Gálatas 4
4
Nagui mashe qomi' llalqa Ñim Lo'onatac 'Enauacna
1-2Qaq dam sauotaique da sa'axat, 'eeta': Ca ñalec da ñaq saxanaxa da ỹe, nache 'ena'am ca camachaqca nlatac qaltaq deuaqto'ot cam shiỹaxaua maye ilotague' qataq ỹapaxagueetac, choche ivitta'a ca na'a'q da ca lta'a ỹami' 'enauac da lsallaxa da talec naqa'en da ỹauo'o lalamaxat camaye. 3Qaq 'era da 'eetec qomi', co'ollaq ñaq saxanaxa da sauattonaq So Cristo: Nam saq cha'api maye ilotague' 'enauacna, 'eeta'ama qomi' naqa'en ca l-latac. 4Qaq co'ollaq ivita so na'a'q maye laloqnec Ñim Lo'onatac 'Enauacna, nache namaq So Llalec da nañaxatoigui naqa'en aso 'alo, qataq quetelec na namaxasoxonaxacpi maye ỹo'ottac na judiopi. 5Qaq 'era da 'eetec da lviraxac Somaye, yaqto' ishet da qomi' huesore'c naqa'en da yaqto' saishet da souaqto'ot da lamaxasoxonaxac na nqataxacpi, nache Ñim Lo'onatac 'Enauacna qomi' nanereleguete da yaqto' ỹataqta qomi' llalqa.
6Qaq nagui da mashe qami' llalqa, nache Ñim Lo'onatac 'Enauacna qami' namaxalo So Saqcha'a La'añaxac So Llalec da yaqto' qami' hueta'agueta. Qaq ỹoqo'oye da ñeqouagaxaunaqot Ñim Lo'onatac 'Enauacna, nache So Saqcha'a La'añaxac qomi' ỹanema da seỹaxanaxa Ñimaye, shenaqta': «Ita'a, 'am ỹauotaxat ito'olec.» 7Qami' mashe saishet da qoñiita'am ca camachaqca nlatac, cha'aye mashe qami' llalqa Ñim Lo'onatac 'Enauacna. Qaq nagui da ỹoqta qami' llalqa, nache nataqa'en qauacoñiiguet qome da lsallaxa.
So Pablo ỹataqta huo'o da lhuogoxo souaxat so 'amqaanataxanaxaicpi
8Qami' co'ollaq saxanaxa da qauauattoñi Ñim Lo'onatac 'Enauacna, qalaq qami' lcoñetegui'she nam qanatameetacotpi maye saq 'en. 9Qalaxaye nagui qauauattoñi Ñim Lo'onatac 'Enauacna. Qaq dam ỹoqta 'eesa 'eeta': Ñimaye maye qami' ỹauatto'n. Qaq ỹoqo'oye saishet da saỹaten da chaq ta'ainco' da sa qami' ala'q da qanañañiỹot nam qanatameetacotpi maye saq 'en. Ye namayepi qaica ca la'añaxac qataq qaica ca naigui. 10Qami' huo'oi naua na'axa'te maye qavio'oxonñiita'ape, qataq ca'agoxoiqa qataq naua laloxoqui' naua huaiguilo ye vi'i. 11Qaq ỹoqo'oye aỹem huo'o da icolanaxa da tachigui ye iuel da qaica ca naigui da ỹo'onataxanaxac maye qami' so'oteque.
12Qami' ỹaqaỹa't, qami' shenapegalo da aỹem qoñiỹa'am 'ena'am aỹem da qami' sheeta'ama. Cha'aye saishet da huo'o ca sa ỹaỹamaxañi aỹem qauo'ochec, 13qalaxaye aỹem sa no'on, ỹoqo'oye huo'oi soua na'axa'te da soota'a co'ollaxa ye 'alhua Galacia. 14Na'aictaxa da se'eso ỹalolaxa da qami' ỹo'oteque da qalota qarqalaiqui, qalaxaye qami' saishet da aỹem qauo'otañi qataq saishet da aỹem sa qauacoñiiguet. Nachaqrata da aỹem qauacoñiiguet naua qarma'achilli' 'eeta'am aỹem qanqa'eñi ca lamaxashec Ñim Lo'onatac 'Enauacna, ¡huo'otaq nacheso So Jesucristo! 15Aỹem saỹateeta da ivira'a da ishet da qanqache' naua qara'ai'chilli', nache aỹem qa'añima. Qalaq ¿taigue que'eca qantonaxaqui maye qauanomiiteguet co'ollaxa? 16¡Qaq nagui, souaxat da qami' sa'aqtaxaateguema dam ỹataqta 'eesa, nache damaye aỹem ỹo'otec da 'eeta'am da qami' ñepa'aguenaxau'!
17Nam huotaique da qami' ỹamaqaleguete da qaualaqaiguet na namaxasoxonaxacpi maye quetague' na judiopi, namayepi nagui ỹachaxaata da iueelec da qoñiita, qalaxaye dam ỹataqta 'eetapeguec huotaique da qami' na'aqche't, cha'aye namayepi huotaique da aỹem qaucoviỹa'ai, ime, nache qami' qauatailec namayepi. 18Ỹaỹamaqchiguiñi da qaualaqaiguet ca lỹa shiỹaxaua da ỹaỹamaqchiguiñi cam huotaique qami' ỹo'oteque. Qaq da 'eesa da aỹem qavicheelec qaq nachera qoquiito'ot qaq saishet da nda'a't da qami' soota'agueta. 19Aỹem ỹataqta qami' sauoteque, qalaxaye da saxanaxa da qoñiỹa'am So Cristo, nache qauo'ocheetac da ñequi'ic, 'eeta'am da nqui'ic aca 'alo da huotaique da deco'o. 20¡Da iyaxa da qami' sootaiguilo nagui, da yaqto' ñaralaxat ca itaxaỹaxac da qami' setaxaiguilo, cha'aye aỹem ỹataqta sa saỹaten ca sheetec da qoñiita, qataq sa saỹaten ca qami' so'oteque!
Qaỹaloqnaxana aso Agar qataq aso Sara
21Qami' maye qauauoitaique da qaualaqailec na namaxasoxonaxacpi, ñaq aỹem qaua'aqtaxañim: ¿Saishet peta'a da qautaxaỹaxañiita'ape naua ñiyigui'she maye huetaleguete ana nere maye huetalec na la'aqtacpi Ñim Lo'onatac 'Enauacna da nataqa'en ỹa'axattac so Abraham? 22Anamaye ỹa'axat somaye da huo'oi soua dos llalqa, huo'o so llalec aso l-lata, qaq so lỹa llalec, qalaq llalec aso ỹoqta lhua maye ỹataqta huesochiguiñi. 23Qaq som llalec aso nlata, da lañoxoc 'eeta'am 'enauac da lañoxoc da shenaqta, qalaxaye so llalec aso lalamaqte lhua da lañoxoc, nachera da maiche ỹachaxanapecot Ñim Lo'onatac 'Enauacna so Abraham. 24-25Qaq damaye choche qaỹaloqnaxana. Cha'aye se'esoua dos 'alol, nache naiguilo naua dos aỹamaxataxaco. Aso Agar naigui se'eso aỹamaxataxac maye hualec añi qaỹoqotcheguemec 'alhua le'enaxat Sinaí maye huetaigui ye 'alhua Arabia, ỹoqo'oye 'enauac na llalaqpi nacte' da nlatacpi. Asa'aso qaỹoqotcheguemec 'alhua naigui ye nỹecpi ye Jerusalén qaq ỹoqo'oye 'enauac na hueta'a yemaye l-latac na namaxasoxonaxacpi. 26Qalaxaye aso Sara naigui da dalaxaic aỹamaxataxac, qaq ỹoqo'oye qomi' qaralamaxat ye Jerusalén maye hueta'ague da piguem, qomi' maye ỹataqta qomi' huesochiyiñi. 27Cha'aye naua ñiyigui'she maye huetaleguete ana nere maye huetalec na la'aqtacpi Ñim Lo'onatac 'Enauacna, 'eeta':
«¡Ỹataqta 'auamachiguiñi 'am 'alo,
'am maye saishet da 'auco'o!
¡Ỹataqta 'aua'alaq 'am 'alo souaxat da 'antonaxac,
'am maye sa 'anauane' ca lqui'ic da nco'oxoc!
¡Aca 'alo maye qaỹalat ỹataqta ỹactec qome ca llalaqpi,
qaq saishet da 'eeta'am acam 'alo maye huo'o ca lhua!»
28Ỹaqaỹa't, qami' qoñiita'am so Isaac, som ñalec maye Ñim Lo'onatac 'Enauacna ỹachaxanapecot co'ollaxa so Abraham. Qaq shenapec de'era, cha'aye qami' llalqa Ñim Lo'onatac 'Enauacna maye maiche qami' ỹachaxana'ape co'ollaxa. 29Qaq se'eso na'a'q so llalec aso Agar icaatac so Isaac maye chegoqchigui da la'añaxac So Saqcha'a Na'añaxac. Qaq nagui qalaq nache 'eeta'am: Nam huotaique da quegue da lamaxasoxonaxac nam nqataxacpi qalaq qomi' icaata'ape maye qomi' ñalaqpi maye qomi' qaỹachaxana'ape co'ollaxa. 30Qalaxaye naua ñiyigui'she maye huetaleguete ana nere maye huetalec na la'aqtacpi Ñim Lo'onatac 'Enauacna ỹa'axat da Ñimaye 'enapega co'ollaxa so Abraham, 'eeta': «'Auo'orauec añi nlata qataq ñi llalec; cha'aye ñimaye saishet da nhuanaua'a da lsallaxa ñi 'aỹa'alec Isaac maye llalec añi 'alo maye ỹataqta huesochiguiñi.» 31Qami' ỹaqaỹa't, qomi' saishet da qomi' l-lataqa na namaxasoxonaxacpi, nachaqrata da qomi' huesochiyiñi. Saishet da shenaqta'am so llalec aso nlata, nachaqrata da shenaqta'am so llalec aso 'alo maye ỹataqta huesochiguiñi.
Currently Selected:
Gálatas 4: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.