñi' naua ñiyigui'she maye nanettaleguete ana nere maye huetalec na la'aqtacpi Ñim Lo'onatac 'Enauacna, qataq da la'añaxac Ñimaye. 30Cha'aye qom ivita da qaltaq qanca'alaxatec na leuaxaicpi, nache saishet da huo'o ca huaron, cha'aye namayepi 'eeta'am na lamaxashecpi Ñim Lo'onatac 'Enauacna. 31Qaq de'era lataxac qom qaltaq nca'alec na leuaxaicpi, qalaq qami' iuen da qautaxaỹaxañi ana nere maye huetalec na la'aqtacpi Ñim Lo'onatac 'Enauacna maye, 'eeta': 32«Aỹem maye Nachaỹem Natameetacot so Abraham, Isaac qataq so Jacob.» Qaq saishet da Natameetacot Ñimaye na leuaxaicpi, nachaqnata nam nca'altauecpi, cha'aye Ñimaye 'enauac nca'altauec naqa'en na shiỹaxauapi.#22.32 So Jesús ỹa'axat soua Abraham, Isaac qataq so Jacob da soomaye ỹo'oxoreeta'ape Ñim Lo'onatac 'Enauacna nache nataqa'en ña nca'altraue'c, cha'aye Ñimaye natameetacot na nca'altauecpi.

33Qaq co'ollaq hua'aqchigui de'era so shiỹaxauapi, nache ỹataqta huo'o da la'aalaxa naua lapaxaguenataxanaxaco So Jesús.

Da namaxasoxonaxac maye ỹactec da la'amaqche'c

(Marcos 12.28-34)

34Qaq so fariseopi co'ollaq ỹaỹaten da So Jesús na'axaỹaxaataiya' naqa'en so saduceopi, nache so fariseopi lapona't da detaxaỹapega't da qanqo'ona So Jesús. 35Nache huo'o so 'oonolec somayepi som ỹaỹaten na namaxasoxonaxacpi maye quetalec so judiopi, ỹe'eguen So Jesús, nache inat, 'eeta':

36–'Am Napaxaguenataxanaq, ¿chaq negue't ca ỹoqta ỹactec da qaỹalaxalec nam namaxasoxonaxacpi?

37-38Nache So Jesús 'enapeco':

–Da hua'auchiguiñi namaxasoxonaxac qataq ỹactec da la'amaqchec, 'eeta': «Ỹataqta 'auauotec Ñim Lo'onatac 'Enauacna, imauec da 'arhuennataxac, qataq imauec da 'anachaalataxac.» 39Qaq da lỹa namaxasoxonaxac maye 'ena'am so hua'auchiguiñi da la'amaqchec, 'eeta': «Ñi 'oonolec iuen da ỹauotec ca lỹa, 'eeta'am naqa'en da lauotaxanaqtaic da maiche nachaalataxac.»

40Qaq ne'enaua dos namaxasoxonaxaco, nachenaua naua na'attaleguete 'enauac nam laỹepi namaxasoxonaxacpi maye ỹiyiñi so Moisés.

¿Negue't cam chegoxoguet cam Lca'aguishec Ñim Lo'onatac 'Enauacna?

(Marcos 12.35-37; Lucas 20.41-44)

41Qaq co'ollaq ña lapoota'a't so fariseopi, nache So Jesús inat somayepi, 'eeta':

42–¿Negue't ca chegoxoguet cam Lca'aguishec Ñim Lo'onatac 'Enauacna? ¿Chaq negue't llalec camaxa?

Nache somayepi 'enapeco':

–Qomye camaye chegoxoguet so nta'a David.

43-45Nache So Jesús 'eeta':

–So David co'ollaq ỹachegoxotchigui da ltaunaxanaxac So Saqcha'a Na'añaxac Qui'itta so lerec, 'eeta':

«Ñim Lo'onatac 'Enauacna 'enapega ñi Ỹataxala'

maye Lca'aguishec, 'eeta':

‹'Anso'oota'ague qome da aỹoic,

nato' qom mashe ñauec 'enauac nam 'am ipa'agueetacpi.›»

Ñaq Aỹem qaua'aqtaxañim: Da so nta'a David iỹaxana da Lataxala' So Lca'aguishec Ñim Lo'onatac 'Enauacna, qaq ¿ca 'eeteco' qone' da ca Lca'aguishec Ñim Lo'onatac 'Enauacna da chegoxoguet so David? ¡Ye so David ỹamata'ac da saq 'ena'am da la'amaqchec!

46Nache saishet da huo'o ca choche 'oonolec somayepi da ỹasateguet So Jesús. Nache chegoqchiguiña se'eso na'a'q da saishet da huo'o ca qaltaq inattac Somaye.

Currently Selected:

Mateo 22: LÑLE13

Highlight

Copy