Sacharja 7

Jehuarsom un Metleet sent wichtja aus Fausten

1En daut 4. Joa aus Darius Kjennich wia, jeef de Har Sacharja eene Norecht. Dit wia aun däm 4. Dach von de 9. Moonat. De Moonat heet Kislew. 2De Lied von Betel hauden Sarezer un Regem Melech un waut aundre Mana jeschekjt, daut see däm Harn aunbäden sullen, 3un de Priestasch, dee en däm Harn sien Hus wieren, un de Profeeten, eene Froag stalen. See sullen froagen auf see noch lenja aun de fefte Moonat truaren un fausten sullen, soo aus see aul väle Joaren hauden? #2Kjen 25,8-9; Jer 52,12-13; Sach 8,19 4Dan jeef de Har, dee aules rejieet, mie dise Norecht, 5dee ekj to aul de Lied em Launt un to de Priestasch sajen sull: Aus jie dise 70 Joa emma en de fefte un säwende Moonat fausten un truaren deeden, wia daut doaropp, daut mie daut halpen sull? #Jes 58,5 6Un wan jie äten un drinkjen deeden, wia daut nich fa junen Jenotten?

7To jane Tiet aus Jerusalem bewont wia un eene rikje Staut wia, met Städa runtom, un doa Lied en daut Launt em Sieden von Kanaan un en de läaje Boaj em Wasten wonden, wia de Norecht dee de Profeeten to dee Tiet brochten, nich dan aul krakjt dit waut ekj nu saj? 8Un dan kjeem de Norecht vom Harn noch wieda no Sacharja, 9un de Har, dee aules rejieet, säd: Wan jie rechten, dan doot daut oppe Woarheit; siet truhoatich leeftolich un jenstich eena toom aundren. #Micha 6,8 10Doot de Wätfrues, de Weisen, de framde un oame nich utnutzen; got nich rom met eenen beesen Plon jäajen junen Noba. #2Mo 22,20-21 11Oba dee horchten nich doano. See dreiden bloos dän Rigjen han, un deeden aus wan see doof wieren. 12See muaken äa Hoat soo hoat aus Steen, daut see nich daut Jesaz un de Norecht hieren wudden, dee de Har, dee aules rejieet, jane Profeeten derch sienen Jeist jeef. Un doawäajen es soon growa Oaja opp junt vom Harn, dee aules rejieet, jekomen. #Jes 48,4 13Aus hee an roopt, horchten see nich, un soo, aus see mie roopten, wull ekj nich no an horchen, sajcht de Har, dee aules rejieet, 14un dan vespreed ekj an mank de Velkja, dee an framd wieren. Daut Launt, wua see jewont hauden, bleef onen beakat, un kjeena wond doa mea. See muaken daut scheene Launt to eene ladje Stap.

Currently Selected:

Sacharja 7: PB

Highlight

Copy