Oseas 4
4
Ñim Nataxala' dataỹa'aguet na Israel le'ecpi
1Qami' Israel le'ecpi, ña qana'axaỹañiỹa
da la'aqtac Ñim Nataxala',
cha'aye Ñimaye npa'aguene'
nam netalecpi ne'ena 'alhua,
cha'aye namayepi mashe qaica ca 'eesa,
qataq qaica ca lchoxonnataxanaxa,
qataq mashe saỹauatton
Ñim Lo'onatac 'Enauacna.
2Nacherata da ỹapacauec
na saq 'en maye ỹan la'aqtacpi,
qataq da latenataxanaxac,
lalaataxanaxac, lcachaxac,
qataq da lauatapiguiñi' ana sa lhua,
qataq da qaica ca iren.
3Ỹoqo'oye ne'ena 'alhua huo'o qome da nasouaxac,
nache qaica ca la'añaxac
'enauac nam netalecpi namaye,
qataq nataqa'en ileu qome na huauec shiguiỹacpi,
qataq na maỹopi maye hueto'ot na piguem,
qataq na nỹaqpi maye huetangui aso auaxai.
4¡Qaq nache qaica qome ca nhuogaxa
ca lỹa huo'otaq da ỹauo'o ca lasouaxashet!
Cha'aye Aỹem, nachecata
ca ntaxaỹaxanaxanec da lasouaxashet ñaqa'en de'era.
5Nache 'am qouañi qome,
qouaigui ca na'a'q, qataq ca pe,
nache qocañi' ca na'aqtaxanaxanec
da qouañi qataq ñelaxaañi aca 'arate'e.
6Qaq cha'aye nam ỹalamaxat
nhuo' le'ecpi qaica ca lauattonaxanaxac
ỹoqo'oye ishet da nlaguiñi.
Qaq 'am souaxat da sa 'auaconeguet
de'era nauattonaxanaxac,
nache ñeqat da 'am ỹa'aqtaxanaxanec.
Qataq cha'aye 'aucoua'ai
na lqataxacpi Ñim 'Anatamnaxala',
nache Aỹem nataqa'en secoua'ai qome nam 'aỹa'alaqpi.
7Qataq co'ollaq nquictauec
da qalota nam ntaxaỹaxanaxanecpi,
nache nataqa'en ỹataqta nquictauec
nam aỹem hueto'ot lasouaxashetpi,
ỹoqo'oye da llo'oxoyec namayepi,
nmeneguet qome ñaqa'en da qaica
ca la'amaqchec namayepi.
8Qataq ỹachegoxottapigui
na lasouaxashetpi nam ỹalamaxat nhuo' le'ecpi
da lquia'axac namayepi,
ỹoqo'oye ỹayeeta'a da nache ỹo'ottac
na qauem nam shiỹaxauapi maye ỹalamaxatpi.
9Qaq ne'ena nhuo' le'ecpi,
nache 'eeta'am ñaqa'en qome
na ntaxaỹaxanaxanecpi,
da sauo'o ca nhuaxanaguec,
souaxat dam qauem lataxac namayepi.
10Qaq na'aictaxa qome da sa qoue
da lquia'axac qalaxaye saishet da icoma',
qataq da ỹapacauec da lquisheguetaxac,
qalaxaye qaica qome ca llalec,
souaxat da ca'ai Ñim Nataxala'.
Na ne'enaqtacpi maye natameetacot na Israel le'ecpi
11De'era quisheguetaxac
qataq na lataxa, ỹo'ot da deqat
da no'on nataxac.
12Na ỹalamaxat nhuo' le'ecpi,
inattac nam natamnaxala'pi 'epaq,
qaq ne'ena 'epaqpi ỹasateguet
namayepi nache ỹaueeguet
da lquisheguetaxac,
qataq ca'ai Ñim Nataxala'
souaxat de'era lquisheguetaxac.
13Qataq tasheguema na pa'asheguem
ana qasoxonaxapi, qataq
ana lcomaraxalatepi,
da ỹo'ot nam lachetaqtaxanaxatpi,
qataq da ỹavigaxat na lchenaxanaxatpi,
qataq huo'ot naqa'en na lpaqal ana
qo'oipaqpi rooblepi, 'aalamopi
qataq ana enciinapi.
Qaq ỹoqo'oye ana llalepi ncogagui
qome da lquisheguetaxac,
qataq ana latelpi lauatapiguiñi'
qome nam sa lhuapi.
14Qalaxaye Aỹem saishet qome
da sauo'o ca nhuaxanaguec
ana llalepi souaxat da lquisheguetaxac,
qataq ana latelpi souaxat
da lauatapiguiñi' nam sa lhuapi,
cha'aye maichena namayepi
da nquishestague' ana quisheguetaxaipi
qataq da ỹo'ot ana lachetaqtaxanaqtepi,
nache nquisheshigui da la'amqaanataxanaxac.
Qaq 'era da 'eetec na nhuo' le'ecpi,
da taỹañecra souaxat da qaica ca laỹaanataxanaxac.
15Qaq 'am Israel, da 'anquishishi,
qaq no'on da saishet da ivira'a ye Judá,
da huo'o ca lasouaxashet.
Qaq saishet qome da qanqo'oñiỹa ye Gilgal,
qataq da qa'aisheguema ye Bet Avén,
qataq da qaỹa'añi ca qara'aqtaqui da qoñeeta':
«Nca'altauec Ñim Nataxala'.»
16Cha'aye na Israel, 'eeta'am aca
huegaqai huaca llale.
Qaq ¿peta'a isheto' da ilo'ogue Ñim Nataxala',
da 'eeta'am naqa'en ca qagueta llalaqpi
da huaña ca no'on 'auaqpisat?
17Qaq na Efraín ye ỹataqta nañaneguet
da ỹa'amaqten nam ne'enaqtacpi.
Qaq qaua'aqaita'a qome.
18Cha'aye 'enauac namayepi da taxaicpi,
nache taỹa da nquisheguetaxac,
qataq nam lataxala'pi namayepi
ỹauotec nam ỹo'ot da ncoxo.
19Ỹoqo'oye anac qome ca la'at,
nache ỹache namayepi,
nache huo'o qome da la'agaxa souaxat da natameetacot
nam saq 'en atamnaxala'pi.
Currently Selected:
Oseas 4: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
