Sacharja 11
11
1Moakt de Däaren op, Libanon,
soo daut daut Fia june Zeeda vebrennen woat.
2Lot de Taunenbeem schrieen,
wiels de Zeeda jefollen sent;
de straume Beem sent nich mea.
Lot de Ieekjen en Baschan hielen,
wäajen de dichta Woolt doljeschnäden es.
3Horcht woo de Hoads hielen,
wiels äare goode Weid vedorwen es.
Horcht woo de Leiws brellen,
wiels de schmocka Jordan Woolt venicht es.
De Profeet es een Hoad
4De Har mien Gott sajcht soo: Weid de Schop, dee boolt jeschlacht sellen. 5Dee, dee dee kjeepen woaren, woaren dee schlachten un nich tweemol doaräwa denkjen; un dee, dee dee vekjeepen, sajen: Ekj dank däm Harn, nu sie ekj rikj. De Hoads doonen nuscht toom dee bewoaren. #Jer 23,1-4; Hes 13,1-6; 34,1-16 6Ekj woa dee, dee en dit Launt wonen nich mea bewoaren, sajcht de Har. Ekj woa eenen jiedren loten utjenuzt woaren von sienen Noba, un uk von sienen Kjennich. Daut gaunze Launt woat tonicht jebrocht woaren, un ekj woa an nich raden.
7Soo wort ekj een Hoad fa de Schop, dee boolt jeschlacht sullen, un besondasch fa dee waut daut aul schlajcht hauden. Un ekj neem twee Stakja, eenen nand ekj “Jnod”, un dän aundren “Eenich”, un soo deed ekj dan Schop heeden. 8En eene Moonat wort ekj dree Hoads loos. Oba ekj wort ojjeduldich met de Häad, un dee kunnen mie nich vedroagen. 9Dan säd ekj: Ekj woa junt nich lenja heeden. Dee waut aum stoawen sent, lot stoawen, un dee waut omjebrocht woaren, lot omkomen. Un de äwaje lot sikj unjarenaunda oppfräten. #Jer 15,2 10Un ekj neem mienen Stock, däm ekj “Jnod” nand, un bruak däm twei. Doamet veschmeet ekj mienen Bunt, dän ekj met aule Velkja jemoakt haud. 11Soo jeef ekj dän Dach mien Bunt met an opp. Un de Schop waut daut aul schlajcht hauden, dee sagen daut dit een Tieekjen vom Harn wia. #Sach 11,7 12Un ekj säd to an: Wan junt daut goot es, dan tolt mie doafäa ut. Oba wan nich, dan hoolt daut. Un see tolden mie 30 Selwastekja. #Mat 26,15 13Daut wia uk eene scheene Somm, waut ekj an wieet wia. Un de Har säd to mie: Schmiet daut Jelt no däm, dee em Tempel de Kaus haft. Un soo jinkj ekj em Tempel un schmeet däm Selwa Schmett daut väa. #Mat 27,9-10 14Dan bruak ekj mienen aundren Stock, dän ekj “Eenich” nand. Doamet brocht ekj de Eenichkjeit von Juda un Israel to een Enj. #Hes 37,22
15Un de Har säd to mie: Nemm nochmol daut Jereetschoft von eenen eefachen Hoad opp die. 16Ekj woa hia en dit Launt eenen Hoad stalen, dee nuscht romjeft om dee waut doa stoawen, dee nich no dee sieekjt waut sikj velieren, dee de lome nich besorcht, un de jesunde nich to äten jeft. Hee woat daut Fleesch von de fate Schop äten, un dee de Heefta aufrieten.
17Daut es schlemm bestalt met däm Hoad,
dee nuscht daucht un de Häad velat.
Mucht am daut Schwieet aum rajchten Oarm
un en daut rajchte Uag trafen,
soo daut de Oarm gaunz vedrieecht
un daut Uag blint woat.
De Har beschizt Jerusalem
Currently Selected:
Sacharja 11: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
