2 Pedro 2

Na napaxaguenataxanaxacpi maye saq 'en

(Judas 4-13)

1So Israel le'ecpi huo'o co'ollaxa na 'eetega da lamaxayec Ñim Lo'onatac 'Enauacna, qalaxaye saishet da 'en. Qaq nache 'eetec nataqa'en da qoñiita da huo'o na napaxaguenataxanaq da 'eetega lamaxashec Ñim Lo'onatac 'Enauacna, qalaxaye saq 'en. Namayepi ỹan da napaxaguenataxanaxac maye saq 'en qataq huo'o da lchec, qalaxaye saishet da qananomiỹa, ivira'a da 'eetega So Jesucristo da saishet da deca'alaqtaxan. Qaq ỹoqo'oye namayepi ishet da nque'elaxatta da qailaxachigui. 2Qataq qalota qome na shiỹaxauapi da 'eeta'am ne'ena dapaxaguenataxanapec maye tenataxanaxaicpi, maye ỹo'ottac 'enauac nam maiche 'eetapeguecpi. Qaq souaxat namayepi, nache na shiỹaxauapi qauema naua la'aqtaqa da detaqtega na quetague' So Cristo qataq dam lataxac namayepi. 3Ne'ena napaxaguenataxanaqpi maye tenataxanaxaicpi, namayepi choche quetague' da lqopitaxanaqtaic da ỹaconeguet aca anom, qataq nauec acamaye souaxat da latenataxanaxac. Qalaxaye Ñim Lo'onatac 'Enauacna mashe qaỹoqtegue da lhuennataxac da ỹauo'o ca nhuaxanaguec namayepi, qaq namayepi saishet da ỹet que'eca nhuaxanaguec.

4Ñim Lo'onatac 'Enauacna saishet co'ollaxa da ichoxonnai' som lamaxashecpi maye huo'o da lasouaxashet, nachaqrata da ỹamaxaña ca nhuaxanaqa' na 'etaxaloxoicpi. Huaña da qaicoñera'aguet na napalaxa, choche ivitta'a que'eca na'a'q qom nmit 'enauacna Ñimaye. 5Nataqa'en Ñimaye saishet da ichoxonnai' so shiỹaxauapi 'etaxaloxoicpi so na'a'q maye huetaigui so Noé. Nachaqrata da namaq co'ollaxa so auot, nache npaxaasheguem naqa'en ana 'alhua, nache 'enauac ileu somayepi. Qaq chaqsota so Noé nca'alaxatec, som 'eetega co'ollaxa so shiỹaxauapi da ỹo'ot ca ỹaỹamaqchiguiñi. Qaq so Noé huo'oi soua lỹa't siete lca'alaxau'. 6Ñim Lo'onatac 'Enauacna nataqa'en ỹauo'o da nhuaxanaguec so shiỹaxauapi maye lma' ye nỹecpi ye Sodoma qataq ye Gomorra, nache ỹavigaxat, iviraxata'a da ndota't na alo, da yaqto' laloqnaxanaxat, dam huotaique 'eetec maye talec naqa'en nam shiỹaxauapi maye qauemaicpi. 7Qalaxaye so Lot saishet da ỹavigaxat, cha'aye se'eso ỹale ỹataqta no'on da lataxac, qataq huo'o da nqui'ic da ilotagui na qauem maye ỹo'ottac se'eso shiỹaxauapi. 8Se'eso no'on da lataxac ỹale hueta'a se'eso nỹecpi, nache 'enauaque naua na'axa'te da lta'araic da nqui'ic, souaxat da imeteetac qataq hua'aqtega nam qauemsat maye ỹo'ottac se'eso shiỹaxauapi.

9Qaq de'era qomi' ỹachaxanalo Ñim Lo'onatac 'Enauacna, da Ñimaye ỹaỹaten da ỹaỹamaxaañi nam lqalaiguesat qataq nam ishet da nqanaxat nam ỹalaxaguet Ñimaye, qataq nataqa'en ỹaỹaten da ỹauo'o ca nhuaxanaguec nam ỹo'ottac na qauem. Qaq damaye ỹo'ot que'eca na'a'q qom nmit 'enauacna. 10Que'eca nhuaxanaxanaxac ỹataqta lalamaxat nam saishet da ỹalaxalec nam lamaxasoxonaxacpi Ñimaye qataq huetaigui da ỹo'ottac 'enauac na qauem maye maiche 'eetapeguecpi.

Ne'ena dapaxaguenataxaatac maye tenataxanaxaicpi ỹataqta qaramchiguilo naua lquiyaqtel qataq ño'oxonnaxaicpi, qataq saishet da ñi'iỹa da isheueetac na lamaxashecpi Ñim Lo'onatac 'Enauacna maye no'on da lataxac. 11Qamaq na namaxashecpi, na'aictaxa da ỹactec da la'añaxac napacalec nam dapaxaguenataxaatacpi maye saq 'en, qalaq nache 'ena'am saishet da isheuen namayepi da datato'ot Ñim Lo'onatac 'Enauacna.

12Ne'ena ỹalleppi ỹataqta qaica ca ỹaỹaanapec, qataq 'enauac nam ỹo'otpi saishet da ỹoqta ỹaỹateeta, ncotateguelec ca sa ỹaỹaten, qataq 'eeta'am na shiguiỹacpi da ñiguiñi da yaqto' taỹa'a da qaỹaconeua'a da qaỹalauat. 13Qataq huo'o da nque'eenaxac souaxat nam ỹo'otec nque'eenaxacpi na laỹepi, cha'aye ipettega da ivira'a da machiguiñi souaxat nam ỹo'ottacpi qauem maye maiche 'eetapeguec da ỹachaigui ye na'a'q. Ỹataqta ỹo'ot da na'agaxa da qaimeteetac nam ỹo'ottacpi qauem, qataq nam qami' ỹo'oteque qauem da qami' ỹalectraiguilo da huaigui na laponaxac na ỹa'amaqten So Jesús.

14Ne'ena ỹalleppi saishet da choche ilota'a aca 'alo da huo'otaq sa iyaqa'a da hue'eguet, qataq saishet da nasamiisop da ỹo'ottac na qauem. Qataq ỹatenachettac nam saxanaxa da da'añi da lpi'iỹaxac So Cristo, qataq ỹataqta saishet da nqalat da datenataxan da yaqto' nqat aca anom. Ne'ena shiỹaxauapi namayepi Ñim Lo'onatac 'Enauacna ỹauo'o ca nhuaxanaguec qome; ¡qaq damaye ỹataqta saishet da qaiqoleguet! 15Namayepi ỹataqta isomtac, cha'aye maiche ỹaxaañi da ỹalaxaguet Ñim Lo'onatac 'Enauacna qataq quegue da lataxac so Balaam som llalec so Beor, som huotaique co'ollaxa da nauec ana anom da ỹachegoxotaigui da ỹo'ottac na qauem. 16Qalaxaye chegoqchigui nam ỹo'ot qauem, da aso 'ashena dalemataỹa somaye: nache detaxaiguilo naua la'aqtaqa na shiỹaxaua, nache saishet da ỹashenem da queto'ot da ỹo'ottac de'era no'oopashaxac.

17Ne'ena dapaxaguenataxaatacpi maye saq 'en namayepi, 'eeta'am aca ñi'illoxoqui maye qaica ca le'ec 'etaxat, qataq 'eeta'am na lo'oc na piguem maye choche ỹachetac na la'at. Namayepi Ñim Lo'onatac 'Enauacna ỹauo'o ca nhuaxanaguec qataq ỹasaxaña ca nhuaxanaqa' maye chochaq tatec na napalaxa. 18Cha'aye namayepi naua la'aqtaqa ỹataqta 'onaxaiqa naqa'e'n, nache ỹo'ot da la'aalaxa na shiỹaxauapi, qalaxaye naua la'aqtaqa qaica ca naiguilo. Ỹayen na laỹepi da yaqto' ỹalegueua'a na lamanaxanaqtaiguesat qataq nam qauem lqopitaxanaqtaicpi; nataqa'en ỹatenachet nam ỹataqta lta'araic da na'añaxataxac da yaqto' ishet da cara'acolec da ca'ai da ỹo'otta'ape naua lasouaxashe'ete. 19Qataq ỹachaxanapecot da huesochiguiñi namayepi da ỹo'ot ca maiche 'eetapeguec, qalaxaye namayepi saishet da ỹañoxot da ỹaxaañi da ỹo'ottac na qauem. ¡Qaq nachena ne'ena qauempi na iviraxata'a da ilaxachigui namayepi! Cha'aye ca saishet da ỹaxaañi da ỹo'ottac na lasouaxashetpi, nache camaye ivira'a da l-latac da ñe'etaxaloxo. 20Cha'aye nataqa'en nam mashe ỹauatton So Qarataxala' qataq Qarca'alaxaqui Jesucristo, namayepi saishet da quetague' da lataxac na 'etaxaloxoicpi maye huetalec ana 'alhua. Qalaxaye da maiche nasheeteuo da ỹe'eguelaxa da ỹatenachet ne'ena lataxacpi qataq hua'aqta'a da ỹauectac da ñe'etaxaloxo, nache namayepi ỹataqta ỹactec da ỹo'ot sa ỹaỹamaxañi saq 'ena'am so hua'auchiguiñi. 21Cha'aye ỹaỹamaqchiguiñictaxa namayepi da saishet co'ollaxa da ỹaỹaten da lataxac da achaalataxac maye ỹaỹamaxareeta Ñim Lo'onatac 'Enauacna. Qalaxaye nagui ye ỹaỹaten, nache da ỹaxaañi da ỹalaxaguet Ñim Lo'onatac 'Enauacna, nache namayepi ỹactec da ỹo'ot sa ỹaỹamaxañi, saq 'ena'am so hua'auchiguiñi. 22Qaq ne'ena shiỹaxauapi ỹachaxan da 'eesa naxa de'era na'aqtac maye 'eeta': «Ca pioq maiche ipacta da chec ca alolaxat», qataq de'era lỹa na'aqtac naxa 'eeta': «Aca cos late'e maye cheta'ague da qanachelaxaatac, qalaq ipacta da ncogangui ca nshaxa.»

Currently Selected:

2 Pedro 2: LÑLE13

Highlight

Copy