Génesis 8

Co'ollaq vi'iiguet so auot lta'araic

1Qaq huaña, nache Ñim Lo'onatac 'Enauacna tachigui lauel so Noé, qataq 'enauac so shiguiỹacpi maye nqotta'ai' somaye aso notaxaqui. Nache ỹo'ot da so la'at ỹasheerelec ana 'alhua, nache so 'etaxat nquiguiñi, 2qataq napogui na lliguisheguempi so 'etaxat maye chegaqangui aso qaỹoqchiguingui auaxai, qataq nataqa'en napogui na llecpi na 'etaxat na piguem. Qaq co'ollaq vi'iiguet so auot, 3nache nquictañi so 'etaxat. Qaq co'ollaq ivi' soua ciento cincuenta na'axa'te, nache so 'etaxat nquictañi, 4qaq so na'a'q diecisiete so ca'agoxoic siete, nache aso notaxaqui vi'iiguet netalec aso qasoxonaxa ye Ararat. 5Qaq so 'etaxat ñaq queta co'ollaxa da nquictañi, qaq som la'auaxanec na'a'q som ca'agoxoic diez, nache mashe ishet da qaila'a asom qaỹoqotcheguemec qasoxonaxapi.

6Qaq co'ollaq inoxoorec soua cuarenta na'axa'te, nache so Noé ỹauatoigui so nalloxoqui asom lo'onata notaxaqui, 7qaq huaña nache ỹachaxanec so teguesan, qalaxaye so teguesan coleetac co'ollaxa da huaỹotac, iuatta'a da deqaqa ana 'alhua. 8Qaq so Noé, co'ollaq ime da ỹachaxanec so teguesan, nache qaltaq ỹachaxanec so qoto', da yaqto' ỹaỹaten da huo'otaq mashe deqaqa ana 'alhua, 9qalaxaye so qoto' ỹe'eguelaxaua'a co'ollaxa aso notaxaqui, cha'aye saishet da ỹanata ca huaña da nmatec, cha'aye ana 'alhua ñaq nlaqtelec co'ollaxa na 'etaxat, nache so Noé, ỹauota'a na lhuaq da ỹaconeuga so qoto', nache inoxonaqchetoigui aso notaxaqui.

10Qaq so Noé, qaltaq iuata'a co'ollaxa da inoxoorec soua siete na'axa'te, nache qaltaq ỹachaxanec so qoto'. 11Qaq mashe napaltapiguiñi co'ollaq ivireuo so qoto', ỹachetauo aso laue aso qo'oipaq olivo ỹaatagui na nashep. Qaq huaña, nache so Noé ỹaỹaten da mashe 'emñi so 'etaxat ana 'alhua. 12Qaq so Noé, qaltaq iuata'a da inoxoorec soua lỹa't siete na'axa'te, nache qaltaq ỹamaq co'ollaxa so qoto'. Qalaxaye huaña nache so qoto' saishet da ỹe'eguelaq.

13Qaq so Noé co'ollaq ivi' soua seiscientos un vi'iye, nache daqaqtelec ana 'alhua. Qaq huetoigui co'ollaxa so la'auaxanec na'a'q, so la'auaxanec ca'agoxoic, da so Noé nqat so lapo' aso notaxaqui, qaq huaña nache ila'a da ana 'alhua mashe daqaqtelec. 14Qaq so na'a'q veintisiete so lỹa ca'agoxoic, nache ana 'alhua mashe ỹoqta daqaqtelec. 15Qaq huaña, nache Ñim Lo'onatac 'Enauacna 'enapega so Noé, 'eeta':

16«'Aunoteeguesop ana notaxaqui, nache 'arỹatec añi 'arhua, 'aỹa'alqa qataq ñeua 'aratel. 17'Anqatec nataqa'en, 'enauac na shiguiỹacpi maye 'anqotta'ai': maỹopi, qataq na shiguiỹacpi nlopi, qataq nam hualectapigui'pi, yaqto' talec 'enauac ana 'alhua, qataq da yaqto' huo'o ca qalota llalaqpi, nache nlaxattelec anamaye.»

18Qaq huaña, nache so Noé qataq aso lhua, qataq soua llalqa, qataq soua latel huenotreeguesop aso notaxaqui. 19Qaq nataqa'en huenotec 'enauac so shiguiỹacpi nlopi, qataq so huauecpi, qataq som hualectapigui'pi, qataq so huaỹotacpi. 20Qaq ime co'ollaxa, nache so Noé ỹo'ot aso lca'atoxonaxalate, da yaqto' ỹo'oxoren Ñim Nataxala', nache ỹaconeua'a so shiguiỹacpi qataq so maỹopi maye qui'itta, ỹacootaua'a ñi 'oonolec se'eso ỹotta'a'tpi, nache ỹavigaxat ỹauo'o lachetaqtaxanaqte da ỹanot Ñim Nataxala'. 21Qaq co'ollaq ivirot Ñim Nataxala', dam ỹataqta ama laitaỹaxac, nache 'enapeco':

«Saishet qome da qaltaq she'eguelaxalec da sasaxalec ca qauem ỹa'aqtac ana 'alhua, souaxat nam qauem maye ỹo'otpi na shiỹaxauapi, cha'aye namayepi nache nacta'ai' co'ollaxa da iuennatega da ỹo'ot da qauem. Qataq nataqa'en saishet qome da qaltaq she'eguelaxa da ñelaxaañi 'enauac na shiguiỹacpi, da 'eeta'am de'era so'ot nagui.

22Qom ñaqauo'o ana 'alhua,

nache saishet qome da saqca ca nanaxanaxac, qataq ca nqataxanaxac;

qataq huo'oi qome naua nta'api qataq naua latomaxaye,

qataq huo'o qome ca no'omaxa qataq napaxaỹaxa, qataq na'axa'te qataq pe'.»

Currently Selected:

Génesis 8: LÑLE13

Highlight

Copy