Génesis 48

So Jacob ỹaalec da lchoxonnataxanaxa so Efraín qataq so Manasés

1Qaq co'ollaq qaỹata'ague de'era, nache qaỹa'aqtaxanem so José da so lta'a ỹataqta sa no'on. Huaña nache so José jec da nqo'ona somaye, nache ỹaue'c soua dos llalqa Manasés qataq so Efraín. 2Qaq co'ollaq qaỹa'aqtaxanem so Jacob da so llalec José naỹa'a somaye, nache so Jacob na'añaxatsheguem da nso'oolec so lmala'. 3Nache 'enapega so José, 'eeta':

«Ñim Lo'onatac 'Enauacna maye Qaica ca Ỹaqalanapec, aỹem nachaxana co'ollaq huaña ye huaqta'a't nỹecpi ye Luz yem huetaigui ye 'alhua Canaán, nache aỹem ỹaalec da lchoxonnataxanaxa, 4qaq 'eeta' da la'aqtac: ‹Aỹem 'am sanem qome da ỹataqta qalota ca 'aỹa'alaqpi, qataq cam 'am chegoxoguetpi chegoqchigui qome ca ỹotta'a't shiỹaxauapi. Qaq nataqa'en que'eca 'am chegoxoguetpi sanem qome ne'ena 'alhua, nache chochaq tatec qome da lalamaxat.› 5Qaq nagui naua 'aỹa'alqa Efraín qataq Manasés, maye lañoqo't na Egipto co'ollaq saxanaxa da ñevita ne'ena 'alhua, naamaye maiche ỹalamaqa'ate ỹalqa. Naamaye ỹataqta ỹalamaqa'ate 'eeta'ama so Rubén qataq so Simeón. 6Qaq cam dalaxaic 'aỹa'alaqpi, camayepi maiche 'aralamaxatpi qome, qaq souaxat da camayepi lqaỹa't naua Efraín qataq Manasés, nache nhuanaua'a qome nam 'aralamaxatpi. 7Cha'aye co'ollaq ye'eguelaq da sachegoqta'a ye Padán Aram, nache ileu aye 'arate'e Raquel huaña ye 'alhua Canaán, co'ollaq mashe ñayeeta'a ye Efrata. Qaq nache selayiña yemaye, sacheteua'a na laỹe so nqa'aic maye taỹa'a ye Efrata, yem nagui le'enaxat da Belén.»

8Nache so Israel co'ollaq ila'alo soua llalqa so José, nache inat, 'eeta':

«Qaq de'eraua, ¿negue't daua?»

9Nache so José 'enapeco':

«Qomye maiche ỹalqa maye aỹem ỹanema Ñim Lo'onatac 'Enauacna huaña nam soota'a Egipto.»

Qaq huaña nache so Israel 'enapeco':

«Aỹem 'anqouaguec, ñaq aỹem 'anquigaxateua'alo daamaye, yaqto' saaleguete da ichoxonnataxanaxa.»

10Qaq so Israel mashe ỹataqta ỹa'axaiqui, qataq mashe 'omalec da lmeenaxanaxac, qaq ỹoqo'oye mashe saishet da ỹoqta nauaachiguiñi. Qaq ỹoqo'oye so José nquigaxateua'alo so lta'a soua nogotolqa, nache somaye napigoxoi'salo soomaye, qataq nqapaleto. 11Qaq ime, nache 'enapega so José, 'eeta':

«Mashe sa sepettega da qaltaq 'am ñauane'. Qalaxaye Ñim Lo'onatac 'Enauacna, ỹo'ot da ñauaneto nataqa'en naua 'aỹa'alqa.»

12Nache so José nqateeguesopa soua nogotolqa naua lteltaye so lta'a, nache ỹa'alyiñi naua l-llecte, qataq iviraxata'aguet na latap na 'alhua. 13Ime, co'ollaxa nache so José ỹaconeua'alo soua dos llalqa, nache so Efraín ipa'axanegue na aloic, qaq so Manasés ipa'axanegue na ne'emaq, nache nquigaxateua'alo so lta'a. Nache so Efraín pa'ata'ague na ne'emaq so Israel, qaq so Manasés, qalaq pa'ata'ague na aloic. 14Qalaxaye so Israel co'ollaq ỹashel-leguete soomaye, nache nmena't naqa'en naua lhua'q, nache na aloiguishec lhuaq ỹashel-lec naqa'en na lqaic so Efraín som na'asa, qaq na lhuaq ne'emaxashec qalaq ỹashel-lec naqa'en na lqaic so Manasés, qaq na'aictaxa da somaye nacheso so ỹe. 15Qaq huaña nache ỹanem da no'on la'aqtac so José, 'eeta':

«Ñim Lo'onatac 'Enauacna ñim lalaxaret soua ita'al Abraham qataq so Isaac;

Ñim aỹem nteltega chegoqchiguiña so na'a'q co'ollaq sañiguiñi,

16so namaxashec maye aỹem nca'alaxateeguesop nam qauemsat,

ỹanema qome ca lchoxonnataxanaxa ne'enaua nogotolqa.

Da yaqto' chegoqchiguilo naamaye da saishet da qaicoua'ai da ỹe'enaxat,

qataq da le'enaxat soua ita'al Abraham qataq so Isaac.

Qataq ỹataqta qalota qome ca llalaqpi naamaye ana'ana 'alhua.»

17Qalaxaye so José saỹaỹamaxaren co'ollaxa da 'eetec so lta'a, souaxat da na lhuaq aloiguishec ỹashel-lec naqa'en na lqaic so Efraín. Nache ỹacona na lhuaq so lta'a da huotaique da ỹashel-lec naqa'en na lqaic so Manasés, 18qaq nache 'eetega so lta'a, 'eeta':

«¡'A'i, 'am ita'a, sa ỹaỹamaxañi da qonetec de'era! 'Ena na ỹe, qaq ỹashel-lec 'anaqa'en na 'arhuaq 'oiguishec na lqaic namaye.»

19Qalaxaye so lta'a saishet da ỹalaq, nache 'enapeco':

«¡Aỹem mashe saỹaten, 'am ỹalcolec! Namaye nataqa'en chegoxoigui qome ca qalota nhuo' le'ecpi, qataq ivira'a da 'amaqtaqaic qome. Qalaxaye na lqaỹa na'asa ỹataqta ỹacteec qome da la'amaqchec napacalec namaye, qataq cam llalaqpi nacheca ca chegoxoigui qome ca ỹotta'a't qalota shiỹaxauapi.»

20Qaq nacheso se'eso na'a'q da so Jacob ỹaaleguete da no'on la'aqtac soomaye, 'eeta':

«Na nhuo' Israel le'ecpi, do'onataxana qome da qare'enaxache da ivita da huo'o ca ỹaalec ca no'on la'aqtac, qaq 'eeta': Ñim Lo'onatac 'Enauacna 'am ỹo'otec qome dam ỹo'otec co'ollaxa so Efraín qataq so Manasés.»

Qaq 'era da 'eetec so Israel da ỹa'auaxaachiguiñi co'ollaxa so Efraín, qaq ipa'axaatec so Manasés. 21Qaq ime, nache 'enapega so José, 'eeta':

«Aỹem mashe saqaỹaloq da seleu, qalaxaye Ñim Lo'onatac 'Enauacna qami' hueta'agueta qome, qataq ỹo'ot qome da qavi'iguelaqỹa yem na'alhua som hua'au qarta'ailpi. 22Qaq 'am ỹactec da 'am sanem, napacalec dam sanema naua 'arqaỹa't, 'am sanem ye 'alhua Siquén maye iuotaxanaxat co'ollaq seloctague' na amorreo le'ecpi.»

Currently Selected:

Génesis 48: LÑLE13

Highlight

Copy