Matäus 19

Jesus lajcht loos no Judäa

(Mrk 10,1)

1Aus Jesus met siene Räden foadich wia, veleet hee Galiläa, un kjeem no Judäa en de Jäajenden aun de aundre Sied Jordan. 2Am kjeemen väl Menschen hinjaraun un hee heeld dee doa.

Äwa Ehescheidunk un sikj nich befrieen

(Mrk 10,2-12)

3Un Farisäa kjeemen no am un vesochten am doarenn, daut see am fruagen: Es daut rajcht, daut een Maun sikj scheeden deit von siene Fru, wäajens irjent eene Uasoak? 4Hee auntwuad un säd to an: Hab jie nich jeläst daut dee, dee de Menschen jemoakt haft, een Maun un eene Fru muak? #1Mo 1,27 5Un säd: “Een Maun woat Voda un Mutta veloten un sikj met siene Fru vebinjen, un dee twee woaren eent woaren.” #1Mo 2,24 6Un dan sent dee nich mea twee, oba een Fleesch. Un waut Gott vebungen haft, saul de Mensch nich von enaunda scheeden. #1Kor 7,10-11

7See säden to am: Wuarom befool Moses dan, daut see sullen een Scheedungsbreef jäwen un sikj von äare Frues scheeden. #Mat 5,31 8Hee säd to an: Moses haft junt erlaupt von june Frues to scheeden, wiels jie em Hoaten soo aufjehoat sent, oba aum Aunfank wia daut nich soo. 9Un ekj saj junt: Wäa sikj von siene Fru scheeden deit, wan see am nich es ontru jewast, #19,9 Eenje oole Schreften sajen nich wan see am nich es ontru jewast. un eene aundre friet, dee brakjt de Ehe. (Un wäa sikj met eene jeschiedne Fru befriet, brakjt uk de Ehe.) #19,9 Eenje oole Schreften haben dit latste Poat nich. #Mat 5,32; Luk 16,18

10Dan säden de Jinja to am: Wan dit soo met Maun un Fru stonen deit, dan es daut nich goot äwahaupt to befrieen. 11Jesus säd, dise Lia kunnen see nich aula aunnämen, dee wia mau fa dee, dän daut jejäft wia. #1Kor 7,7 12Doa sent soone dee onen Maunskrauft jebuaren sent. Eenje sent uk derch Menschenhaunt bat doa jebrocht. Doa sent uk soone, dee sikj om daut Himmelrikjs haulwen bat doa jebrocht haben. Wäa dit soo aunnämen kaun, däm lot daut aunnämen.

Jesus säajent kjliene Kjinja

(Mrk 10,13-16; Luk 18,15-17)

13Dan worden kjliene Kjinja no am jebrocht daut hee an de Henj opplajen un äwa an bäden sull. De Jinja oba schullen an doaräwa. 14Oba Jesus säd: Lot de kjliene Kjinja no mie komen, un vebeet an daut nich, wiels ut soone besteit daut Himmelrikj. #Mat 18,2-3 15Un hee läd an de Henj opp un jinkj von doa wieda.

De Jefoa rikj to sennen

(Mrk 10,17-27; Luk 18,18-27)

16Dan kjeem een Maun no Jesus un säd to am: Gooda Meista, waut fa goodet mott ekj doonen, daut ekj daut eewje Läwen kjrie? 17Hee säd to am: Wuarom frajchst du mie äwa waut goot es? Doa es eena dee goot es, daut es Gott. Wan du Läwen haben west, dan hool de Jebooten. 18Hee säd to am: Woone? Un Jesus säd: “Du saust nich dootmoaken; du saust nich ehebräakjen; du saust nich stälen; du saust nich een faulschet Zeichnis jäwen; 19du saust Voda un Mutta ieren”, un: “Du saust dienen Näakjsten soo goot sennen aus die selfst”. #2Mo 20,12-16; 3Mo 19,18 20De junga Maun säd to am: Daut hab ekj aula jehoolen. Waut fält mie noch? 21Jesus säd to am: Wan du west volkomen sennen, dan go un vekjeep waut du hast, un jeff daut fa de oame, un du woascht een Schauz haben em Himmel. Un dan folj mie no. #Mat 6,20; Luk 12,33 22Aus de junga Maun daut hieed, jinkj hee truarich wajch, wiels hee haud een grootet Vemieejen. #Psa 62,11

23Un Jesus säd to siene Jinja: Ekj saj junt de Woarheit, daut woat fa een rikjen Maun schwoa sennen em Himmelrikj to komen. 24Ekj saj junt noch emol: Daut es fa eenen Kameel leichta derch daut Uag von eene Notel to gonen, aus fa een rikjen Mensch em Himmelrikj to komen. 25Aus de Jinja daut hieeden, vewundaden see sikj sea un säden: Wäa kaun dan äwahaupt seelich woaren? 26Un Jesus kjikjt an aun un säd: Fa Menschen to beseenen es daut ommäajlich, oba bie Gott es aules mäajlich. #Hiob 42,2

De Loon fa dee, dee aules oppjejäft haben

(Mrk 10,28-31; Luk 18,28-30)

27Dan auntwuad Petrus un säd to am: Kjikj emol, wie haben aules veloten un sent die nojefolcht. Waut woa wie doafäa kjrieen? #Mat 4,20-22 28Jesus säd to am: Dit es secha: En de niee Welt, wan de Menschensän opp sienen harlichen Troon setten woat, dan woa jie, dee jie mie nojefolcht sent, uk jieda opp eenen Troon setten un äwa de 12 Stam von Israel rechten. #Luk 22,30; 1Kor 6,2; Opb 3,21 29Un wäa om mient haulwen Hus ooda Brooda ooda Sesta ooda Voda ooda Mutta ooda Kjinja ooda Launt veloten haft, woat daut hundade mol #19,29 Eenje oole Schreften sajen väl mol äwa. trigjkjrieen un daut eewje Läwen oawen. 30Un väle dee daut ieeschte sent, woaren daut latste sennen, un dee daut latste sent, woaren daut ieeschte sennen.

Currently Selected:

Matäus 19: PB

Highlight

Copy