1. Mose 33

Esau kjemt Jakob entjäajen

1Jakob kjikjt opp, un waut meest, hee sach Esau doa ver sikj komen un dee 400 Mana met am. Un Jakob vedeeld de Kjinja unja Lea, Rahel un de twee Kjäakjsches. #1Mo 32,7 2De twee Kjäakjsches met äare Kjinja wieren daut ieeschte, dan Lea un äare Kjinja no de Kjäakjsches, un dan Rahel un Josef daut latste. 3Jakob selfst jinkj veropp un kjneed sikj säwen mol, ea hee bat sienen Brooda kjeem. 4Esau rand am entjäajen un drekjt am. Hee omoarmd Jakob un kust am un hield. 5Aus Esau opp kjikjt un de Frues un Kjinja sach, säd hee: Wäa sent dise hia met die? Un Jakob säd: Dit sent de Kjinja, dee Gott en siene Jnod dienen Deena jejäft haft. #Psa 127,3 6Dan kjeemen de Kjäakjsches noda met äare Kjinja, un dee kjneeden sikj. 7Lea un äare Kjinja kjeemen uk noda un kjneeden sikj. Daut latste kjeemen Rahel un Josef un kjneeden sikj.

8Un Esau säd: Waut meensd du met aul dee, dee ekj daut ieeschte troff? Un Jakob säd: Daut wia een Jeschenkj fa die, daut ekj goot oppjenomen wudd sennen von die, mienen Harn. #1Mo 32,14-21 9Oba Esau säd: Ekj hab jenuach, mien Brooda. Hool waut du hast fa die selfst. 10Oba Jakob säd: Nä, bitscheen. Wan ekj goot oppjenomen woa von die, dan nemm daut Jeschenkj von mie. Ekj saj die, dien Jesecht seenen es fa mie aus wan ekj Gott sien Jesecht sach, soo jenstich hast du mie oppjenomen. #1Mo 32,31 11Gott es sea goot to mie jewast un ekj hab jenuach, doawäajen froag ekj die, bitscheen, nemm daut Jeschenkj aun. Soo räd hee Esau too, un dee neem daut.

12Un Esau säd: Well wie wieda reisen. Ekj woa ver die gonen. 13Oba Jakob säd: Mien Har, du weetst daut de Kjinja empfintlich sent, un daut ekj om de Sukjalwa un Schop beduat sie. Wan ekj dee fa eenen Dach too sea joag, woat de gaunze Häad doot gonen. 14Lot mienen Har ver sienen Deena veropp gonen. Ekj woa dan no die no Seir komen, soo aus ekj kaun met daut Vee un de Kjinja. 15Un Esau säd: Lot mie waut von miene Mana bie die loten. Oba Jakob säd: Wuarom wudd wie daut? Daut es jenuach daut du, mien Har, mie soo oppnemst. 16Un soo jinkj Esau trigj no Seir.

17Jakob reisd no Sukkot un bud sikj doa een Hus un bud Stalinj fa sien Vee. Doawäajen woat dee Städ Sukkot jenant. 18Un Jakob trock jlekjlich no de Staut Sichem en Kanaan, no däm daut hee ut Mesopotamien jereist wia. Hee stald sien Loaga buta de Staut opp. 19Un hee koft daut Stekj Launt, wua hee sien Loaga oppstald fa 100 Stekja von äa Jelt, von de Nokomen von Hamor, dee Sichem sien Voda wia. #Jos 24,32 20Hee stald doa eenen Aultoa opp. Dän nand hee: “Gott es Israel sien Gott”. #1Mo 12,7-8

Currently Selected:

1. Mose 33: PB

Highlight

Copy