1. Mose 42
42
Jakob siene Säns kjeepen en Ägipten Jeträajd
1Aus Jakob enwort, daut doa en Ägipten Jeträajd to haben wia, säd hee to siene Säns: Wuarom kjikj jie junt bloos unjarenaunda aun? 2Horcht emol. Ekj hab jehieet daut en Ägipten Jeträajd to haben es. Got emol no Ägipten un kjeept Jeträajd fa ons, daut wie waut to äten haben un nich doot hungren. 3Un tieen von Josef siene Breeda reisden no Ägipten om Jeträajd to kjeepen. 4Oba Jakob schekjt Benjamin, Josef sienen Brooda, nich met, wiels hee enjst sikj daut däm waut woaren wudd.
5Soo muak sikj daut, daut Israel siene Säns, krakjt soo aus aundre, kjeepen kjeemen. En Kanaan wia uk Hungaschnoot.
6Josef wia de Gowernia äwa daut Launt, un vekoft doa Jeträajd aun de Menschen, dee doano kjeemen. Un Josef siene Breeda kjeemen un kjneeden sikj ver am met äare Jesechta bat oppe Ieed. 7Aus Josef siene Breeda sach, kjand hee an. Oba hee behaundeld an aus framde un räd groff met an. Von wua sent jie? fruach hee. Un see säden: Wie sent von daut Launt Kanaan jekomen, Jeträajd to kjeepen. 8Oba de Breeda kjanden am nich, wan hee an uk kjand. 9Un Josef docht aun de Dreem, dee hee emol von an jehaut haud. Un hee säd: Jie sent Spionen. Jie sent jekomen to seenen wua ons Launt schwak es. #1Mo 37,5-9 10Un see säden: Nä, mien Har. Wie sent aus diene Deena jekomen, Jeträajd to kjeepen. 11Wie sent aula Säns von eenen Maun. Wie sent opprechtich. Wie sent nich Spionen. 12Oba Josef säd to an: Nä, jie sent jekomen to seenen wua ons Launt schwak es. 13Un see säden: Wie, diene Deena, sent twalw Breeda, aula vom selwjen Voda. Wie komen von Kanaan. Ons jinjsta Brooda es met onsen Voda un een Brooda es nich mea. 14Oba Josef säd: Daut es bloos soo aus ekj jesajcht hab. Jie sent Spionen. 15Dit es woo ekj junt aufproowen woa. En däm Kjennich sienen Nomen saj ekj, jie woaren nich wajch kjennen von hia, buta jun jinjsta Brooda häa kjemt. 16Schekjt eenen von junt trigj junen Brooda holen, oba de äwaje bliewen hia em Jefenkjnis. Soo woa wie ieescht seenen auf jie de Woarheit räden. Aundasch saj ekj em Kjennich sienen Nomen, jie sent Spionen. 17Doaropp stopt hee an aula fa dree Doag em Jefenkjnis. #1Mo 37,24
18Aum dredden Dach säd Josef to an: Ekj sie een Mensch dee Gott ferchten deit. Ekj woa junt opp eene Bedinjunk gonen loten. 19Wan jie opprechtich sent, dan lot eenen von junt hia em Jefenkjnis bliewen un de äwaje lot no Hus gonen, om daut Jeträajd no june hungaje Famieljes to nämen. 20Dan brinj jie junen jinjsten Brooda häa, aus Oppwies fa june Wieed. Dan woa ekj junt aum Läwen loten. Un see weljden en.
21Un see säden eena toom aundren: Dit kjemt secha opp ons, wiels wie schuldich sent fa onsen Brooda. Wie sagen woo gaunz aum Enj hee wia, aus hee ons prachad, un wie horchten nich. Nu es dit doawäajen opp ons jekomen. #Psa 50,21 22Un Ruben säd: Säd ekj junt nich, daut jie junt nich vesindjen sullen jäajen am? Nu woa wie bestroft woaren doafäa, daut wie am doot muaken. #1Mo 37,21-22 23See wisten nich daut Josef an vestunt, wiels see met am derch eenen, dee fa an äwasaten deed, jerät hauden. 24Un hee dreid sikj een stootje wajch von an un hield ea hee wieda met an räd. Dan leet hee Simeon nämen un faustbinjen, aus see doa tookjikjten. 25Un Josef bestald daut äare Sakj met Jeträajd jefelt worden, un uk daut jiedrem sien Jelt trigj en sienen Sak jestopt sull woaren. Hee säd uk, daut an sull Äten fa de Reis jejäft woaren. Dit wort aula soo jedonen. 26Un see pakten äa Jeträajd opp äare Äsels un veleeten.
27Dan aus see to Nacht stelhilden un eena von an sienen Sak opmuak om sienen Äsel to foodren, sach hee daut Jelt bowen en sienen Sak. 28Un hee säd to siene Breeda: Mien Jelt es hia bowen en mienen Sak. Dit schluach an aula daut see flautaden. Waut haft Gott ons aunjedonen? fruagen see sikj.
29Aus see no äaren Voda Jakob kjeemen en Kanaan, vetalden see am aules waut an jeworden wia. See säden: 30De Gowernia doa räd groff met ons un jleewd wie wieren Spionen en äa Launt. 31Un wie säden am daut wie opprechtje Mana wieren un nich Spionen, 32daut wie twalw Breeda sent von eenen Voda, daut eena wajch es un daut de jinjsta noch tus bie onsen Voda wia en Kanaan. 33Dan säd de Gowernia to ons: Dit es woo ekj woa weeten daut jie opprechtje Mana sent. Lot eenem von junt Breeda hia bie mie, un nämt Jeträajd fa june hungaje Famieljes un dan go jie no Hus #1Mo 42,24 34un brinjen junen jinjsten Brooda häa. Dan woa ekj junt jleewen, daut jie opprechtich sent un nich Spionen. Dan jäw ekj junen Brooda trigj, un jie kjennen hia wieda kjeepen. 35Un aus see äare Sakj ladich muaken, wia doa en jiedren sien Sak uk sien Pinjel Jelt. Aus see, un uk äa Voda, de Pinjels met Jelt sagen, wieren see jeschloagen.
36Un Jakob, äa Voda, säd: Jie haben mie miene Kjinja wajch jenomen. Josef es nich mea, un nu es Simeon nich mea. Un dan well jie noch Benjamin met nämen. Aules rant jäajen mie. 37Un Ruben säd: Brinj miene beid Junges om, wan ekj am nich trigj brinj. Lot mie fa am oppkomen un ekj woa am trigjbrinjen. 38Oba Jakob säd: Mien Jung woat nich met junt met gonen. Sien Brooda es aul doot, un doa es mau dis eena jebläwen. Wan am irjent waut opp dee Reis woaren sull, wudd ekj truaren bat jie miene greiwe Hoa em Grauf läden.
Currently Selected:
1. Mose 42: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
