Openboarunk 8
8
Daut säwende Säajel opjemoakt
1Aus daut Laum daut säwende Säajel opmuak, wort daut em Himmel ojjefäa eene haulwe Stund gaunz stell. #Hab 2,20 2Un ekj sach, daut de säwen Enjel, dee doa ver Gott stonen, säwen Trompeeten jejäft worden. #Mat 24,31 3Dan kjeem een aundra Enjel met eene goldne Komm un stunt ver däm Opfadesch. Däm wort väl Weiruak jejäft, met de heilje äare Jebäda opp dän goltbetroknen Opfadesch ver dän Troon to opfren. 4Un de Ruak von daut Weiruak jinkj met de heilje äare Jebäda toop ut dän Enjel siene Haunt nopp ver Gott. 5Dan neem de Enjel de Komm un feld dee met Fia vom Opfadesch un schmeet daut opp de Ieed, un dan rummeld un kracht daut. De Blitz strold un de Ieed bäbd. #Hes 10,2
De ieeschte vea Trompeeten
6Dan muaken de säwen Enjel, dee de säwen Trompeeten hauden, sikj reed doamet to blosen. 7De ieeschta Enjel blosd siene Trompeet, un dan kjeem Hoagel met Fia un Bloot jemenjt, un daut wort rauf opp de Ieed jeschmäten. Un een Dreddel von de Ieed un een Dreddel von aulet jreene Graus vebrend. #2Mo 9,23-26
8De tweeda Enjel blosd siene Trompeet, un dan wort soowaut aus een groota brennenda Boajch em Mäa jeschmäten. Un een Dreddel vom Mäa wort Bloot, #2Mo 7,20-21 9un een Dreddel von aules waut em Mäa läwd jinkj doot, un een Dreddel von de Schäp worden en de Grunt jebrocht.
10De dredda Enjel blosd siene Trompeet. Dan foll een groota Stiern, brennent aus een Fiastock vom Himmel, un dee foll opp een Dreddel von de Wotastreem un opp de Wotakjwalen. #Jes 14,12 11Un dee Stiern heet Bettanis. Un een Dreddel vom Wota wort soo betta, daut väl Menschen doavon storwen.
12Dan blosd de vieeda Enjel, un daut schluach een Dreddel von de Sonn, een Dreddel von de Mon un een Dreddel von de Stierns, soo daut dee aula een Dreddel diesta worden. Un soo wia een Dreddel vom Dach uk een Dreddel von de Nacht onen Licht. #2Mo 10,21; Opb 6,12
13Un ekj kjikjt, un hieed een Odla medden derch däm Himmel flieejen, dee schrieech met lude Stemm: Wee, wee, wee fa dee, dee opp de Ieed wonen, wan see dee Trompeeten hieren woaren, dee de latste dree Enjel noch blosen motten!
Currently Selected:
Openboarunk 8: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
