Génesis 20

So Abraham qataq so Abimelec

1Qaq so Abraham ca'ai co'ollaxa ye netaña, nache nqo'ona ye 'alhua le'enaxat Néguev. Qaq nache naña ye huaqta'a't nỹecpi ye Gerar, maye vichiguinguilo yeua Cades qataq Shur. 2Qaq co'ollaq hueta'a yemaye, nache ỹa'axat da 'eetega lqaỹa aso Sara maye lhua somaye. Nache so Abimelec maye nta'a ye Gerar, damaxasoxoneuga co'ollaxa da qanauegueuo aso Sara da yaqto' ỹauo'o lhua. 3Qalaxaye se'eso pe so Abimelec huo'o so lchoxonaxac maye huaigui co'ollaxa da Ñim Lo'onatac 'Enauacna 'enapega, 'eeta':

«'Am 'aleu qome, cha'aye añi 'alo maye 'auaconeua'a da huotaique 'arhua, añimaye huo'o ñi lhua.»

4Qalaxaye so Abimelec ye saxanaxa da lauañi' asomaye, nache ỹasateguet Ñim Nataxala', 'eeta':

«'Am Ỹataxala', ¿ishet peta'a da 'aualauat cam qaica ca ỹo'ot qauem? 5Ye ñi Abraham aỹem da'aqtaxanem da 'eetega lqaỹa aña'añi 'alo, qataq nataqa'en añimaye ỹa'axat da lqaỹa ñimaye. Qaq ỹoqo'oye ỹataqta qaica ca sauotaique da so'ot 'enauac de'era. Qaq nachera da huo'omshe sa'amaqten da qaica ca so'ot qauem.»

6Nache Ñim Lo'onatac 'Enauacna ỹasateguet somaye huaigui so lchoxonaxac, 'eeta':

«Aỹem saỹateeta da ỹataqta qaica ca 'auauotaique da 'auo'ot de'era. Ỹoqo'oye saishet da 'am sasheetem da 'arauañi' añimaye, yaqto' saishet da Aỹem huo'ot ca 'arasouaxashet. 7Qalaxaye nagui aña'añi 'alo 'avi'eguelaxatem qome ñi lhua, cha'aye ñimaye na'aqtaxanaxanec, qaq 'am nqouagaxaueelec qome da yaqto' 'anca'alec. Qalaxaye qom saishet da 'avi'eguelaxatem ñimaye, nache 'am 'aleu qome, qocañi' na 'aralamaxatpi.»

8Qaq so nte'etom so lỹa na'a'q, nache so Abimelec ñisheguem, nache iỹaxaneuga 'enauac so lamaxashecpi, nache da'aqtaxanem 'enauac som dechoxootega somaye. Qaq somayepi co'ollaq hua'axaỹa de'era, nache ỹataqta qalota da lcolanaxa. 9Qaq ime co'ollaxa, nache so Abimelec iỹaxaneuga so Abraham, nache 'enapega, 'eeta':

«¡Ña 'aula'a dam qomi' 'auo'oteque! ¿Negue't cam 'am so'otec qauem da yaqto' aỹem 'auasaxalec da lta'araic ỹasouaxashet, qataq na selotague' shiỹaxauapi? De'era aỹem 'auo'otec, damaye saỹaỹamaxañi.» 10Qaq nataqa'en so Abimelec 'enapega co'ollaxa so Abraham, 'eeta': ¿Negue't cam tatapigui ye 'arhuel co'ollaq 'auo'ot de'era? 11Nache so Abraham ỹasateguet somaye, 'eeta':

«Aỹem sepettega da ne'ena nma' da qaica ca 'enec qanqa'en Ñim Lo'onatac 'Enauacna, qataq da aỹem qaỹalauat souaxat añi ihua. 12Qalaxaye 'eesa da añimaye maiche ỹaqaỹa, añimaye llale so ita'a, qalaxaye saishet da llale aso ỹate'e. Ỹoqo'oye ishet da saroneguet añimaye. 13Ñim Lo'onatac 'Enauacna co'ollaq aỹem 'enapega da sheca'ai ye lma' so ita'a, nache setaxaỹot añimaye da huo'otaq huo'o ca seviraxa nma', nache ỹa'axat da ỹaqaỹa.»

14Qaq huaña nache so Abimelec, ỹe'eguelaxatem so Abraham aso lhua Sara. Qaq nataqa'en ỹanem somaye aso qaguetapi, huacapi, qataq so l-latacpi, qataq aso l-latapi 'alpi, 15nache 'enapega, 'eeta':

«'Ena na ña'alhua, maiche 'alca'aique ca ỹataqta 'arauela da qonaña, qaq nacheca qonaña.»

16Qaq nataqa'en 'enapega aso Sara, 'eeta':

«Nam sanempi da 'arqaỹa, ỹataqta saqaỹoqtegue añi ivi' lasheue, qaq namayepi nala'aguet qome da npaxaalec da no'on 'ana'aqtaguec, da yaqto' na 'am neto'otpi saishet da 'am ỹasaxalec ca sa ỹaỹamaxañi ltaxaỹaxac.»

17Qaq huaña, nache so Abraham nqouagaxaunot Ñim Lo'onatac 'Enauacna, nache Ñimaye qaltaq no'oita naqa'en so Abimelec, qataq aso lhua. Qataq nataqa'en nataren 'enauac aso l-latapi da yaqto' ishet da huo'o ca llalec. 18Cha'aye souaxat co'ollaxa aso Sara, nache Ñim Nataxala' ỹo'ot da so 'alpi maye hueta'a so lma' so Abimelec, saishet da huo'o ca llalec.

Currently Selected:

Génesis 20: LÑLE13

Highlight

Copy