Openboarunk 5
5
Daut veschlotne Buak
1Un ekj sach daut dee, dee opp däm Troon saut, een Buak en de rajchte Haunt haud, von bennen uk von buten beschräwen, un met säwen Säajlen veräajelt. #Hes 2,9-10; Opb 4,2 2Dan sach ekj een stoakjen Enjel met jewaultich lude Stemm froagen: Wäa es em Staunt, daut Buak optomoaken un de Säajlen to bräakjen? 3Un doa wia kjeena em Himmel ooda opp de Ieed ooda unja de Ieed, dee daut Buak opmoaken un doa nenn kjikjen kunn. 4Un ekj hield sea, daut doa kjeena jefungen wort, dee em Staunt wia, daut Buak optomoaken un to läsen ooda doa nenn to kjikjen. 5Oba dan säd eena von de Eltestasch to mie, ekj sull nich hielen: Kjikj emol! De Leiw von Juda sien Staum, dee von David aufstaumt, es jewennent oppjekomen de säwen Säajlen to bräakjen un daut Buak optomoaken. #1Mo 49,9-10; Jes 11,1
6Un ekj kjikjt un sach tweschen dän Troon un de vea Tieren mank de Eltestasch een Laum stonen, daut et soo sach aus wan daut wia jeschlacht worden. Daut haud säwen Hieena un säwen Uagen, daut sent Gott siene säwen Jeista, dee äwa de gaunze Welt jeschekjt sent. #Jes 53,7; Joh 1,29 7Un daut kjeem un neem däm, dee opp däm Troon saut, daut Buak ut de rajchte Haunt.
Daut Laum es daut wieet daut Buak optomoaken
8Un aus hee daut jenomen haud, follen de vea Tieren un de 24 Eltestasch ver daut Laum dol. Dee hilden jieda eene Hoap un eene goldne Komm voll Weiruak en de Haunt, wua de heilje äare Jebäda bennen wieren, 9un dee sungen een nieet Leet un säden:
Du best em Staunt daut Buak to nämen un de Säajlen optomoaken,
wiels du wieescht dootjemoakt worden un jeefst dien Bloot han,
doamet fa Gott von aule Menschenstam un Sproaken un Velkja,
een Volkj fa sikj to kjeepen, #Psa 33,3
10un hast von an Kjennichs un Priesta jemoakt, onsen Gott to deenen,
un see sellen opp de Ieed rejieren. #2Mo 19,6; Opb 1,6
11Dan kjikjt ekj un hieed om dän Troon un de vea Tieren un de Eltestasch eene Stemm von tieendusende mol 10.000 un dusende mol 1.000 Enjel, #Heb 12,22 12dee sungen met lude Stemm:
Daut Laum, daut dootjemoakt wia, es daut wieet,
Krauft un Rikjtum un Weisheit un Jewault un Iea to nämen
un jeloft un jedankt to woaren. #(12 un 13) 1Chr 29,11; Flp 2,9-10
13Dan hieed ekj aules waut em Himmel un opp de Ieed un unja de Ieed, waut opp daut Mäa un em Mäa jemoakt es, sajen:
Däm, dee opp däm Troon sett,
un daut Laum traft en aule Eewichkjeit
aulen Dank un Iea un Harlichkjeit un Jewault!
14Un de vea Tieren säden: Amen! Un de 24 Eltestasch follen han un bäden dän aun, dee von Eewichkjeit to Eewichkjeit läft.
Currently Selected:
Openboarunk 5: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
