Isaias 38
38
Ang Pagkasakit ug Pagkaayo ni Ezequias
(2 Hari 20:1-11; 2 Cron. 32:24-26)
1Niadtong mga adlawa nasakit si Hari Ezequias ug himalatyon na. Giadto siya ni Isaias, ang propeta nga anak ni Amos, ug giingnan, “Nag-ingon ang Ginoo nga dili ka na mamaayo pa ug mamatay ka na busa pangandam.”
2Miatubang si Ezequias sa bungbong ug nag-ampo sa Ginoo. 3Miingon siya, “O Ginoo, hinumdomi intawon ang akong pagkinabuhi nga matinud-anon sa imong atubangan ug ang kinasingkasing kong pag-alagad kanimo.” Unya midanguyngoy siya pag-ayo.
4Ug giingnan sa Ginoo si Isaias. 5“Adtoa si Ezequias ug sultihi nga nag-ingon ako, ang Ginoo, ang Dios ni David nga imong kagikan. Nadungog ko ang imong pag-ampo ug nakita ko ang imong mga luha busa dugangan kog 15 ka tuig ang imong kinabuhi. 6Luwason ko ikaw ug kining siyudara gikan sa hari sa Asiria, ug magpadayon sa pagpanalipod niini.”
21Gisultihan ni Isaias ang hari sa pagbutang nganha sa iyang hubag ug papilit nga hinimo gikan sa igos ug mamaayo siya. 22Unya nangutana si Hari Ezequias, “Unsa may ilhanan ug magmatuod nga makaadto ako sa Templo sa Ginoo?”#38:22 Ang bersikulo 21-22 gikan sa kataposang bahin sa kapitulo (tan-awa sa 2 Hari 20:6-9). May mga sinulat nga wala maglakip niini.
7Si Isaias mitubag, “Mao kini ang ilhanan nga ihatag sa Ginoo kanimo nga tumanon gayod niya ang iyang gisaad: 8Pabalikon niyag napulo ka lakang ang landong sa adlaw sa orasan ni Ahaz.” Ug natuman kini.
9Mao kini ang gisulat ni Ezequias, ang hari sa Juda, human siya maayo sa iyang sakit.
10Gipakaingon kog mamatay ako sa kaudtohon sa akong kinabuhi,
ug magpabilin na didto sa Seol hangtod sa hangtod.
11Gipakaingon kog dili ko na makita ang Ginoo dinhi niining kinabuhia,
ug dili na ako makahigayon sa pagpakigkita sa akong isigkatawo dinhi niining kalibotana.
12Ang akong kinabuhi giibot ug gikuha gikan kanako
sama sa tolda sa magbalantayg karnero;
sama sa usa ka maghahabol,
gilukot mo ang akong kinabuhi ug giputol gikan sa hablanan.
Gisakit mo ako sa adlaw ug gabii#38:12 Gisakit…gabii: Dili klaro sa Hebreo.
13ug nagbuntag akog tuaw sa pagpakitabang.
Daw gidugmok sa usa ka liyon ang akong kabukogan;
gipakaingon kog buot mo na akong patyon.
14Sama sa langgam nga sayaw ug tabon, nagpanawag ako
ug miagulo daw salampati.
Lapoy na ang akong mata tungod sa pagpunayg hangad sa langit.
Nag-antos ako sa kasakit, O Ginoo;
luwasa intawon ako!
15Apan unsa may mahimo ko nga gisultihan na man ako sa Ginoo niini,
ug siya man mismo maoy nagbuhat niini?
Dili na ako makatulog tungod sa kaguol.#38:15 Dili na…kaguol: Sa Hebreo dili klaro.
16O Ginoo, ang akong kalag mabuhi uban kanimo,
busa hatagig pahulay ang akong espiritu.#38:16 Dili klaro sa Hebreo.
Ibalik kanako ang maayong panglawas
ug lugwayi ang akong kinabuhi.
17Ang kapaitan nga akong nahiagoman
alang ra usab sa akong kaayohan,
apan giluwas#38:17giluwas: Sa Hebreo, gihigugma. mo ang akong kinabuhi gikan sa gahong sa kalaglagan
ug gikalimtan mo ang tanan kong mga sala.
18Kay#Sir. 17:27; Bar. 2:17. ang Seol dili man makapasalamat kanimo,
dili makadayeg kanimo ang kamatayon;
kadtong atua na sa lubnganan
dili na makapaabot sa imong panabang.
19Ang mga buhi lamang maoy magpasalamat kanimo
sama sa akong gibuhat karon;
ang mga amahan mosugilon ngadto sa ilang mga anak bahin sa imong kaayo.
20O Ginoo, giayo mo ako
busa mag-awit kami kanunay didto sa imong Templo
dinuyogan sa mga instrumentong may kuwerdas.#38:20 Ang mga bersikulo 21-22 nga mosunod unta dinhi gisal-ot human sa bersikulo 6.
Currently Selected:
Isaias 38: RCPV
Highlight
Share
Copy
Want to have your highlights saved across all your devices? Sign up or sign in
© 1999 Philippine Bible Society
