Johanes 15

Jesus es de rajchte Wienstud

1Ekj sie de rajchte Wienstud, un mien Voda es de Wiengoadna. #(1-6) Psa 80,9-12; Jes 5,1-7; Jer 2,21 2Aule Ranken aun mie, dee nich Frucht droagen, schnitt hee auf. Oba aule Ranken, dee doa Frucht droagen, reinicht hee, daut dee mea Frucht brinjen kjennen. 3Jie sent aul derch daut Wuat jereinicht, daut ekj to junt jerät hab. #Joh 13,10; 1Pet 1,23 4Blieft en mie, un ekj woa en junt bliewen. Soo aus eene Rank nich Frucht brinjen kaun, wan dee nich aune Wienstud blift, soo kjenn jie uk nich Frucht brinjen, wan jie nich en mie bliewen. 5Ekj sie de Wienstud, un jie sent de Ranken. Wäa en mie blift un ekj en am, dee brinjt väl Frucht. Onen mie kjenn jie nuscht doonen. #2Kor 3,5-6 6Wäa nich en mie blift, dee woat soo aus eene Rank wajch jeschmäten. De wajch jeschmätne Rank vedrieecht. Dan woat dee oppjesaumelt un em Fia jeschmäten un vebrent. 7Wan jie en mie bliewen un miene Wieed en junt bliewen, dan froacht no waut jie wellen, un junt woat daut jejäft woaren. #Mrk 11,24 8Mien Voda woat doaderch jeieet, wan jie väl Frucht brinjen un miene Jinja woaren. #Mat 5,16

9Soo aus Gott mie goot es, soo sie ekj junt uk goot. Lot junt von mie goot sennen un läft doano! 10Wan jie miene Jebooten hoolen, woa jie junt von mie goot sennen loten, jrod soo aus ekj mienen Voda siene Jebooten hool un mie von am goot sennen lot. 11Ekj hab junt dit jesajcht, daut miene Freid en junt bliewen mucht, un daut jie junt gaunz freien kjennen. #Joh 17,13

12Dit es mien Jeboot, daut jie junt unjarenaunda soo goot sent, aus ekj junt goot sie. #Joh 13,34 13Kjeena jeft mea rom om dän näakjsten aus dit, daut hee sien Läwen fa siene Frind jeft. #Joh 10,11; 1Joh 3,16 14Jie sent miene Frind, wan jie doonen, waut ekj junt saj. #Mat 12,50; Joh 8,31 15Ekj nan junt nich mea Deena, wiels een Deena weet nich, waut sien Har deit. Ekj hab junt Frind jenant, wiels ekj junt aules jesajcht hab, waut ekj von mienem Voda jehieet hab.

16Jie haben mie nich jewält, oba ekj hab junt jewält un aunjestalt, daut jie gonen un Frucht droagen, Frucht, dee doa bliewen woat. Dan woat de Voda junt jäwen, om waut jie en mienem Nomen bäden.

17Dit Jeboot jäw ekj junt: Siet eena dän aundren goot.

De Welt kaun junt nich lieden

18Wan de Welt junt nich lieden deit, dan denkjt doaraun, daut see ieescht mie nich jeläden haft. #Joh 7,7 19Wan jie noch von dise Welt wieren, wudd de Welt daut äaje goot sennen. Nu sent jie oba nich von dise Welt, wiels ekj junt doa rut jewält hab, un doawäajen kaun de Welt junt nich lieden. #Joh 17,14; 1Joh 4,4-5 20Denkjt doaraun, waut ekj junt jesajcht hab: Een Kjnajcht es nich jrata aus sien Har. Wan see mie nojestonen haben, woaren see junt uk nostonen. Un wan see mien Wuat jehoolen haben, woaren see junt uk hoolen. #Mat 10,24-25; Joh 13,16 21Dit woaren see junt aula wäajen mienen Nomen aundoonen, wiels see dän nich kjanen, dee mie jeschekjt haft. #Joh 16,3

22Wan ekj nich jekomen wia un an daut jesajcht haud, dan hauden see kjeene Sind. Nu oba kjennen see nuscht väajäwen, äare Sind to entschuljen. #Joh 9,41 23Wäa jäajen mie es, dee es uk jäajen mienen Voda. #Luk 10,16 24Wan ekj mank an nich de Woakjen jedonen haud, dee kjeen aundra jedonen haft, dan hauden see kjeene Sind. Nu oba haben see dee jeseenen un kjennen mie doch nich lieden, nich mie un uk nich mienen Voda. 25Oba daut mott soo romkomen aus de Spruch en äa Jesaz sajcht: “See sent jäajen mie onen Uasoak”. #Psa 69,5

26Wan de Treesta komen woat, dän ekj junt vom Voda schekjen woa, de Jeist, dee Woarheit es un vom Voda utjeit, dee woat von mie zeijen. #Luk 24,49; Joh 14,16.26 27Un wiels jie von Aunfank aun bie mie jewast sent, sent jie uk miene Zeijen. #Apost 1,8.21-22; 5,32

Currently Selected:

Johanes 15: PB

Highlight

Copy