Judas 1

Säajensgruss

1Judas, Jesus Christus sien Deena un Jakobus sien Brooda, schrift no dee, dee Gott jewält haft, dee Gott ons Voda goot es un en Jesus Christus bewoaren deit: #Mat 13,55

2Mucht Gott junt väl Jnod, Fräd un Leew jäwen!

Faulsche Lierasch

3Leewe Frind, ekj wia iernstlich doabie, junt äwa ons seelich woaren to schriewen. Doch dan sach ekj daut fa needja aun, junt opptomuntren, fa dän Gloowen to kjamfen, dee de heilje een un fa aulemol aunvetrut es. #1Tim 1,18 4Doa haben sikj jewesse Menschen nenjeschlikjt, dän äa Vedaumungsuadeel aul lang trigj jeschräwen es. Daut sent gottloose Menschen, dee äare Jnod en Gott faulsch brucken aus eene Frieheit toom sindjen, un see velieejen, daut Jesus Christus ons eensja Har un Meista es. 5Ekj well junt bloos denkjen halpen, wan jie daut uk aul wisten: Aus de Har #1,5 Eenje oole Schreften sajen Jesus un eenje Gott. sien Volkj ut Ägipten rut jerat haud, dan brocht hee dee, waut nich jleewden, doch nohäa om. #4Mo 14,35; 1Kor 10,5 6Gott haft uk de Enjel, dee äare Väarajcht em Himmel nich bewoaden, un äa Tus em Himmel veleeten, opp eewich jebungen un em diestren faustjehoolen, om dee aun janen grooten Dach ver Jerecht to stalen. #1Mo 6,2-4 7Jrod soo sent uk Sodom un Gomorra un de Städa en dee Omjäajent, aus dee onmoralisch läwden un met aundre Sort Fleesch (Enjel) Onzucht driewen wullen, ons toom Biespel jesat un lieden de Kwol vom eewjen Fia. #1Mo 19,1.4-11 8Jrod soo driewen dise Dreema uk Schaund met äaren ieejnen Kjarpa. See wellen nuscht doavon weeten, daut Gott äa Har un Rechta es, un lastren hechre Harlichkjeiten. 9Aus Michael, de gaunz huaga Enjel, sikj met däm beesen Fient äwa Moses sienen Kjarpa street, woagd dee daut nich eemol, een vedaumendet Uadeel jäajen am uttospräakjen. Hee säd bloos: Mucht de Har die strofen! #Dan 12,1; Sach 3,2 10Un doch räden dise Menschen veachtent jäajen aules, waut see nich vestonen. Oba waut see vonne Natua häa kjanen, waut soo es aus bie de onveninftje Tieren, doano doonen see, un daut es wuaderch see omkomen. 11Woo woat dee daut bloos gonen! See gonen dän Wajch dän Kain jinkj, un sent wäajen Jewenst soo aus Bieleam opp eenen Errwajch jeroden, un komen em Opprua om, soo aus Korach. #1Mo 4,8; 4Mo 16,1-34; 31,16 12Dise Menschen sent eene Schaund bie june Jemeenschoftsmolen, un schmarotzen onen sikj to schämen. See sorjen bloos fa sikj. See sent Wolkjen onen Räajen vom Wint han un häa jeblost. See sent Hoafstbeem onen Frucht, utjeräten un dobbelt doot. #1Kor 11,21 13See sent onbandje Walen opp däm Mäa, dee äare Schaund utschumen, errende Stierns, dee opp emma em dunkelsten diestren woaren bliewen motten. #Jes 57,20

14Henoch, de säwenda von Adam, haud von dise Menschen aul em verut soo jesajcht: Kjikjt emol, de Har kjemt met väl dusent heilje Enjel, #1Mo 5,21 15om Jerecht to hoolen un aule gottloose fa äa gottlooset Läwen to strofen, wuamet see gottloos jewast sent, un uk fa aul dee frajche Wieed, dee de gottloose Sinda jäajen am jerät haben. 16Daut sent Menschen, dee grunzen un ontofräd sent un soo läwen, aus äare Lost un äa Janka an driewen deit. Dee puchen met sikj selfst un schmeichlen sikj bie aundre en, om fa sikj Jewenst to haben.

Blieft tru un en Gott siene Leew

17Oba jie, leewe Frind, denkjt doaraun, waut däm Harn Jesus Christus siene Apostel junt verhäa jesajcht haben. 18Dee säden junt, daut en de latste Tiet Spetta komen wudden, dee soo läwen wudden aus äare ieejne gottloose Lost an driewen wudd. #1Tim 4,1; 2Pet 3,3 19Dit sent Menschen, dee Spoolungen veuasoaken, fleeschlich jesonnen sent un nich dän Jeist von Gott haben. #1Kor 2,14

20Jie oba, leewe Frind, but junt opp derch junen aulaheilichsten Gloowen, un bät em Heiljen Jeist siene Krauft. #Kol 2,7; 1Tess 5,11 21Blieft en Gott siene Leew, un luat opp onsen Harn Jesus Christus, junt en siene Jnod to daut eewje Läwen to brinjen. 22Habt Metlieden met soone, dee doa twiewlen. 23Rat aundre soo aus wan jie dee ut däm Fia rieten. Om aundre erboarmt junt en Gottesforcht, un doabie paust opp un venicht soogoa een Kjleet, daut met Sind besudelt es. #1,23 Daut Griechische en de oole Schreften es nich aula kloa to vestonen en disen Varsch. #Jak 5,9; Opb 3,4

Toom Schluss, Gott lowen

24Gott oba kaun junt bewoaren daut jie nich faulen, un junt oschuldich un en groote Freid ver sikj stalen. Hee es harlich. #1Tess 5,23 25Däm eensjen Gott, onsem Heilant, traft Harlichkjeit, Majestät, Krauft un Jewault derch Jesus Christus onsen Harn, to aule Tiet un fa emma! Amen.

Currently Selected:

Judas 1: PB

Highlight

Copy