Éxodo 5

Moisés, Aarón faraónga afa'cho

1Tsa'caen condase nanimba Moisés toya'caen Aarón faraónga japa qquen su'fa:

—Qquen tsu israendeccumbe Na'su Chigaja su: ‘Antteja cuintsu ña aindeccu a'i menia japa ñane fiestaen'faye.’

2Tsa'ma faraónjan pañamba su:

—¿Majan tsu tsa ‘Na'su Chiga’ ña tisema pañamba israendeccu jaye antteye? Nane atesumbi gi tsa na'suve, ni antteya'bi gi cuintsu israendeccu sombopa ja'faye.

3Tsonsi Moisés toya'caen Aarónjan su'fa:

—Na'su Chiga Quitsa, tsa hebreondeccumbe Chiga tsu inginga cachian. Tsa'caen cachiansi gi tres a'ta pa'cco a'i menia jayi'fa oque oraemba ingi Na'su Chiga Quitsanga afeye in'jamba'qque osha'cho paqque'sui'ccu tsambi'ta matichi'ccu ingima fi'ttiya'chove manda anttesa'ne.

4Tsa'ma egipto'su na'suja su:

—Moisés, Aarón, ¿jongoesie qui tisia'caen aindeccu sema'jen'chonga jipa qqueña'jen'fa? ¡Japa sema'jenga'faja!

5Toya'caen tsu faraónjan su:

—¿Ja'ñojan tsain'bio israendeccu va andeni can'jensi ti qui tise'pa sema'bama anttiañe in'jan'fa?

6Tsequi a'tayi tsu faraónjan semoeñe mandasundeccu toya'caen semoen'su israendeccuma'qque qquen manda antte:

7—Ja'ñojan shoshovima israendeccunga afe'fájama apichanga echho'chhoemba tise'pa ladriyove ñoñañe que'i tayoe afe'jeqquia'caen. Antte'faja cuintsu tise'payi shoshovive tta'ttapa ñoña'faye. 8Tsa'ma tayoe mañi'cco ladriyove nani'jenqquia'caen cuintsu ja'ño'qque nani'jen'faye manda'faja; ni fae'ccoyi'qque shacambitsse nani'jeña'chove. Nane ñoa'me noe'supa tsu qquen fundo'je'fa: ‘¡Ingi Chiganga oque oraemba afeye gi jayi'fa!’ 9Va aindeccuma ti'tsse quian'me semoen'faja. Semambaniñi an'bian'faja cuintsu afopoencambe can'faye.

10Tsama pañamba semoeñe mandasundeccu toya'caen semoen'su israendeccu'qque sombopa japa aindeccunga su'fa:

—Faraónda tsu ingima su ccase que'inga shoshovima afe'jembe can'faye. 11Ja'ñojan que'iyi qui japa taiye osha'fa manima atte'ta. Tsa'ma tsa'caen tson'jen'an'qque tayoe mañi ladriyove nanijenqquia'caen tsu naniña'cho.

12Tsama pañamba israendeccuja attufaccopa pa'cco Egipto andenga jaja'fa nasipa caticcu'su shoshovima tta'ttapa apichanga echho'chhoemba ladriyove ñoñañe. 13-14Poi a'ta tsu faraón mandasi semoeñe mandasundeccuja manda'je'fa cuintsu tise'pa shoshovima afe'jeite mañi'cco ladriyove nanijenqquia'caen nani'faye. Toya'caen tsu semoen'su israendeccuma ochha'chhapa qquen su'fa:

—¿Micomba qui cani ni ja'ño'qque toya nani'fambi que'i tayoe tson'jenqquia'can'tsse ladriyove?

15Tsa'caen tise'pama ochha'chhasi semoen'su israendeccuja faraónga japa i'namba afapa qquen su'fa:

—¿Jongoesie qui ingi quembe semoesundeccuma tsa'caen tsincon'faye manda? 16Ja'ñonda tsu shoshovima afe'jembi'ma ‘¡Ladriyove ñoñajan!’ qquen manda. Toya'caen qui ingima ochha'chha'faye manda. ¡Que aindeccu tsu ñoa'me shacapa'fa!

17Tsa'ma faraónjan su:

—¡Que'ija noe'su! ¡Ñoa'me noe'su'fa qui! Tsa'camba qui Na'su Chiganga oque oraemba afe'su jaye qquen a'fa'fa. 18¡Japa sema'ga'faja! Mapán shoshovima afe'je'fambi'ni'qque que'i tayoe mañi'cco ladriyove nanijenqquia'caen tsu nani'faya'cho.

19Tsa'caen tayoe ladriyove nanijenqquia'caen tsu nani'faya'cho qquen susi semoen'su israendeccuja ñoa'me osha'masia sema'ba qquen in'jan'fa. 20Tsa'caen in'jamba faraón tsa'o'ye sombopa Moisés toya'caen Aarónma cachui'fa tise'pave rondasundeccuma. 21Tsomba su'fa:

—Cuintsu Na'su Chiga que'i ingima tson'choma attepa que'i injama'choma somboenjan. Nane que'i qui shacapa'fa faraón toya'caen tise mandasi semoeñe mandasundeccu'qque ingima chi'ga'fa'chone. Que'iyi qui tson'fa tise'pa ingima sema'moen cansepa sefaen'faya'chove.

Moisés Chigama iñajan'cho

22Tsa'caen su'fasi Moisésja Na'su Chigama iñajamba su:

—Na'su Chiga, ¿Jongoesie qui va aindeccuma tsa'caen egae tson? ¿Jongoesie qui ñama vani moe? 23Nane tseyi ña jipa faraónga que mandasi afa'choma afasi tsu ti'tsse que aindeccuma vanae'jen. Tsa'ma queja mingae'qque tsomba tsa vanasundeccuma ccushaembi.

Currently Selected:

Éxodo 5: con

Highlight

Copy