Esra 6
6
De Kjennich stalt sikj opp de Juden äare Sied
1Dan säd de Kjennich Darius, daut en de Schauz Hiesa en Babel, wua de Bieekja oppbewoat worden, sull doano jesocht woaren. 2Un doa wort en de stoakj vesechade Städ Achmeta, waut en Medien licht, eene Schreftroll jefungen, wua dis Berecht jeschräwen stunt: 3En daut ieeschte Joa von Kjennich Kierus jeef de Kjennich Kierus Aunordnunk, daut Gotteshus en Jerusalem wada opptobuen to eene Städ, wua see Opfa brinjen kjennen. Un daut Fundament saul wada jelajcht woaren. De Hecht saul 30 Meeta sennen, un de Breed saul uk 30 Meeta sennen. 4Un opp dree Schicht behakte Steena saul eene Schicht Baulkjes komen. Un de kosten sellen von de Rejierungskaus jejäft woaren. 5Un daut goldne un selwane Jereetschoft, waut Nebukadnezar ut däm Tempel en Jerusalem jenomen un no Babel jebrocht haud, saul trigjejäft woaren, om daut dee wada no äaren Plauz em Gotteshus en Jerusalem komen.
6Nu hoolt junt von dise Sach wajch, du, Tatenai, aus Vewaulta äwa de Prowins aun jantsied Eufrat, un Schetar Bosnai met june Metoabeida, jie Aumtslied, waut aun jantsied Eufrat sent! 7Lot dee aun daut Gotteshus oabeiden, om daut de Juden äa Vewaulta un äare Leida daut Gotteshus opp de oole Städ wada oppbuen. 8Un buta däm lot ekj junt sajen, waut jie de Juden äare Leida jäwen sellen, om daut Gotteshus to buen. Doa saul von däm Kjennich sien Enkomen, waut von de Jäajent aun jantsied Eufrat enkjemt, pinkjlich jenomen un de Lied jejäft woaren, waut see toom buen brucken. 9Uk aules waut see aun Brauntopfa brucken fa dän Gott em Himmel, Bolles, Schopsbakj un Lama, uk Weit, Solt, Wien un Eelj, saul de Priesta en Jerusalem pinkjlich jieda Dach jejäft woaren. Un daut saul uk nich veschloft woaren, daut to leewren, 10om daut see däm Gott em Himmel Opfa brinjen, wua hee jefaulen aun finjt. Un see sellen doabie fa dän Kjennich un siene Säns äa Läwen bäden. 11Wieda woat von mie aunjeordnet: Wan irjent wäa dise Aunordnunk äwaträden deit, dan saul een Baulkjen ut sien Hus rutjeräten un hee selfst aun dän oppjerechten Baulkjen aunjenoagelt woaren. Un sien Hus saul to een Auschklompen jemoakt woaren wäajen waut hee deed. 12Dee Gott oba, dee sienen Nomen dort wonen lat, venicht jieda Kjennich un jieda Volkj, dee vesieekjen woaren, dise Aunordnunk to äwaträden un daut Gotteshus en Jerusalem to vestieren. Ekj, Darius, hab dise Aunordnunk jejäft, om daut dee jeneiw utjefieet woat.
De Tempelbu woat foadich jemoakt
13Dan haundelden Tatenai, de persischa Vewaulta von de wastne Sied Eufrat, un Schetar Bosnai un äare Metoabeida jeneiw no daut, waut de Kjennich Darius an jesajcht haud. 14Un de Juden äare Leida buden, un daut jinkj bosich väarewajch wiels de Profeeten Hagai un Sacharja, Ido sien Sän, an em Nomen Gottes Moot muaken met äa profezeien. Un see buden un muaken daut foadich no daut Wuat von Israel äaren Gott un no de Aunordnungen von de persische Kjennichs Kierus, Darius un Artahsasta. 15Un de Tempelbu wort foadich aum 3. Dach en de Moonat Adar em 6. Rejierungsjoa von Kjennich Darius. 16Un aule Israeliten, de Priesta, de Leviten un de aundre, waut ut de Jefangenschoft trigjekomen wieren, weiden met freiden dän Tempel en. #1Kjen 8,62-66 17Bie de Tempel Enweiunk opfaden see 100 Bolles, 200 Schopsbakj un 400 Lama, un aus Sindopfa fa gaunz Israel twalf Kosenbakj, fa jieda Staum eenen. #4Mo 7,10 18See stalden uk de Priesta no äare Deenstgruppen opp un de Leviten no äare Aufdeelungen toom Deenst aum Gotteshus en Jerusalem, soo aus daut em Jesaz Moses jeschräwen steit. #4Mo 3,6
Daut Passafast
19Un aum 14. Dach en de 1. Moonat fieeden dee, dee ut de Jefangenschoft trigjekomen wieren, daut Passafast. #2Mo 12,6 20Von de Priesta un Leviten hauden sikj aule Mana jereinicht, soo daut see aula rein wieren, un de Leviten schlachten de Passalama fa aul dee, dee ut de Jefangenschoft trigjekomen wieren, un uk fa äare Breeda, de Priesta, un fa sikj selfst. 21Un nich bloos de trigjekomne Israeliten eeten daut Passamol, uk aul dee, dee sikj von de Enwona, waut em Launt wonden, äare Onreinheit wajchjedreit hauden, om Israel äaren Gott to sieekjen. #5Mo 16,1-8 22Un see fieeden daut met onjesuadet Broot säwen Doag lank un freiden sikj doabie. De Har haud an froo jemoakt un däm Kjennich von Assur sien Hoat opp äare Sied jedreit. Soo haud de Gott en Israel an jestoakjt to de Oabeit aum Gotteshus.
Currently Selected:
Esra 6: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
