Exodo 18
18
Si Jetro Miduaw kang Moises
1Ang ugangan ni Moises nga si Jetro, ang pari sa Midian, nakabalita sa tanan nga nabuhat sa Dios alang kang Moises ug sa mga Israelita ug giunsa sila pagdala sa Ginoo gawas sa Ehipto. 2Busa#Exo. 2:21-22. miadto siya kang Moises dala ang asawa ni Moises nga si Sefora nga gibilin ni Moises kaniya. 3Gidala#Buh. 7:29. usab ni Jetro ang duha ka anak ni Sefora nga si Gersom ug si Eliezer. (Si Moises miingon, “Langyaw ako.” Busa ginganlan niyag Gersom#18:3 GERSOM: Kining ngalana sama sa pulong sa Hebreo nga nagkahulogan ug dumuduong. ang usa niya ka anak nga lalaki. 4Miingon usab siya, “Ang Dios sa akong katigulangan mao ang akong katabang ug nagluwas kanako gikan sa espada sa hari sa Ehipto.” Busa ginganlan niyag Eliezer#18:4 ELIEZER: Kining ngalana sama sa pulong sa Hebreo nga nagkahulogan ug Mitabang kanako ang Dios. ang usa pa niya ka anak.) 5Si Jetro miabot uban sa asawa ug sa mga anak ni Moises didto sa kamingawan sa balaang bukid diin magkampo si Moises. 6Gipasugoan niya si Moises nga mangabot sila. 7Misugat si Moises kaniya ug miyukbo sa iyang atubangan ug mihalok kaniya. Nagpangomustahay sila ug unya nanulod sa tolda ni Moises. 8Gisuginlan siya ni Moises sa tanan nga gibuhat sa Dios ngadto sa hari sa Ehipto ug sa mga Ehiptohanon tungod ug alang sa mga Israelita. Gisugilon usab ni Moises kang Jetro ang mga kalisdanan nga ilang hiagian ug giunsa sila pagluwas sa Ginoo. 9Nalipay pag-ayo si Jetro tungod sa tanang kaayo sa Ginoo sa pagluwas kanila gikan sa mga Ehiptohanon. 10Miingon siya, “Dalaygon ang Ginoo nga nagluwas kaninyo gikan sa mga Ehiptohanon ug gikan sa hari sa Ehipto. 11Karon nasayod ako nga ang Ginoo mas gamhanan kay sa tanang dios kay gihimo niya kini sa dihang gidaugdaog sa mga Ehiptohanon ang mga Israelita.” 12Unya si Jetro nagkuhag halad nga sunogon ug ubang mga halad alang sa Dios. Si Aaron ug ang tanang mga kadagkoan sa Israel mikuyog kaniya aron makigsalo sa pagkaon sa halad agig pagsimba sa Dios.
Ang Pagtudlo ug mga Maghuhukom
(Deut. 1:9-18)
13Pagkasunod adlaw naghusay si Moises sa mga tawo nga nagkabingkil ug milungtad kini gikan sa buntag hangtod sa gabii. 14Sa pagkakita ni Jetro sa kadako sa buluhaton ni Moises nangutana siya, “Unsa man kining imong gibuhat alang sa katawhan? Nganong ikaw ra may naglingkod dinhi aron paghusay sa tanang mga tawo nga nagtindog sa imong atubangan gikan sa buntag hangtod sa gabii?”
15Si Moises mitubag, “Kinahanglan himoon ko kini kay ang mga tawo moari man kanako aron pagpakisayod sa buot ipabuhat sa Dios kanila. 16Kon may kasungian ang duha ka tawo, moanhi sila kanako ug akoy maghukom kinsa kanilay husto ug sultihan ko sila sa mga sugo ug mga balaod sa Dios.”
17Unya si Jetro miingon kaniya, “Dili husto ang imong gibuhat. 18Maugtas ka ug ang mga tawo kay bug-at ra kini kaayo alang kanimo. 19Paminaw kay tambagan ko ikaw ug ubanan ka unta sa Dios. Ikaw ang magrepresentar sa katawhan ngadto sa Dios ug dad-a ngadto kaniya ang ilang mga kasungian. 20Kinahanglan imo silang tudloan sa tanang mga balaod ug ipasabot kanila kon unsaon nila pagkinabuhi ug unsay angay nilang buhaton. 21Apan pagpilig mga tawo nga may katakos; kanang may kahadlok sa Dios, kasaligan ug dili kasubornohan. Unya himoa silang mga pangulo sa tag-1000, tag-100, tag-50 ug tag-10 ka mga tawo. 22Mag-alagad sila ingon nga permanenteng maghuhukom sa katawhan. Isang-at nila kanimo ang lisod nga mga problema apan sila ray maghusay sa gagmayng mga bingkilbingkil. Niining paagiha mahimong sayon ang imong mga buluhaton kay makatabang man sila kanimo. 23Kon buhaton mo kini sumala sa gisugo sa Dios, dili ka maugtas ug kining tanang katawhan makapauli sa ila nga nahusay na ang ilang mga kasungian.”
24Gituman ni Moises ang tambag ni Jetro. 25Nagpili siyag mga tawo nga may katakos ug gitudlo niya sila nga pangulo sa katawhan: sa 1000, sa 100, sa 50 ug 10 ka tawo. 26Nag-alagad sila ingon nga mga permanenteng maghuhukom sa katawhan. Gisang-at nila kang Moises ang lisod nga mga problema apan sila ray naghusay sa mga bingkilbingkil.
27Unya si Jetro nanamilit kang Moises ug mipauli sa iyang nasod.
Currently Selected:
Exodo 18: RCPV
Highlight
Share
Copy
Want to have your highlights saved across all your devices? Sign up or sign in
© 1999 Philippine Bible Society
