Esra 4
4
De Juden loten de Samarita nich aun dän Tempelbu deelnämen
1Aus Juda un Benjamin äare Fiend daut oba hieeden, daut dee, dee ut de Jefangenschoft trigjekomen wieren, däm Harn, Israel äaren Gott, sienen Tempel wada oppbuden, 2kjeemen see no Serubabel un de Leida von de Volkjsgruppen un säden to an: Wie wellen met junt toop buen, wiels wie uk junen Gott sieekjen un am von don aun Opfa jebrocht haben aus Asarhadon, de Kjennich von Assur, ons hia aunjesiedelt haft. #2Kjen 17,24-33; 19,37; Jer 41,5 3Oba Serubabel un Jeschua un de aundre Leida von de Volkjsgruppen en Israel auntwuaden an: Daut jehieet sikj nich, daut jie un wie toop onsen Gott sien Hus buen! Wiels wie wellen däm Harn, Israel äaren Gott, auleen eenen Tempel buen, soo aus Kierus, de Kjennich von Persien, jesajcht haft. 4Dan muak daut Volkj em Launt de Juden mootloos un schrakjt an vom buen trigj. 5See bekoften Rotjäwasch jäajen an un vehindaden äa Väanämen, soolang aus Kierus, de Kjennich von Persien, läwd, un bat en de Rejierungstiet von Darius, däm Kjennich von Persien. #Esra 4,24
De oppbu von Jerusalem un de Tempelbu woaren Oppjeschowen
6Un aus Ahasveros Kjennich wia, aum Aunfank von siene Rejierungstiet, wort een Kloagbreef jäajen de Enwona von Juda un Jerusalem jeschräwen.
7Un en de Rejierungstiet von Artahsasta schreewen Bischlam, Mitredat, Tabeel un äare aundre Metoabeida aun Artahsasta, dän Kjennich von Persien. De Breef wia met aramäische Schreft jeschräwen, un en Aramäisch äwasat worden. 8De Befälshaba Rehum un de Schriewa Schimschai schreewen eenen Breef jäajen Jerusalem aun dän Kjennich Artahsasta: 9Von Rehum, de Befälshaba, un Schimschai, de Schriewa, un de aundre Metoabeida, de Rechta, de Befälshaba, de Schriewasch un de Vewaultasch, un uk de Mana von Erech, von Babel un von Susa, daut sent de Elamita, 10un de Veträda von de aundre Volkjsgruppen, waut de groota un veieeda Kjennich Asenapar häajebrocht un en de Staut Samaria un en de aundre Siedlungen aun jantsied Eufrat aunjesiedelt haft. 11Un dit es de Aufschreft von däm Breef, waut see am schekjten: Aun Kjennich Artahsasta, von diene Deena, de Mana von de wastne Sied Eufrat. 12Wie haben däm Kjennich daut weetenjeloten, daut de Juden, waut von die häajetrocken un no ons no Jerusalem jekomen sent, de beese Staut, waut emma Striet aunrechten deit, wada oppbuen wellen. See haben aunjefongen de Stautsmieren wada opptorechten; daut Fundament haben see aul utjebätat. 13Mucht de Kjennich daut bedenkjen: Wan dise Staut wada oppjebut woat un de Mieren wada oppjerecht woaren, dan woaren de Enwona dän Taks, de Aufgowen un dän Zoll nich mea tolen, un daut woat däm Kjennich siene Kaus nohäa Schoden brinjen. 14Wiels wie oba daut Solt vom Kjennichshus äten un daut nich lenja aunseenen kjennen, wan siene Rajchten en Froag jestalt woaren, doawäajen schekj wie han un loten däm Kjennich daut weeten. 15Lot en de Chroniken von diene Vodasch sieekjen, dan woascht du en de Chroniken finjen un fauststalen, daut dise Staut väl Striet aunjerecht haft un Kjennichs un Lenda Schoden jebrocht haft. Von oole Tieden aun haft dise Staut Striet aunjerecht, un doawäajen es dise Staut uk vestieet worden. 16Un nu lot wie däm Kjennich daut weeten, daut du nohäa nuscht hoolen woascht von de Prowins waut aun de wastne Sied Eufrat licht, wan dise Staut wada oppjebut woat un äare Mieren wada oppjerecht woaren.
17Dan schekjt de Kjennich dise Auntwuat: Aun dän Befälshaba Rehum, dän Schriewa Schimschai un äare aundre Metoabeida, dee en Samaria un en de aundre Siedlungen en de Prowins aun de wastne Sied Eufrat wonen: De Frädensgruss toieescht! 18Un dan, de Breef, dän jie ons jeschekjt haben, es mie Wuat fa Wuat väajeläst worden. 19Un von mie es aunjeordnet worden notoforschen, un daut es bewäsen worden, daut dise Staut sikj von jeehäa de Kjennichs jäajenaun jestalt haft un daut Wadastaunt un Auffaul en äa passieet es. 20Un daut haft uk Kjennichs met eene groote Macht en Jerusalem jejäft, dee äwa aules rejieet haben, waut aun jantsied Eufrat es, soo daut an Taks, Aufgowen un Zoll jejäft wort. 21Nu doot aunordnen, de Mana doaraun to hindren, om daut de Staut nich wada oppjebut woat, bat ekj eene kloare Auntwuat doatoo jäwen woa! 22Kjikjt doano, daut jie dit nich lang vetrakjen loten, daut nich een groota Schoden fa de Kjennichs oppkjemt.
23Aus de Breef von däm Kjennich Artahsasta dan von Rehum un däm Schriewa Schimschai un äare aundre Metoabeida jeläst wort, dan reisden see bosich no Jerusalem un wäaden de Juden met Jewault. 24Dan wort de Oabeit aum Gotteshus en Jerusalem aufjebroaken un bleef ligjen bat en daut 2. Rejierungsjoa von Darius, däm Kjennich von Persien. #Esra 4,5; 6,15
Currently Selected:
Esra 4: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.