1 Pédrochi 1

1-2La Pedro Jesucrístochi mantá tan joto in pilaca nulachica erechun quinayoe. Nulari in tote tsachila itolajoe; Diosichi to tsachila jolajoe. Juntonan amana nulari uyan tobi uyan tobi chularae. Weyanla Ponto tobi, Galacia tobi, Capadocia tobi, Asia tobi, Bitinia tobi chularae. Junte chuno jonan, Apa Diosi nulaca numari mántanan wenteno tenca caya joto wentenue. Diosichi Tenca nulaca sen suwato, Diosichi josa carinue. Nulaca wentenue yape Jesucrístoca meráminla josa. Yachi asanca nulachi tencabi araleto, jutsa piyarinue. Junni lari Diosibe rocainayoe yape nulaca duque laquirato quirasa. Diosibe rocainayoe yape nula natiya wepanatuto duque pansi chularasa.

Diosica méraminla

3Apa Diosica se tintsan joe. Yari chiquilachi Miya Jesucrístochi Apa joto, ya puyacaca mansoncarinue. Yaca mansoncarito, chiquilacanan duque laquirato yachi nalala isa carinue. Junni chiquilari yachi nalala joto, yaca meralarayoe chiquilaca jamochi pansi sonnasa carichunaeque. 4Yachi nalala joto, duque senca erensia cuwenta canola joyoe. Tsara sen erensia jochunae. Numatotiya yucapiyatun, unica itun, jochunae. Nulachi tenchi jamochi se rae. 5Junni nulari Diosica tennanan, nulaca to yucapiyarino ma fecári cuidaichunae yape jun erensia tsanca calaquisa. Numari jera seca joe jun mate nulaca piyanlelachi cale jera se larichun.

6Junca nulari duque son jolajoe. Amanari Diosichi tsachila joto, moora niyaquetiya padeseiminla joe. Tsan jotonan, jun erensiaca son timinla joe. 7Aman nulachi tencari oro cuwenta joe. Oro chibaito piinan, petse lomanhe. Junni nulari Jesucrístochi tenchi padeseinasa, nulachi tencabi nechi jutsari petse cuwenta lochunae. Junni oro duque sen jotonan, yucapiyamanhe. Diosica tennano mantimini óroca fécari sen joe. Jesucristo manquiraino mate tsachilari tenhilaichunae nulari yaca quereimin jominlanueque. Quereiminla jonunca tenhito, nulaca respetaito seque pato, tsara seque quiminla joe tilatichunae.

8Nulari Jesucrístocari quiratuminnan laquiralarae. Junsi quiratuminnan yabe cayaicala joe. Yabe cayaica joto, patuntsancari duque son timinla joe. 9Junni yabe cayaica jonun tenchi nulachi tencaca se larichunae.

10-11Matu mate Diosichi mantate paminlari junca cuenta quito, Diosi nulaca laquirato se larichunae latinue. Junsi Jesucrístochi Tenca yalachibi wito, cuenta quisa carinue. Junni yachi mantate cuenta quinato, itsanlatinue: Se larimin tsachi padeseitobi, tsara uraran mantá tan ichunae latinue. Junni tsantinatonan, yalanan miitominlanue mo numasi tsanhino jonunca. Junca miichi tinaminlanue. Tsachilaca se larino jonun fiquica duque miichi tinaminlanue. 12Junni Diosi yalaca miisa carinue jun fiquiri yalachi tenchi itominueque, chiquilachi tenchi jominueque. Nulari wari ya fiquica meracala joe. Diosichi Tencari jamochi nechi ereca jun patato tsachilabe panue yape jun sen fiquica nulabe cuenta polarilaquisa. Jun sen fiquica anjelilanan miino muquee timinla joe.

Sen tenca tanla

13Junni seque tenca cato, sonban tenca ilaina! Jesucristo manquiraitobi, nulaca laquirato seque quichunae. Junni juncasiri tenca cato nenalarana! 14Matunan Diosichi fiquica miitoto, nulachi tenca munateri nenato, seitonque nenamin jominlanue. Amanari tsanque nenatuntsan joe. Merámin nalala cuwenta sen jolajona! 15-16Diosi patsanan nulaca yabe cayailaide! tica joe. Junto yachi Pilabi itsanque chuteca joe: Diosi tsara sen joto, nulacanan ya cuwenta tsara sen jolajona! tieque chuteca joe. Junni Diosi nulabe tsantica jonan, nulanan tsanque seque nenalarana!

17Diosi jeralelaca man parejori miimin joe. Junni jeralelaca man parejonan miimin joto, sen jominlacari se tichunae; seiton jominlaca se tituchunae. Junni yaca nulachi Apa joe titori, yaca jele nenalarana! ya Apachi toca lono fecári. 18Junni seque nenachun in fiquica meralaquede! Nulachi tsa apalari Diosica tennatuto, tiri cuwenta epele nenanirano micarica jominlanue. Junni Jesucrístori nula epele nenaminlaca manse larinue. Orochinan, calachinan pacara quito se laritunue. Oronan calanan mica jotonan, yucapiyamanhe. 19Crístori nulaca yachi asanchi se larica joe. Matu mate jutsa tenchi opisa nachi asanca larino jominue. Quiyanpun iton, bichi iton, sen opisa nácari totenun jominue. Junni Jesucrístori jun opisa na cuwenta yachi asanca larinue. Junni yachi asan nulaca se larimin joe yape epele nenalaratusa. 20Diosi toca caquituminnan, yaca pato, puyano jochunae tinue. Junni to yucapiyarino ma quelo inasa, Cristo nulaca laquirato jamochi nechi patanue nulachi tenchi puyachun. 21Junni Diosiri yaca mansoncarito, tsarasi uraran mantá tan suwanue. Junni nulari ya puyato mansonhinun tenchi Diosibe cayaicala joe. Tsanque Diosica tennato meralarae yape se quisa.

22Tsarasi pacaca meráto, nulachi tenca manseilainue. Jesucrístobe pecayaica junlaca laquirachun manseilainue. Junto beco beco tsarasica laquiracaalaquina! 23Nula Diosibe cayaica joto, casanle nechi na manhica cuwenta jolajoe. Uyan quiraque na manhicala joe. Puyamin ni cuwenta itolajoe; puyatumin ni cuwenta jolajoe. Diosichi fiquica meráto, yachi nalala icala joe. Yachi fiquiri sonban joe Diosibe sonnasa carichun. 24Numatotiya jeraituchunae. Jun fiquica Diosichi Pilabi itsanque chuteca joe:

Jerale tsachila lapa cuwenta moora puyamin jolajochunaeque chuteca joe.

Tsaracari mantá tan tsachila jotonan, lapa luli cuwenta moora jeraiminla jochunae.

25Miya Diosichi fiqui mantimini numatotiya joto polechunaeque chuteca joe.

Jun fiquiri nulabe numa cuenta quica jun sen fiqui joe.

Currently Selected:

1 Pédrochi 1: cof

Highlight

Copy