Nehemia 1

Nehemia fangt met dän Berecht von siene Räakjenschoft aun

1Dit es Nehemia, Hachalja sien Sän, siene Jeschicht. Dit passieed en de Moonat Kislew en daut 20. Joa, aus ekj en de vesechade Städ en Susa wia. 2Dan kjeem Hanani, eena von miene Breeda, met eenje Mana ut Juda no mie. Un ekj fruach an, woo de äwajebläwne von de Juden daut jinkj, waut nich en de Jefangenschoft veschlapt wieren, un woo Jerusalem daut jinkj. 3Un see säden to mie: Dee waut met däm Läwen doavon jekomen, un ut de Jefangenschoft trigjetrocken sent, läwen dort em Launt en een grootet Ojjlekj un Schaund. De Stautsmia von Jerusalem licht doljebroaken, un de Puaten sent vebrent. #2Chr 36,19 4Aus ekj dise Wieed hieed, sad ekj mie dol un hield un truad Doagen lank, un deed fausten un bäden ver däm Gott em Himmel #Esra 9,3 5un säd: Oba, Har, du Gott em Himmel, du groota un jeferchta Gott! Du steist tru to dienen Bunt un to dee, dee die truhoatich goot sent un diene Jebooten hoolen. #Dan 9,4 6Lot diene Uaren doch häahorchen un diene Uagen op sennen, daut du dienen Deena sien Jebäd hieescht, waut ekj ver die Dach un Nacht fa diene Deena, de Israeliten, bäden doo. Ekj bekjan de Israeliten äare Sinden, waut wie aun die jedonen haben; ekj un mien Voda siene Famielje haben uk jesindicht. 7Wie haben die beeset aunjedonen, wiels wie diene Jebooten, Aunordnungen un Rajchten nich jehoolen haben, waut du derch dienen Deena Moses aunjeordnet hautst. 8Denkj oba doch aun de Wieed, waut du to dienen Deena Moses sajen deetst: Wan jie mie ontru woaren, well ekj junt mank de Velkja vestreien. #5Mo 4,27 9Wan jie oba trigj no mie komen un miene Jebooten hoolen un befoljen, dan well ekj, uk wan jie vesprenjt sent bat aum Enj vom Himmel, junt doch von doa toopläsen un junt no de Städ brinjen, dee ekj utjesocht hab, daut mien Nomen doa wont. #5Mo 30,4-9 10See sent je doch diene Deena un dien Volkj, waut du jerat hast derch diene groote Krauft un diene stoakje Haunt. 11Oba Har, lot diene Uaren häahorchen no daut Jebäd von dienen Deena un opp de Jebäda von diene Deena, waut dienen Nomen ferchten. Un lot dienen Deena daut vondoag jlekjen un jeff am Jnod ver disen Maun! Ekj wia dee, dee däm Kjennich daut Drinkjen enschenkjen deed.

Currently Selected:

Nehemia 1: PB

Highlight

Copy