Sacharja 9
9
1Eene wichtje Norecht vom Harn:
Hee haft eene Strof em Senn fa de Jäajent von Hadrach un Damaskus;
dee jehieren däm Harn krakjt soo goot,
aus am de Stam von Israel jehieren.
2Un soo uk Hamat, de näakjste Jäajent,
un Tierus un Sidon, wua see sea kluak sent. #Jes 23,1-18; Jer 47,4; Hes 26,1—28,24
3Tierus haft sikj eene stoakje Mia runtom jebut,
un haft Selwahupes, soo aus Saunt,
un soo väl Golt, aus daut Blott oppe Gaussen haft;
4oba de Har woat an aules wajchnämen waut see haben.
Hee woat äare Schäp gaunz vedoawen,
un äare Staut met Fia vebrennen.
5Wan de Staut Aschkelon daut seenen woat,
woaren see sikj veschrakjen;
Gaza woat sikj kjremmen,
un Ekron woat aule Hopninj oppjäwen.
Doa woat kjeen Kjennich mea en Gaza sennen,
un en Aschkelon woat kjeena mea wonen. #Jer 47,1-7
6Aschdod woat von een Mischvolkj besiedelt woaren;
un soo aus de Filista sikj waut jemeent haben,
woat een Enj sennen. #5Mo 23,3
7See woaren nich mea Bloot em Fleesch loten
ooda daut vebodne äten;
dee waut doa äwabliewen, woaren uk onsen Gott siene sennen.
See woaren eene Aufdeelunk von Juda sennen,
un dee waut en Ekron wonen, soo aus de Jebusita. #1Mo 9,4; Jos 15,63; 2Sam 24,18
8Ekj woa selfst rom mien Hus de Schutz sennen,
jäajen dee waut doa han un häa komen.
Kjeene Armee saul an noch wada ennämen,
wiels ekj woak nu met miene ieejne Uagen. #Sach 2,9
De Har woat Jerusalem halpen
9Freit junt jehierich, dee jie en Zion wonen;
lot jun schrieen to hieren sennen, dee jie en Jerusalem sent.
Horcht emol, jun Kjennich kjemt no junt;
hee es en aules jerajcht un moakt junt frie.
Hee es deemootich un ritt opp eenen Äsel,
eefach opp eenen jungen Äsel. #Zef 3,14; Mat 21,5
10Hee woat met de Kjrichswoages en Efraim,
un de Kjrichspieed en Jerusalem
een Enj moaken.
Hee woat de Soldotenboages oppriemen,
un woat de Velkja aunspornen frädlich to sennen.
Sien Rejierungs Rajcht strakjt sikj von een Mäa bat daut aundre;
un vom Riefa bat soo wiet aus de Ieed rieekjt. #Micha 5,9
11Ekj woa uk dee, dee faustjenomen sent,
ut de drieeje Zistren rutloten,
wäajen dän Bunt, dän ekj met junt hab,
dee met Bloot jemoakt es. #2Mo 24,8
12Aul jie, dee faustjenomen sent un Hopninj jehoolen haben,
komt trigj no june sechre Staut.
Ekj saj junt vondoag:
Ekj woa junt dobbelt soo väl trigjäwen,
aus waut jie veloaren haben. #Jes 61,7; Sach 10,9
13Ekj hab Juda oppjetrocken aus een Boagen,
un hool Efraim aus eene Feil;
ekj woa de Mana von Zion aus een Soldotenschwieet
äwa de Mana von Griechenlaunt brucken.
14Dan woat de Har äwa an komen,
un siene Feilen woaren spretzen aus de Blitz.
Gott de Har woat de Trompeet blosen,
un äwadäl komen aus een Stormwint vom Sieden;
15de Har, dee aules rejieet, woat an bewoaren.
See woaren de Äwahaunt kjrieen,
un dee doltraumplen, waut met de Steena schleidren;
see woaren dee enholen un brellen,
aus wan see voll Wien sent.
See woaren voll sennen aus de Bloot Komm;
daut woat aufranen soo aus de Akjen vom Aultoa.
16Aun dän Dach woat de Har, äa Gott,
sien Volkj raden, aus wan daut siene Häad wia;
see woaren en sien Launt jlenzen, aus diere Steena en eene Kroon.
17Woo schmock woat daut doch loten
un woo auntrakjent woat daut sennen?
De junge Menschen woaren Jeträajd un Wien haben,
daut see jesunt oppwaussen kjennen.
De Har es om de Siene väabedocht
Currently Selected:
Sacharja 9: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
