Kloagleeda 3
3
Troost en eene schwoare Tiet
1Ekj sie de Maun, dee väl unja dän Stock
vom Harn sienen Oaja jeläden haft.
2Hee juach mie em diestren nenn,
un leet mie gonen wua kjeen Licht wia.
3Siene Haunt troff bloos emma mie,
een Dach nom aundren, emma wada.
4Hee leet miene Hut wajchschieren,
un mien Fleesch vedrieejen;
hee leet miene Knoakes tweibräakjen.
5Hee sad eene betre Jrens rom mie,
doa wia kjeen Wajch ut miene Kwol.
6Hee muak daut soo diesta runtom mie,
aus rom dee waut aul lang em Grauf sent.
7Hee sad eene Waunt rom mie, wua ekj nich derch kunn,
hee läd mie schwoare Kjäden opp.
8Un wan ekj uk roop un hiel,
horcht hee nich no mien Jebäd. #Psa 22,3; 69,4
9Hee haft mienen Wajch toojemieet,
hee muak mie eenen Omwajch nogonen.
10Hee es een Boa, dee no mie luat,
un een Leiw, dee sikj vestoaken helt;
11hee leet mie vebiestren,
un leet mie wund un eensom.
12Hee trock sienen Boagen stiew,
un zield de Feil no mie;
13de Feilen von siene Schajcht
troffen deep en mie nenn.
14Mien gaunzet Volkj moakt Spos von mie,
see vespotten mie aule Dach en äare Leeda; #Hiob 30,9
15hee haft mie gaunz betta von bennen jemoakt,
un met Gaulwota oppjefelt.
16Hee lat mie opp Steena keiwen,
un drekjt mie en Ausch dol;
17miene Seel haud kjeene Fräd,
un ekj haud vejäten waut Freid wia.
18Ekj meend miene Krauft un de Hopninj,
dee ekj em Harn haud, wieren wajch;
19wan ekj aun mien lieden docht,
un woo eensom ekj wia,
must ekj sea betta oppsteeten.
20Jiedatsmol wan ekj doaraun denkjen mott,
sie ekj bedrekjt un vetwiewelt.
21Oba doa es dit aun waut ekj mie hool,
un dan läw ekj wada opp,
22un daut es dit:
Däm Harn siene Leew es truhoatich,
doa es kjeen Enj von woo jenstich hee es; #Neh 9,31
23soo es hee jieda Morjen vom nieen.
Daut es groosoatich, woo eena sikj opp die veloten kaun.
24Ekj saj met mien gaunzet Hoat:
De Har es waut mie fält,
ekj lua no waut hee doonen woat. #Psa 16,5; 73,26
25De Har es däm goot,
dee no sienen Wajch luat;
däm, dee no am frajcht.
26Daut es daut goot wieet,
stell fa däm Harn un siene Help to luaren; #Reema 8,25
27daut es goot fa eenem,
wan eena enne Jugent daut schwoare droagen lieet.
28Lot däm stell fa sikj setten,
von wäm de Har daut haben well;
29lot däm sien Mul em Stoff nenn drekjen,
wiels doa mach noch Hopninj fa däm sennen.
30Lot däm siene Baken no däm dreien,
dee doa schleit,
un väl Spott hannämen. #Mat 5,39
31De Har veschmitt eenem nich opp emma; #(31 un 32) Jes 54,8
32wan hee ons uk lieden lat,
doawäajen jeft hee ons soo väl Metleet,
aus hee truhoatich un leeftolich es.
33Hee schekjt nich Trubbel,
un lat ons nich lieden,
aus wan hee gaunz foadich met ons es.
34Wan de Jefangne meshaundelt woaren,
35ooda wan de Hechsta daut sitt,
daut eenem sien rajcht vedreit woat,
36ooda wan wäa orrajcht beschulcht woat,
woat de Har daut nich seenen?
37Kaun irjentwäa waut velangen,
onen daut de Har doatoo enwellicht? #Jes 45,7; Amos 3,6
38Kjemt Jlekj ooda Ojjlekj opp eenem,
onen daut de Har daut velangt?
39Wäajen waut kaun een Mensch sikj jrämen,
soo lang aus hee Läwen haft?
Fa siene Sinden lot am sikj schämen.
40Well wie onse Wäaj goot beseenen,
un ons trigj nom Harn dreien.
41Well wie onse Hoaten, krakjt soo aus onse Henj,
opphäwen no Gott em Himmel.
42Wie haben ons vesindicht
un sent onjehuarsom,
un doawäajen hast du ons nich vejäft. #Psa 106,6
43Du hast runtom die, dienen Oaja jewäsen,
un hast ons nojestonen
un onen Metlieden omjebrocht.
44Du hast die en eene Wolkj trigjetrocken,
daut kjeen Jebäd bat die komen kunn.
45Du hast ons loten Mell un Schunt woaren,
mank de Velkja.
46Aul onse Fiend haben väl äwa ons to sajen jehaut.
47Wie sent veenjst un benomen,
wie motten dän Schoden un dän Doot hannämen.
48Miene Tronen ranen en eenen Stroom,
wiels ons scheenet Volkj enne Grunt jebrocht es.
49Miene Tronen ranen un kjennen nich opphieren,
doa es kjeen nojäwen,
50bat de Har von em Himmel rauf kjikjt,
un sitt woo daut steit. #Psa 102,20-21
51Mie deit aules wee, wan ekj see
woo de junge Frues en onse Staut daut jeit.
52Soo aus een Voagel bloos vespos jejoacht woat,
haben miene Fiend mie jejoacht.
53See haben mie läwendich em Loch jeschmäten,
un Steena opp mie jeschmäten,
54un daut Wota stieech bat äwa mienen Kopp.
Ekj docht nu wia daut ut met mie.
55Oba von unjen en daut Loch,
roopt ekj dienen Nomen, Har,
56daut du horchen sust,
daut du die nich wajchdreien sust,
von mien Älent un mien hielen un bäden.
57Un aus ekj die jeroopt haud,
dan kjeemst du noda no mie;
du sätst ekj sull nich angst haben.
58Un nu steist du, Har, fa mie en,
un ratst mien Läwen.
59 Har, du sitst woo see mie orrajcht behaundelt haben;
stal miene Sach trajcht.
60Du weetst woo dee sikj aun mie rajchen wullen,
un waut see jäajen mie plonden.
61 Har, du hast jehieet woo see mie trozten,
un waut see aules jäajen mie plonden.
62Dän gaunzen Dach räden miene Jäajna,
un veachten mie bloos.
63Vom Morjen bat däm Owent,
spotten äare Leeda äwa mie. #Kloag 3,14
64Tol an trigj fa daut,
waut see jedonen haben, Har. #Psa 137,8; Kloag 1,21; 1Pet 2,23; 3,9
65Lot dee äa Hoat em onkloaren komen,
un lot dienen Fluch opp an komen.
66Joag an hunjsch hinjaraun, Har,
un rod an ut von diene Ieed, Har.
Currently Selected:
Kloagleeda 3: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
