Génesis 6

Da lasouaxashet na shiỹaxauapi

1Qaq so shiỹaxauapi co'ollaq mashe naleguete naua 'aleu' ana 'alhua, qataq mashe huo'o so llalpi 'alpi, 2nache som llalaqpi Ñim Lo'onatac 'Enauacna, ila'a co'ollaxa da se'eso 'alpi ỹataqta 'onaxaipi, nache lca'agui asomayepi, nache huaroneguet anam ỹataqta lauela. 3Qalaxaye Ñim Nataxala' 'enapeco': «Saishet da sa'aqta'a ca shiỹaxaua da nache 'eetai' da nca'altauec, cha'aye camaye choche lapat. Qaq ỹoqo'oye sanem qome da ivi' caua ciento veinte vi'iye da nachaalataxac.»

4Qaq huo'o co'ollaxa so logoraicpi shiỹaxauapi ana 'alhua, qataq co'ollaq so llalaqpi Ñim Lo'onatac 'Enauacna, huaroneguet aso llalpi so shiỹaxauapi, da yaqto' huo'o ca llalaqpi. Qaq somayepi nacheso som ỹataqta ỹo'oxoraicpi, qataq 'añaxaicpi soua hua'au' vi'iye.

5Qaq Ñim Nataxala' ila'a co'ollaxa da so shiỹaxauapi ana 'alhua ỹapacauec da ỹo'ottac na qauem, qataq da nache lhuennataxac da ỹo'ottac na qauem, 6nache ỹataqta huo'o da nqui'ic souaxat da ỹo'ot co'ollaxa so shiỹaxaua. 7Nache 'enapeco':

«Sapalaxat qome na shiỹaxauapi maye ỹo'onatacpi maye netalec ana 'alhua, qataq nataqa'en na shiguiỹacpi nlopi, qataq na shiguiỹacpi maye hualectapigui', qataq na maỹopi. ¡Aỹem ỹataqta huo'o da ñequi'ic souaxat da so'ot co'ollaxa namayepi!»

8Qalaxaye Ñim Nataxala' nachesota so Noé da ỹaỹamaxareeta co'ollaxa.

So Noé ỹa'ara't aso nnotaxaqui

9Qaq 'era da na'aqtaguec so Noé.

So Noé ỹataqta no'on da lataxac, qataq ỹataqta ỹalaxaleguet Ñim Lo'onatac 'Enauacna. Co'ollaq ỹalectaigui so shiỹaxauapi, qaq nachesota somaye da ỹo'ottac nam 'eetapeguec Ñim Lo'onatac 'Enauacna. 10Qaq so Noé huo'oi co'ollaxa soua tres llalqa, qaq nachesoua so Sem, Cam qataq Jafet.

11Qaq Ñim Lo'onatac 'Enauacna, ila'a co'ollaxa da ana 'alhua ỹataqta nlaqtelec na qauem qataq da loquiaxac, 12cha'aye 'enauac so shiỹaxauapi da qauemaicpi. Qaq Ñim Lo'onatac 'Enauacna co'ollaq ila'a da nlaqtelec na qauem ana 'alhua, 13nache 'enapego' so Noé, 'eeta':

«Mashe iuennataxac da imeuo ñaqa'en 'enauac na shiỹaxauapi. Cha'aye souaxat na lasouaxashetpi namayepi, nache ana 'alhua ỹataqta qalota da loquiaxac, qaq ỹoqo'oye ñelaxaañi qome namayepi, qataq 'enauac ana 'alhua. 14Qaq ỹoqo'oye 'aua'ara't qome aca 'annotaxaqui, 'auo'onataxana ana qo'oipaq maye huo'o na lcha'q. Qataq 'auauo'oi caua ndaqa'ate na pa'auo acamaye, qataq 'auapogui 'enauac na lpoxoỹaxa acamaye, na pa'auo qataq na pa'auec 'auapoxona na qo'oipaq lcha'q, yaqto' saishet da inoxoneuo na 'etaxat. 15Qaq qom 'auo'ot aca 'annotaxaqui, nache acamaye 'enaua naua laloqnaqa'ate: ciento treinta y cinco metros ye lalogaxa, qataq veintidós metros y medio ye lcateueegue, qataq trece metros y medio ye lshequitcheguemegue. 16'Auauota'a tres qome caua nỹaqa ỹashiquitcheregue'm, qataq 'auauo'o ca nalloxoqui ca pa'atcheguem nỹec, qataq 'auauo'o ca 'oonolec lasom naua'a 'anqa'en na laỹe. 17Cha'aye Aỹem ñamaq qome ca auot da ipaxaalec ana 'alhua, nache nlaxaañi qome 'enauac nam huo'o da lca'alaxa maye netalec 'enauac na pa'aiguelo ana 'alhua. Qaq 'enauac qome nam huetalec ana 'alhua ileu. 18Qalaxaye Aỹem, 'am ñaỹamaxate' qome, qaq aca 'annotaxaqui inoxooroigui qome naua 'aỹa'alqa, 'arhua, 'aratel qataq 'am. 19Qaq nataqa'en inoxonoigui 'anqa'en qome aca'aca notaxaqui ca ỹale qataq aca 'alo, nam shiguiỹacpi maye netalec ana 'alhua, yaqto' nca'alec qome, 'eeta'am 'am. 20Qaq 'arỹateuo qome da 'aunoxonoigui aca'aca notaxaqui, caua dosta'ape na ỹotta'a't shiguiỹacpi maye netalec ana 'alhua: Nam maỹopi qataq na shiguiỹacpi maye nlopi, qataq nam hualectapigui', da yaqto' nache queta da nca'altauec. 21Qataq nataqa'en 'alaỹona't qome 'enauac na ỹotta'a't nallecpi, nache 'auaỹamaxat, yaqto' 'am qataq cam shiguiỹacpi huo'o ca aloq.»

22Qaq so Noé ỹo'ot co'ollaxa 'enauac nam ỹamaxalec Ñim Lo'onatac 'Enauacna.

Currently Selected:

Génesis 6: LÑLE13

Highlight

Copy