Oseas 7
7
1“Sa dihang ayohon ug pauswagon ko na usab ang Israel,
ang akong makita mao lamang ang pagkadaotan sa Efraim
ug ang daotang binuhatan sa Samaria.#7:1 ISRAEL…EFRAIM…SAMARIA: Ang unang duha ka ngalan maoy lainlaing ngalan sa amihanang gingharian sa nabahin nga Israel ug ang Samaria mao ang ulohan siyudad. (Tan-awa usab sa 4:17.)
Nanglimbong sila,
nangawat diha sa kabalayan
ug nanulis didto sa gawas.
2Wala nila damha nga hinumdoman ko
ang tanan nilang daotang buhat.
Karon gilibotan sila sa daotan nilang binuhatan
ug nasayod ako niini.”
Gibudhian sa mga Tawo ang Ilang Hari ug mga Kadagkoan
3Ang Ginoo miingon,
“Nalimbongan nila ang hari,
ug ang mga kadagkoan nadala sa ilang pagpanglingla.
4Maluibon silang tanan,
sama sa hudno nga init kaayo,
ug dili na kinahanglang sugnoran pa, sukad sa pagmasa sa harina hangtod nga kini motubo.
5Sa dihang naghimog kasaulogan ang hari,
nangahubog ang mga kadagkoan;
nakighugoyhugoy siya sa mga mayubiton.
6Sama sa hudno, nagdilaab ang ilang kasingkasing#7:6 nagdilaab ang ilang kasingkasing: Sa Hebreo, giduol nila siya uban… sa laraw nga daotan;
sa tibuok gabii nagbaga ang ilang kasuko,
ug sa pagkabuntag mosilaob kini.
7Init silang tanan daw hudno
ug gilamoy nila ang ilang mga pangulo.
Nangapukan ang tanan nilang hari
ug walay usa kanila nga misangpit kanako.”
Israel ug ang mga Kanasoran
8Ang Ginoo miingon,
“Ang katawhan sa Efraim sama sa pan nga katunga ray naluto.
Nagsalig sila sa mga nasod nga naglibot kanila.
9Wala sila makaamgo nga ang ilang pagsalig sa mga langyaw nakaut-ot sa ilang kusog.
Inihap na lamang ang ilang mga adlaw
apan wala sila masayod niini.
10Ang pagkamapahitas-on sa katawhan sa Israel nagsaksi batok kanila,
apan wala sila mangita o mobalik kanako, ang Ginoo nga ilang Dios.
11Sama sa salampati ang Efraim, hungog ug walay buot;
nagpakitabang siya sa Ehipto unya midangop sa Asiria.
12Inigpanglakat nila,
taktakan ko sila sa akong pukot;
dakpon ko sila sama sa mga langgam;
kastigohon ko sila tungod sa daotan nilang binuhatan.#7:12 daotan nilang binuhatan: Sa Hebreo, taho ngadto sa ilang katawhan.
13Alaot sila kay mibulag man kanako!
Laglagon ko sila kay misupil man kanako!
Buot ko silang luwason,
apan nanulti silag bakak batok kanako.
14Dili kinasingkasing ang ilang pagsangpit kanako,
apan nagminatay sila sa ilang higdaanan;
sama sa ubang tawo nga wala moila kanako,
gisamadsamaran nila ang ilang kaugalingon inigpangayo nilag pagkaon ug bino.
O pagkamasupilon gayod nila!
15Bisag gibansay ug gilig-on ko ang ilang mga bukton,
naglaraw gihapon silag daotan batok kanako.
16Midangop sila sa mga diosdios;
sama sila sa pana nga misumbalik;
mangamatay sa espada ang ilang mga kadagkoan,
kay mapahitas-on man silag sinultihan.
Kataw-an sila sa mga Ehiptohanon.”
Currently Selected:
Oseas 7: RCPV
Highlight
Share
Copy
Want to have your highlights saved across all your devices? Sign up or sign in
© 1999 Philippine Bible Society
