Isaias 29
29
Ang Gidangatan sa Jerusalem
1Alaot ka, O Ariel,#29:1 ARIEL: Nagkahulogan ug daubanan sa mga halad alang sa Dios. ang siyudad nga gikampohan ni David!
Palabya ang usa o duha ka tuig
uban sa mga kasaulogan niini.
2Unya silotan sa Dios ang siyudad nga ginganlag “Ariel.”
Ug unya may maghilak ug magminatay,
ug ang siyudad mahisama sa mga halaran sa mga mananap nga sunogon.
3Sulongon ka sa Dios ug palibutan,
ug magbuhat siyag mga tore ug mga trenseras batok kanimo.
4Unya malumpag ka;
ug gikan sa imong nahimutangan mabati ang imong tingog,
daw tingog sa multo nga lugos madungog,
daw hagawhaw lamang.
5Apan ang imong mga kaaway mapulpog sama sa abog,
ug ipadpad sa hangin sama sa uhot.
Ug unya sa kalit
6luwason ka sa Ginoo nga Labing Gamhanan pinaagig linog ug bagyo;
magpadala siyag nagdilaab nga kalayo ug alimpulos;
7mahanaw sama sa damgo, sama sa panan-awon sa gabii,
ang tanang mosulong sa Ariel lakip ang ilang mga hinagiban.
8Sama sa mahitabo sa usa ka tawo nga gigutom unya magdamgo nga siya nagkaon
ug mahigmata nga gigutom gihapon,
o sama sa giuhaw nga nagdamgo nga siya nag-inom
ug mahigmata nga giuhaw gihapon.
Ingon niana ang mahitabo sa tanang nasod nga mosulong sa Bukid sa Sion.
Mga Pasidaan nga Wala Panumbalinga
9Sigi, paghinanggaw kamo
ug liboga ang inyong mga ulo;
taptapi ang inyong mga mata
aron dili kamo makakita!
Paghubog kamo apan dili sa bino;
pagsusapinday#29:9 Paghubog…pagsusapinday: Sa Hebreo, Nangahubog sila…nagsusapinday. apan dili gumikan sa isog nga ilimnon!
10Kay#Rom. 11:8. gibuboan kamo sa Ginoo sa espiritu sa paghinanok,
ug gitabonan niya ang inyong mga mata,
kamong mga propeta,
ug gipandongan ang inyong mga ulo,
kamong mga manalagna.
11Ang kahulogan sa matag panan-awon mahimong sama sa usa ka basahon nga sirado. Kon ipabasa kini sa tawong makabasa moingon siya, “Unsaon ko pagbasa niini nga sirado man kini?” 12Ug unya kon ipabasa nila kini sa dili maantigong mobasa, siya moingon, “Dili ako maantigong mobasa.”
13Ug#Mat. 15:8-9; Mar. 7:6-7. miingon ang Ginoo,
“Kining mga tawhana nagpasidungog kanako sa pulong lamang,
apan ang ilang mga kasingkasing halayo kanako,
ug ang ilang pagtamod sa akong mga sugo
sama ra sa ilang pagtamod sa sugo sa mga tawo,
pinaagi sa pagsag-ulo.
14Busa#1 Cor. 1:19. mahikurat na lamang sila
kay pahamtangan ko man sila sa nagsunodsunod nga hampak;
makawang ang kaalam sa ilang maalamon,
ug dili na makasabot ang masinabuton.”
Paglaom sa Umaabot
15Alaot kadtong nagtago sa ilang plano gikan sa Ginoo,
ug gusto magbuhat diha sa kangitngit
ug nag-ingon, “Walay makakita kanamo o masayod sa among gibuhat.”
16Gibalit-ad#Is. 45:9; Sir. 33:13; Rom. 9:20. nila ang mga butang!
Mas importante ba diay ang lapok
kay sa magbubuhat ug kulon?
Makaingon ba ang binuhat sa iyang magbubuhat,
“Dili ikaw maoy nagbuhat kanako;
wala kay igong panabot?”
17Dili na madugay nga ang Lebanon
mahimong usa ka uma nga daghag abot
ug mahisama na usab sa usa ka lasang.
18Niadtong adlawa ang bungol makadungog na kon basahan siyag basahon,
ug ang mga buta nga nagpuyo sa kangitngit makakita na.
19Makakaplag na usab ug kalipay diha sa Ginoo ang mga maaghop,
ug ang mga kabos magmaya tungod sa Balaang Dios sa Israel.
20Mahanaw ang mga tawong bangis
ug mawagtang ang mga mabugalbugalon,
ug puohon ang tanan nga mahigugmaon sa pagbuhat ug daotan.
21Puohon sa Dios ang nagbutangbutang sa iyang isigkatawo,
ug naglaang sa tawo nga naglaban sa katarong,
ug kadtong naghikaw ug hustisya
sa mga inosente pinaagi sa paglimbong.
22Busa mao kini ang gisulti sa Ginoo, ang Dios sa Israel nga nagluwas kang Abraham sa iyang kalisdanan, mahitungod sa banay ni Jacob:
“Katawhan ko, dili na kamo maulawan pag-usab,
o mangluspad sa kaulaw.
23Inigkakita ninyo sa inyong kaliwat nga akong ihatag kaninyo,
pasidunggan ninyo ang akong ngalan;
simbahon ninyo ang Dios ni Jacob,
ug kahadlokan ninyo ang Dios sa Israel.
24Unya sila nga nangalibog makasabot na unya
ug ang mga gahig ulo motuman na sa akong sugo.”
Currently Selected:
Isaias 29: RCPV
Highlight
Share
Copy
Want to have your highlights saved across all your devices? Sign up or sign in
© 1999 Philippine Bible Society
