1. Mose 40
40
Josef em Jefenkjnis
1Eene jewesse Tiet lota, hauden däm ägiptischen Kjennich sien Enschenkja un sien Bakja däm Kjennich beleidicht. 2De Kjennich oajad sikj äwa de beid, 3un leet dee em Jefenkjnis stoppen. Daut wia daut Jefenkjnis von däm bowaschten von däm Kjennich siene Wajchta, daut selwje Jefenkjnis wua Josef uk faust wia. 4De bowaschta von de Wajchta stald Josef aun dee to deenen. Dee bleewen een natet stoot em Jefenkjnis.
5Eene Nacht, aus see doa em Jefenkjnis wieren, dreemden de Enschenkja un de Bakja jieda eenen Droom. Daut wieren veschiedne Dreem met veschiedne Diedungen. 6Aus Josef an zemorjes sach, wieren see aulebeid een bät veläajen. 7Un Josef fruach an beid: Wuarom lat daut junt vondoag bedrekjt? 8Un see säden: Wie haben latste Nacht Dreem jehaut, un doa es kjeena dee ons dee dieden kaun. Un Josef säd to an: Daut es doch bloos Gott, dee eenen Droom dieden kaun. Vetalt mie june Dreem. #1Mo 41,15-16; Dan 2,27-28
9Un soo vetald de bowaschta Enschenkja Josef sienen Droom. Hee säd: Ekj sach en mienen Droom eene Wienrank ver mie, 10dee dree Asta haud. Un soo boolt aus dee jreen worden blieejden dee, un boolt wieren doa riepe Wiendruwen aun. 11En miene Haunt haud ekj däm Kjennich sien Kuffel, un ekj drekjt de Sauft von de Wiendruwen en daut Kuffel nenn un jeef däm Kjennich daut enne Haunt. 12Un Josef säd to am: Dit es waut de Droom bediet. De dree Asta sent dree Doag. 13Om dree Doag woat de Kjennich die komen loten, un die en diene oole Städ aunstalen. Du woascht wada diene oole Oabeit haben un däm Kjennich sien Kuffel en siene Haunt jäwen. 14Wan daut wada goot met die jeit, dan denkj aun mie. Doo mie dän Jefaulen un räd to dän Kjennich von mie, daut ekj kunn ut dit Jefenkjnis rut komen. 15Mie haben see emol von de Hebräa äa Launt jestolen, un uk hia hab ekj nuscht veschulcht, daut ekj hia em Jefenkjnis sennen sull. #1Mo 37,28
16Aus de Bakja sach daut däm aundren siene Diedunk goot wia, säd hee to Josef: Ekj haud uk eenen Droom. Ekj haud dree Brootkjarw oppem Kopp. 17Em bowaschten wia veschiednet Jebaknis fa däm Kjennich, oba de Väajel kjeemen un freeten ut dän Korf opp mienen Kopp. 18Un Josef säd: Dit es waut dien Droom bediet. De dree Kjarw stalen dree Doag väa. 19Om dree Doag woat de Kjennich die komen loten, un dan woat hee dienen Kjarpa opp eenen Boom henjen. Un de Väajel woaren komen dien Fleesch fräten.
20Dan aum dredden Dach wia däm Kjennich sien Jeburtsdach, un hee leet däm Enschenkja un däm Bakja ver siene Mana komen. 21Un hee jeef däm Enschenkja wada sien väajet Aumt, soo daut hee wada däm Kjennich sien Kuffel am enne Henj jeef, 22un hee leet däm Bakja henjen, soo aus Josef daut jediet haud. 23De Enschenkja, oba, hilt Josef nich em Denkj un vegaut von am.
Currently Selected:
1. Mose 40: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.