Johanes 11

Lazarus stoaft

1Lazarus von Betanien, een Darp wua Maria un Marta wonden, lach krank. #Luk 10,38-39 2Dit wia dee Maria, dee däm Harn dän dieren Parfum äwa de Feet goot un met äare Hoa aufdrieejd. Dee äa Brooda Lazarus wia krank. #Joh 12,3 3Doawäajen schekjten de Sestren Jesus de Norecht: Har, dee, dän du goot best, es krank. 4Aus Jesus daut hieed, säd hee: Dise Krankheit es nich toom Doot. Dee es doatoo doa, daut Gott veharlicht woat, un daut doaderch Gott sien Sän veharlicht woat. #Joh 9,3 5Jesus wia Marta un äare Sesta un Lazarus goot. 6Un doch, aus hee hieed, daut Lazarus krank wia, bleef hee noch twee Doag doa wua hee wia. 7Un dan säd hee to siene Jinja: Well wie wada no Judäa gonen! 8De Jinja säden to am: Liera, daut es noch nich lang trigj, aus dee die vesochten to steenjen, un nu west du wada hangonen? #Joh 10,31 9Jesus säd: Sent doa nich twalw Stund em Dach? Wäa äwadach jeit, stat sikj nich; hee sitt daut Licht en dise Welt. #Joh 9,4-5 10Wäa oba enne Nacht jeit, dee stat sikj, wiels hee haft kjeen Licht en sikj. #Joh 12,35

11Aus Jesus dit jesajcht haud, säd hee to an: Ons Frint Lazarus schlapt, oba ekj go han, am opptowakjen. #Mat 9,24 12Dan säden de Jinja to am: Har, wan hee schlapt, dan woat daut aul bäta. 13Jesus haud doamet jesajcht, daut Lazarus jestorwen wia. Oba see dochten, hee meend, daut dee ruich schleep. 14Dan säd Jesus an daut frie rut: Lazarus es jestorwen. 15Un ekj sie om junt haulwen froo, daut ekj nich doa wia, daut jie kjennen jleewen lieren. Oba nu well wie hangonen! 16Dan säd Tomas, dän see uk Zwillinkj nanden, to de aundre Jinja: Well wie uk gonen, daut wie met am stoawen! #Joh 20,24-28

Jesus es daut Läwen. Lazarus woat vom Doot oppjewakjt

17Aus Jesus hankjeem, haud Lazarus aul vea Doag em Grauf jeläajen. 18Betanien wia dicht bie Jerusalem, ojjefäa eene haulwe Stund gonen. #11,18 Griechisch 15 Stadien 19Doa wieren väl Juden no Marta un Maria jekomen, an wäajen äaren Brooda to treesten.

20Fuaz aus Marta hieed, daut Jesus kjeem, jinkj see am entjäajen. Maria oba bleef tus setten. 21Marta säd to Jesus: Har, wan du wieescht hia jewast, wia mien Brooda nich jestorwen. 22Oba ekj weet uk noch, om waut du Gott froagen deist, woat Gott die jäwen. 23Jesus säd to ar: Dien Brooda saul vom Doot oppstonen. 24Marta säd to am: Ekj weet goot, daut hee aum jinjsten Dach oppstonen woat, wan de Doodes oppstonen. #Mat 22,23-33; Joh 5,28-29; 6,40 25Jesus säd to ar: Ekj sie dee, dee de Doodes oppwakjt un daut Läwen jeft. #11,25 Eenje oole Schreften sajen bloos dee de Doodes oppwakjt. Wäa aun mie jleeft, woat läwen, wan hee uk stoaft. 26Un wäa doa läft un aun mie jleeft, woat niemols stoawen. Jleefst du daut? #Joh 8,51 27See säd to am: Jo, Har, ekj jleew, daut du de Christus, Gott sien Sän, best, dee en dise Welt nenn jekomen es. #Mat 16,16

28Un aus see dit jesajcht haud, jinkj see un roopt stell äare Sesta Maria: De Har es hia un roopt die. 29Sooboolt aus Maria daut hieed, stunt see opp un kjeem no am. 30Jesus wia noch nich bat em Darp nenn jekomen, oba wia noch doa, wua Marta am bejäajent wia. 31Aus de Juden, dee bie Maria em Hus wieren ar to treesten, sagen, daut see bosich oppstunt un rutjinkj, jinjen see ar hinjaraun un säden: See jeit nom Grauf, om doa to hielen.

32Aus Maria bat doa kjeem, wua Jesus wia, un am sach, kjneed see sikj ver am dol soo aus am auntobäden, un säd: Har, wan du wieescht hia jewast, wia mien Brooda nich jestorwen. 33Aus Jesus ar hielen sach, un daut de Juden, dee met ar wieren, uk hielden, wort hee en sienem Jeist sea oppjeräacht un am foll daut sea schwoa. #Joh 13,21 34Un hee säd: Wua hab jie am hanjelajcht? See säden to am: Har, komm un kjikj! 35Un Jesus hield. 36Dan säden de Juden: Kjikjt, woo goot hee däm wia! 37Eenje von an säden: Kunn dee, dee däm blinjen de Uagen opmuak, nich waut jedonen haben, daut dis Maun nich jestorwen wia? #Joh 9,7

38Jesus wort noch eemol deep oppjeräacht, un soo kjeem hee nom Grauf. Daut wia eene Heel, un een Steen lach ver daut opne Enj. #Mat 27,60 39Jesus säd: Nämt dän Steen wajch! Marta, däm Dooden siene Sesta, säd to am: Har, dee stinkjt aul, wiels hee es aul vea Doag doot. 40Jesus säd to ar: Säd ekj die nich, wan du jleefst, dan wurscht du Gott siene Harlichkjeit seenen? 41Dan neemen see dän Steen wajch. Un Jesus kjikjt enne Hecht un säd: Voda, ekj dank die, daut du mie jehieet hast. 42Un ekj weet, daut du mie emma hieescht. Oba wäajen daut Volkj, daut om mie steit, saj ekj dit, daut see jleewen kjennen, daut du mie jeschekjt hast. #Joh 12,30 43Aus Jesus dit jesajcht haud, roopt hee met eene lude Stemm: Lazarus, komm rut! 44Un de jestorwna Maun kjeem rut, Henj un Feet met Grauf Loakes bewekjelt un een Schweetduak äwa daut Jesecht jebungen. Jesus säd to an: Leest am aules auf un lot am gonen!

45Un väle von de Juden, dee jekomen wieren, om Maria to besieekjen, aus see sagen, waut Jesus deed, jleewden aun am.

Eena saul fa daut Volkj stoawen

46Oba eenje jinjen un vetalden de Farisäa, waut Jesus jedonen haud. 47Dan saumelden de Huagepriesta un Farisäa äaren Rot un säden: Waut sell wie doonen? Dis Maun deit väl Wundatieekjens. #Mat 26,3-4 48Wan wie däm hiamet toch loten, woat aulemaun aun am jleewen, un dan woaren de Reema komen un ons Launt un Lied wajchnämen. 49Kaifas, eena von an, dee daut Joa Huagapriesta wia, säd to an: Jie weeten äwahaupt nuscht. 50Un jie denkjen uk nich doaraun, daut daut fa ons bäta sennen wudd, daut een Maun fa daut Volkj wudd stoawen, aus wan daut gaunze Volkj wudd togrunt gonen. #Joh 18,14 51Dit säd hee nich ut sikj selfst, oba wiels hee daut Joa Huagapriesta wia profezeid hee doamet, daut Jesus fa daut Volkj stoawen wudd. 52Un nich bloos fa daut Volkj, oba uk, daut dee äwa de gaunze Welt vestreide Gotteskjinja wudden toop jebrocht woaren, om aula eent to sennen. #Joh 7,35; 10,16; 1Joh 2,2 53Von däm Dach aun plonden see, am doot to moaken. 54Doawäajen jinkj Jesus nich mea frie em opnen mank de Juden. Hee trock sikj trigj no eene Jäajent dicht aun de Wiltnis, no de Staut Efraim, un bleef doa met siene Jinja. #2Sam 13,23

55Daut judsche Passafast wia dicht bie, un väle von em Launt jinjen aul ver daut Fast no Jerusalem, sikj to reinjen. #2Chr 30,17-18 56Doa sochten see no Jesus, un aus see em Tempel stunden, fruagen see sikj unjarenaunda: Waut denkj jie? Woat hee äwahaupt nich toom Fast komen? 57Nu hauden de Huagepriesta un de Farisäa däm Volkj sajen loten, daut wan irjent wäa wist, wua Jesus wia, dan sullen see daut aunmalden, daut see am faust nämen kunnen.

Currently Selected:

Johanes 11: PB

Highlight

Copy