Amos 6

Ang Israel Laglagon

1Alaot gayod kamo nga nagpuyo nga haruhay diha sa Sion ug kamo nga nagtuo nga halayo kamo sa kakuyaw diha sa bukid sa Samaria—kamong mga dagkong tawo sa nasod sa Israel nga maoy dangpanan sa mga tawo. 2Adtoa ug tan-awa ang siyudad sa Calne. Unya adtoa ang siyudad sa Hamat ug padayon sa Gat nga siyudad sa mga Filistihanon. Mas maayo pa ba sila kay sa mga gingharian sa Juda ug sa Israel? Mas dako ba ang ilang teritoryo kay sa inyoha? 3Buot ninyong langanon ang pag-abot sa adlaw sa kasakitan apan ang inyong binuhatan nagpadali hinuon sa pag-abot niini. 4Alaot gayod kamo nga naghigda sa mga mahalon nga higdaanan ug nagkaon ug karne sa mga nating baka ug nating karnero. 5Gusto kamong magtagik ug mga awit sama sa gihimo ni David ug magtugtog sa mga alpa. 6Nagpatuyang kamog inom ug bino ug gidihogan ninyo ang inyong kaugalingon sa labing maayo nga pahumot apan wala kamo magbangotan sa pagkalaglag sa Israel. 7Busa kamo maoy unang mabihag ug ang inyong mga pista ug mga kombira matapos.

8Nanumpa ang Ginoong Dios nga Labing Gamhanan: “Gidumtan ko ang pagkamapahitas-on sa Israel. Gikasilagan ko ang ilang mga palasyo. Itugyan ko ngadto sa ilang kaaway ang ulohang siyudad ug ang tanan nga anaa niini.”

9Kon may napulo ka tawo nga mahibilin sa usa ka panimalay, mangamatay silang tanan. 10Kon kuhaon sa paryenti sa namatay ang haya ug sunogon kini, tawgon niya ang bisan kinsa diha sa balay, “May lain ka bang kauban diha?” Siya motubag, “Wala!”

Unya ang paryenti moingon, “Hilom! Magmatngon kita sa dili paghisgot bisan gani sa paghisgot sa ngalan ni Yahweh.”#6:10 Sa Hebreo ang tibuok bersikulo dili klaro. 11Inigmando sa Ginoo, magun-ob ang mga balay, dagko ug gagmay. 12Modagan ba ang mga kabayo diha sa mga dapit nga batoon? Darohon ba sa mga tawo ang dagat pinaagi sa baka? Apan gihimo ninyong hilo ang hustisya ug gituis ninyo ang husto.

13Nalipay kamo nga nailog ninyo ang lungsod sa Lodebar.#6:13 LODEBAR: Sa Hebreo kining ngalana sama pamation sa wala. Nag-ingon kamo, “Nakahimo kami pag-ilog sa Carnaim.”#6:13 CARNAIM: Ang ngalan niining gamayng lungsod nagkahulogan ug mga sungay nga simbolo sa kusog ug kalig-on.

14Ang Ginoo, ang Dios nga Labing Gamhanan nag-ingon, “Ipasulong ko kamo sa usa ka nasod, O katawhan sa Israel. Daugdaogon kamo niini gikan sa agianan sa Hamat diha sa amihanan hangtod sa Sapa sa Araba dapit sa habagatan.”

Currently Selected:

Amos 6: RCPV

Highlight

Copy