Juan 9

So Jesús nataren so ỹale maye nacteueegue' da lqanamaxa

1Qaq co'ollaq jec So Jesús, nache natenalec so ỹale maye nacteueegue' da lqanamaxa. 2Nache soua lapaxaguenataqa inatta'ape Somaye, 'eeta':

–'Am Napaxaguenataxanaq, ¿chaq ta'ainco' ñi'iñi ỹale ye nacteueegue' da lqanamaxa? ¿Peta'a souaxat da huo'o ca lasouaxashe't caua lta'al, qalqo' chaq souaxat ca maiche lasouaxashet ñimaye?

3Nache So Jesús 'enapegalo soomaye, 'eeta':

–Saishet da chegoqchigui ca maiche lasouaxashet ñimaye, huo'otaq ca lasouaxashe't caua lta'al. Cha'aye damaye, nache qoỹena'ac, yaqto' ishet da qaila'a cam ỹo'ot Ñim Lo'onatac 'Enauacna da chegoqchigui ñimaye. 4Cha'aye nagui da ñaq qami' soota'agueta, nache iuen da so'otaq da lo'onataxanaxac maye Aỹem ỹamaxalec Ñim Lo'onatac 'Enauacna maye Ita'a; qalaxaye anata ca na'a'q maye qaica ca ishet da do'onataxan. 5Nagui da Aỹem ñaq soota'a ana 'alhua, qalaq Aỹem maye Nachaỹem lcoỹaraqte 'enauac ana 'alhua.

6Qaq co'ollaq ime da 'enapec de'era, nache So Jesús nqaigoxoña na 'alhua, nache ỹo'ot so nshaxa, ime, nache ỹa'ameeleguete naua la'ai'te som qanamaic. 7Nache 'enapega somaye, 'eeta':

–'Aue qome, 'anỹo, 'anqo'onaxaama añi laỹe' na 'etaxat le'enaxat Siloé.#9.7 Siloé: Na arameo la'aqtac de'era ne'enaxat, damaye naigui da namaxashec.

Nache se'eso qanamaic jec da nỹo. Qaq co'ollaq ñe'eguelaq, nache nauaachiguiñi. 8Nache nam lauoreuapi qataq nam ỹauaachigui somaye co'ollaxa da dashelaxaatac naxa, namayepi 'eeta':

–¿Saisheto' peta'a da nachera de'era dam nso'ootañecnaxa da dashelaxaatac?

9Nache huo'o na 'eeta':

–Aja', nachera.

Qataq huo'o na 'eeta':

–'A'i, saishet, damaye choche lashiquiaxaua.

Qalaxaye som ỹale maiche na'aqtaxaala't, 'eeta':

–Aja', nachaỹem.

10Nache somayepi inattac somaye, 'eeta':

–¿Hua'ago' ca 'eetec da 'am ishet da 'anauaañi?

11Nache somaye 'enapeco':

–Som ỹale maye le'enaxat Jesús, Somaye ỹo'ot so nshaxa. Ime, qaq ỹa'ameeleguete naua ỹa'ai'te. Nache Aỹem 'enapega, 'eeta': «'Anqo'onaxaama qome añi laỹe' na 'etaxat, le'enaxat Siloé, nache 'anỹo.» Nache Aỹem ashec, qaq can ime da ñeỹo, nache ishet da ñauaañi.

12Nache somayepi inattac somaye, 'eeta':

–¿Hua'ague ca hueta'ague que'eca ỹale?

Nache somaye 'enapeco':

–Aque'.

Na fariseopi ichemaxattac so qanamaic maye qanataren

13Nache qaỹauegueua'a na fariseopi se'eso ỹale maye qanamaic co'ollaxa. 14Cha'aye souaxat da mataxaqui se'eso na'a'q maye huetoigui da ỹo'ot so nshaxa So Jesús da nataren se'eso qanamaic, 15nache na fariseopi qaltaq ỹe'eguelaxalec da inattac so ỹale chaq hua'ague ca 'eetec da ishet da nauaañi. Nache somaye 'enapeco':

–Somaye ỹa'ameeleguete naua ỹa'ai'te so nshaxa. Ime, nache ñeỹo, nache nagui ishet da ñauaañi.

16Nache se'eso fariseopi 'eeta':

–Se'eso ỹale maye ỹo'ot de'era, Somaye saishet da chegoqtot Ñim Lo'onatac 'Enauacna, cha'aye saishet da huo'o ca ỹanaigui ye na'a'q mataxaqui.

Qalaxaye huo'o na 'eeta':

–¿Hua'ago' ca 'eetec da ishet da ỹo'ot de'era na'anec maye sa qaỹauanapega, da huo'otaq Somaye 'etaxaloxoic?

Huaña, nache colaxagui da lhuennataxac se'eso shiỹaxauapi. 17Nache somayepi ỹe'eguelaxalec da inattac se'eso ỹale maye qanamaic co'ollaxa, 'eeta':

–Qaq 'am, ¿hua'ague ca 'eetec ca 'ara'aqtac som ỹale maye 'anauaañi naqa'en?

Nache somaye 'enapeco':

–Qomye aỹem, Somaye 'eeta'am ñaqa'en da la'aqtaxanaxanec Ñim Lo'onatac 'Enauacna.

18Qalaxaye nam fariseopi saishet da ỹa'amaqten se'eso ỹale da sanauaañi co'ollaxa, qaq nagui nauaachiguiñi. Nache qaiỹaxaneugalo soua lta'al somaye, 19nache qainatta'ape qoỹeeta':

–¿Peta'a nachera da qaỹa'alqui de'era? ¿'Eesa peta'a da nacteueegue' da sanauaañi damaye? Qaq, ¿chaq hua'ague ca 'eetec damaye da ishet da nauaañi nagui?

20Nache soua lta'al 'ena'apo':

–Qomi' saỹaanaq damaye, da nachera da qoyalec maye nacteueegue' da sanauaañi. 21Qalaxaye qomi' saishet da saỹaanaq chaq hua'ague ca 'eetec da nauaañi nagui, qataq saishet da saỹaanaq chaq negue't cam natare'n naua la'ai'te damaye. Qaq no'on da maiche qaunache, cha'aye damaye mashe ỹe, damaye ishet da maiche qami' da'aqtaxanema.

22Qaq 'enapec de'era soua lta'al, souaxat da ñe'etrega na lataxala'pi na judiopi, cha'aye namayepi mashe nasachigui da saishet da ỹalegoigui naqa'en nam tategueua'a aso napaxaguenaxaqui nam judiopi, 'enauac nam ỹa'amaqten qataq 'eetega da So Jesús, nacheso So Lca'aguishec Ñim Lo'onatac 'Enauacna. 23Qaq ỹoqo'oye, soua lta'al 'ena'apo': «Qaunache damaye, cha'aye damaye mashe ỹe.»

24Nache na lataxala'pi na judiopi, qaltaq ỹe'eguelaxalec da iỹaxaneuga so ỹale maye qanamaic co'ollaxa. Nache 'eetega, 'eeta':

–Nagui qomi' 'aua'aqtaxaatema cam ỹataqta 'eesa, ỹauaachigui 'anqa'en Ñim Lo'onatac 'Enauacna. Cha'aye qomi' saỹaanaqta da se'eso ỹale, Somaye 'etaxaloxoic.

25Nache somaye 'enapeco':

–Aỹem saishet da saỹaten da Somaye 'etaxaloxoic. Nachaqrata da aỹem saỹaten da sa ñauaañi co'ollaxa, qalaxaye nagui nache ñauaachiguiñi.

26Qaq somayepi qaltaq ỹe'eguelaxalec da inattac, 'eeta':

–¿Ca 'eetec Somaye co'ollaxa? Qataq ¿chaq 'eetec co'ollaq da 'am nataren?

27Nache somaye 'enapeco':

–Mashe ime mque' da qami' sa'axattapeguema, qalaq saishet da aỹem qaua'amaqchiñi. Qalaq ¿ta'ainco' ye qansheetaique da qaltaq qami' sa'aqtaxanema? ¿Qalqo' nataqa'en qami' qansheetaique da qoquiigue Somaye?

28Nache somayepi ỹe'enai' somaye, nache 'eetega, 'eeta':

–'Am peta'a qoquetague' se'eso ỹale; qomi', qalaxaye qolaqtague' so Moisés. 29Cha'aye qomi' saỹaanaqta da Ñim Lo'onatac 'Enauacna, detaqtague' co'ollaxa so Moisés. Qaq se'eso ỹale, qomi' saishet da saỹaanaq cam chegaqa'ague.

30Nache se'eso ỹale 'enapeco':

–¡Ỹataqta ỹoxosa'a de'era! ¡Qache qami' saishet da qauaỹaañi ca chegaqa'ague Somaye! ¡Qalaq Somaye ye isheto' da aỹem nataren! 31Qomi' saỹaanaqta da Ñim Lo'onatac 'Enauacna saishet da hua'axaỹa na 'etaxaloxoicpi; chaqnata nam ỹo'oxoreetac qataq ỹo'ot cam 'eetapeguec Ñimaye. 32Cha'aye ỹataqta sa ỹauano' da huo'o ca qaỹa'axaỹapeguelec da huo'otaq nauaañi naqa'en ca shiỹaxaua da huo'otaq nacteueegue' da sanauaañi. 33Qaq se'eso ỹale, da huo'otaq saq chegoqtot Ñim Lo'onatac 'Enauacna, nache saishettaxa da huo'o ca ỹo'otec aỹem.

34Nache somayepi 'enapego' somaye, 'eeta':

–'Am maye ỹataqta 'ananacteueegue' da 'am 'etaxaloxoic, ¿qaq huotaique da qomi' 'auapaxague'n?

'Am mashe sa 'am seuenaq da 'aualectaigui nam nategueua'a ana qanapaxaguenaxaqui.

Da nqanamaxa maye saqcha'a

35Qaq So Jesús la'axaỹaxac da qaỹamaqauec som qanamaic co'ollaxa. Nache nmitaique, qaq co'ollaq nauane', nache 'eetega, 'eeta':

–¿'Am peta'a 'aua'amaqten So Llalec Ñim Lo'onatac 'Enauacna?

36Nache somaye 'enapeco':

–Ñaq aỹem 'aua'aqtaxanem chaq negue't camaxa, yaqto' ishet da sa'amaqten camaye.

37Nache So Jesús 'enapeco':

–Mashe sogote da 'auloto'ot Namaye. Nachaỹem, maye Aỹem 'autaqtague'.

38Nache se'eso ỹale ỹa'aroto naua l-llectel So Jesús, nache 'enapega, 'eeta':

–'Am Ỹataxala', 'am sa'amaqten.

39Ime, nache So Jesús 'enapeco':

–Aỹem ñanaỹa ana 'alhua, da sami' da nauaañi nam saq nauaañipi, qaq nam 'eetega da nauaachiguiñipi qalaq sanauaañi ñaqa'en. Qaq 'era da sheetec da ñimit 'enauacna.

40Qaq huo'oi soua chegoqraigui na fariseopi maye hueta'a yi'iye hua'aqchigui de'era, nache inattac So Jesús, 'eeta':

–¿Damaye peta'a naigui nataqa'en da saishet da ñauanaxañi?

41Nache So Jesús 'enapegalo' soomaye 'eeta':

–Qami'ctaxa da qanauattoñeetela't da sa qanauañiiñi, nache qaicactaxa ca qarasouaxashechi. Qalaxaye qami' ye qoñiitega da qanauañiichiguiñi, qaq ỹoqo'oye Ñim Lo'onatac 'Enauacna qami' ỹasaxaleguete da qarasouaxashechi.

Currently Selected:

Juan 9: LÑLE13

Highlight

Copy