1 Tesalonicenses 5
5
1Qalaxaye qami' qarqaỹa't sa iuen da seraxañi ca na'a'q maye laloxoqui de'era. 2Cha'aye qami' mashe qauaỹaañita que'eca na'a'q maye lviraxaqui So Qarataxala'. Camaye huetoigui ca na'a'q da sa qaỹauapeque, 'eeta'am ca cachaxaic da quetagui ye pe. 3Cha'aye na shiỹaxauapi, qom 'eetega da 'enauac lactapiguiñi qataq saqca ca da, qataq saishet da ñe'etapigui', nache nvita namayepi ca nhuaxanaguec lta'araic, choche nque'elaxatta, 'eeta'am da nqui'ic aca 'alo hualaxai da ivita ye laloqo' da deco'o. Namayepi saishet da ỹet da nhuaxanaguec. 4Qalaxaye qami' qarqaỹa't, saishet da qoviitaigui da qane'enaxaqui yaqto' que'eca na'a'q maye lviraxaqui So Qarataxala', saishet da qami' ique'elaxa't, 'eeta'am cam cachaxaic. 5Cha'aye 'enauac da qoñiita huo'o da qarpi'iỹaxaqui So Qarataxala', qaq damaye 'eeta'am da qoviitaigui na le'eraxa ye na'a'q laiñi, qaq saishet da qoviitaigui na napalaxa. 6Ỹoqo'oye iuen da ỹataqta ñeloqtec, saỹamaxataqchiguiñi da qoyecỹaxac, qataq saishet da leetapigui ye qarhuel da shenaqta'am na laỹepi shiỹaxauapi. 7Ca sa naỹamaxateguet da lviraxac So Qarataxala' qataq huetaigui da lle'etaxaloxo qataq taxaic, camaye ỹataqta huetaigui na napalaxa. 8Qalaxaye qomi' saishet da souaqtaigui na napalaxa, nachaqrata da souaqtaigui na yo'oqchiguiñi. Qaq ỹoqo'oye iuen da qolaqtot da ñeloqtec, qataq sauoqo'o da qarpi'iỹaxac Ñim Lo'onatac 'Enauacna qataq sauotaxac 'enauac na shiỹaxauapi. ¡Da qarpi'iỹaxac qataq da qarsoxoyec, damaye ishet da qomi' npaxaaleguete da npaxategueta naua qauema nhuennataxaco, 'eeta'am aca lpaqtaxanaqte ca ỹale alaataxaic! Qaq da saishet da seqoleguetaq de'era qarca'alaxa, nache damaye qomi' npaxaaleguete 'eeta'am aca aro'o alaataxaqui. 9Cha'aye Ñim Lo'onatac 'Enauacna saishet da qomi' lca'agui'she da ỹauo'o ca qanhuaxanaguec ca pa'atec na'a'q. Nachaqrata da saconaxaguet ca nca'alaxa chegoqchigui So Qarataxala' Jesucristo. 10Cha'aye Somaye qomi' ileualeguete co'ollaxa, da huotaique da qanachaalataxaua, na'aictaxa da ñaq ñeca'alaqtauec, huo'otaq mashe qareleu qom ñe'eguelaq Somaye. 11Ỹoqo'oye qantauñiỹa't, qataq ñi 'oonolec ỹa'añaqchet ca lỹa. Qaq de'era mashe qauo'ocheetac, nachera qoquiito'ot.
Da pa'atec lqataxac so Pablo
12Qami' qarqaỹa't, qami' ñachoxorenaqtoto da ỹataqta qauauo'oi naq 'enec na lataxala'pi na 'amqaanataxanaxaicpi. Cha'aye namayepi ỹataqta ỹauo'o da na'añaxataxac da qami' ỹapaxagueetegueque da lataxac da na'amqaanataxanaxac. 13Qaq ỹoqo'oye ỹataqta qauauo'oi naq 'enec qataq ỹataqta qauauochec souaxat na ỹo'otpi, qataq qoviitaiguio' da qami' lactrapiguiñi, saqca ca da ñi 'oonolec da qoñiita.
14Nataqa'en qami' qarqaỹa't, qami' seqataxalo da ỹataqta qoñiỹapega nam huotaique da saishet da do'onataxan. Qaua'añaqchichi na sa da'angui ye lauel, qataq qautauañi na ñaq saxanaxa da yo'oqta ỹa'amaqten So Qarataxala', qataq qanhualaxauñi' 'enauac na shiỹaxauapi.
15Ỹataqta qanchelliỹa'a't, saqca ca isheetena'aguet ca sa ỹaỹamaxañi da ỹo'otec ca lỹa. Chaqrato' da qami' qanpogoxoiñiỹapegue' da qauo'ochec ca ỹaỹamaqchiguiñi ñi 'oonolec da qoñiita qataq 'enauac na laỹepi shiỹaxauapi.
16Qami' nache 'eetai' qome da qauamaichiguiñi 17Nache 'eetai' qome da qanqouagaxauñiitac. 18Na'aictaxa da huo'o na qami' hueleguete, qalaxaye nache 'ena'am qaỹa'añiitacot da qana'achecỹaxaqui Ñim Lo'onatac 'Enauacna. Cha'aye nachera da 'eetapeguec Ñimaye da qoñiita, cha'aye mashe qaua'amaqchiñi So Cristo Jesús.
19Saishet da qaualamache da lo'onataxanaxac So Saqcha'a Na'añaxac Qui'itta. 20Nataqa'en saishet da qauo'otañi da la'aqtaxanaxac ca ỹa'aqtaxanaxan Somaye. 21Qalaxaye qavi'iguiñi 'enauac, qaq cam ỹaỹamaqchiguiñi, nacheca qauaỹamaxache. 22Qataq saishet da qauacoñiiguet 'enauac na ỹotta'a't sa ỹaỹamaxañi.
23Qaq Ñim Lo'onatac 'Enauacna qami' ỹanema da qarlagaxayiqui, qataq nacheñi qami' iqui'itaxatte' yaqto' qauo'onataxañiỹot. Qataq saishet da qami' ỹashenegueta ca sa ỹaỹamaxañi, choche ivitta'a da ñe'eguelaq So Qarataxala' Jesucristo, yaqto' so saqcha'a qarca'alaqai, qataq da qarvilỹaxaqui qataq da qaro'ocỹaxaqui, saishet da huo'o ca qarasouaxashechi qom qanachaachiỹot Ñim Lo'onatac 'Enauacna. 24Ñimaye qami' lca'agui'she da yaqto' qami' ỹalecnaxanoiguilo na lalamaxatpi. Qaq Ñimaye ỹo'ot 'enauac de'era cha'aye, nache 'eetai' naxa da ipaqueelec cam ỹachaxanapec.
Da pa'atec lquinaxanaxac so Pablo
25Qami' qarqaỹa't, nataqa'en qomi' qanqouagaxauñiitaleguete.
26Qaq ñi 'oonolec da qoñiita da nquine' ca lỹa la'amqaanataxanaxaua, nache no'on da ỹataqta napigoxoi',#5.26 Napigoxoi': Se'eso na'a'q da qanapigoxoi' ca nỹa, nachera da ỹataqta no'on quinaxac. qalaxaye ỹachetoigui da lauotaxanaqtaic.
27Cha'aye aỹem lamaxashec So Qarataxala', qaq nagui qami' seqatalo da qautaxaỹaxañi ana ỹere da na'axaỹaxana 'enauac qanqa'eñi na qarqaỹañicpi.
28Seỹaxanot So Qarataxala' Jesucristo da nache queto'ot da qami' ỹachaxaategalo da lsoxoyec. Aja', nache 'eetec de'era.
Currently Selected:
1 Tesalonicenses 5: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
