Genesis 26

Didto si Isaac sa Gerar ug sa Berseba

1May lain na usab nga gutom nga miabot niadtong dapita gawas niadtong gutom sa panahon ni Abraham. Miadto si Isaac kang Abimelec, ang hari sa mga Filistihanon didto sa Gerar. 2Unya ang Ginoo mipakita kang Isaac ug miingon, “Ayaw pag-adto sa Ehipto. Puyo sa dapit nga itudlo ko kanimo. 3Pabilin#Gen. 22:16-18. sa maong dapit kay ihatag ko kining yutaa kanimo ug sa imong mga kaliwat. Magauban ako kanimo ug panalanginan ko ikaw. Tumanon ko ang akong gisaad sa imong amahan nga si Abraham. 4Padaghanon ko ang imong mga kaliwat sama kadaghan sa mga bituon sa langit ug ihatag ko kanila kining yutaa. Mangaliyupo unya ang tanang kanasoran sa kalibotan nga panalanginan ko sila sama sa pagpanalangin ko sa imong mga kaliwat 5kay nagtuman man si Abraham sa tanan kong gisugo kaniya.”

6Busa mipuyo si Isaac sa Gerar. 7Unya#Gen. 12:13; 20:2. sa dihang gipangutana siya sa mga lalaking molupyo sa maong dapit bahin sa iyang asawa, mitubag siya, “Igsoon ko siya.” Gihimo niya kini kay nahadlok man siya nga patyon tungod kang Rebecca kay guwapa man siya kaayo. 8Unya sa dugaydugay na si Isaac didto, nakita ni Abimelec gikan sa bintana sa iyang palasyo nga naggakosgakos si Isaac ug si Rebecca. 9Busa gipatawag ni Abimelec si Isaac ug giingnan, “Sa walay duhaduha asawa mo siya! Apan nganong miingon ka man nga igsoon mo siya?”

Si Isaac mitubag, “Nahadlok ako nga patyon ako sa mga tawo kon motug-an ako nga siya akong asawa.”

10Miingon si Abimelec, “Nganong gibuhat mo man kini kanamo? Kon gihilabtan pa sa usa sa akong mga sakop ang imong asawa, makasala unta kami tungod kanimo!” 11Unya gimandoan ni Abimelec ang tanang tawo nga dili nila pasipad-an si Isaac ug si Rebecca. Patyon ang magpasipala kanila.

12Unya nag-uma si Isaac sa maong dapit ug niadtong tuiga usa ka gatos ka pilo ang iyang naani sa iyang pinugas kay gipanalanginan man siya sa Ginoo. 13Nagpadayon siya sa pag-uswag hangtod nadato siya pag-ayo. 14Gikasinahan siya sa mga Filistihanon tungod kay daghan man siyag mga karnero ug mga baka. Daghan usab siyag mga ulipon. 15Busa gitabonan nilag yuta ang mga atabay nga kinalot sa mga sulugoon sa iyang amahan nga si Abraham sa buhi pa siya.

16Unya miingon si Abimelec kang Isaac, “Pahawa dinhi kay mas gamhanan pa man kamo kay kanamo.” 17Busa mibiya si Isaac ug didto na magpuyo sa Walog sa Gerar. 18Gipakalot niya pag-usab ang mga atabay nga gikalot kaniadto sa mga sulugoon sa iyang amahan nga si Abraham apan gitabonan sa mga Filistihanon sa pagkamatay na ni Abraham. Ug ginganlan ni Isaac ang maong mga atabay sa mao gihapong mga ngalan nga gingalan ni Abraham niini.

19Nagkalot ug atabay ang mga sulugoon ni Isaac didto sa walog ug nakakita silag tubod. 20Unya giaway sa mga bakero nga taga-Gerar ang mga bakero ni Isaac kay ila man kuno ang tubod. Busa ginganlag Esek#26:20 ESEK: Sa ato pa, Away. ni Isaac ang maong atabay kay giaway man siya sa taga-Gerar.

21Unya nagkalot na usab ug laing atabay ang mga sulugoon ni Isaac ug giaway na usab sila busa ginganlan ni Isaac ug Sitna#26:21 SITNA: Sa ato pa, Kasilag. ang maong atabay. 22Unya mibalhin siya sa laing dapit ug nagkalot didto ug laing atabay ug wala na siya samoka busa ginganlan niya kinig Rehobot.#26:22 REHOBOT: Sa ato pa, Kagawasan. Miingon siya, “Karon, gihatagan na gayod kita sa Ginoo ug kagawasan dinhi niining yutaa ug magmauswagon gayod kita dinhi.”

23Unya mibalhin si Isaac ngadto sa Berseba. 24Ug niadtong gabhiona mipakita ang Ginoo kaniya ug miingon, “Ako ang Dios ni Abraham nga imong amahan. Ayaw kahadlok kay ako nag-uban kanimo. Panalanginan ko ikaw ug padaghanon ko ang imong kaliwat tungod sa akong sulugoon nga si Abraham.”

25Ug naghimo si Isaac ug halaran didto ug gisimba niya ang Ginoo. Didto nagkampo siya ug gipakalot niyag atabay ang iyang mga sulugoon.

Ang Kasabotan ni Isaac ug ni Abimelec

26Unya#Gen. 21:22. gikan sa Gerar si Abimelec nakigkita kang Isaac. Kauban ni Abimelec ang iyang magtatambag nga si Ahuza ug ang heneral sa iyang kasundalohan nga si Picol. 27Nangutana si Isaac kanila, “Nganong nakigkita man kamo kanako nga kaniadto kaaway man ako ninyo ug gihinginlan man gani ako ninyo?”

28Ug mitubag sila, “Karon nasayod na kami nga nag-uban ang Dios kanimo. Busa nakahunahuna kami sa paghimog pinanumpaang kasabotan uban kanimo. Buot kami nga mosaad ka 29nga dili mo kami samukon ingon nga wala kami magsamok kanimo. Maayo kami kanimo ug wala ka namo hilabti sa pagbiya mo. Karon gipanalanginan ka sa Dios.” 30Unya naghimog kombira si Isaac alang kanila ug nangaon sila ug nanginom. 31Sayo sa buntag nagsinaaray sila inubanag panumpa. Unya gipagikan sila ni Isaac ug namauli sila nga may pakigdait.

32Niadtong adlawa miadto kaniya ang iyang mga sulugoon aron pagsugilon nga ang atabay nga ilang gikalot may tubig na. 33Ginganlan ni Isaac ang maong atabay ug Seba.#26:33 SEBA: Sa Hebreo, panumpa o pito. Tungod niini ang siyudad ginganlan ug Berseba hangtod karon.

Ang Langyaw nga mga Asawa ni Esau

34Nag-edad ug 40 ka tuig si Esau sa dihang nangasawa siya kang Judit nga anak ni Beeri nga Hitihanon. Nangasawa usab siya kang Basimat nga anak ni Elon nga Hitihanon usab. 35Ang mga asawa ni Esau nakapasubo pag-ayo kang Isaac ug kang Rebecca.

Currently Selected:

Genesis 26: RCPV

Highlight

Copy