1 Timoteo 3
3
Mga Pangulo sa Simbahan
1Tinuod kining maong panultihon: Ang nagtinguha nga mahimong pangulo sa simbahan#3:1 pangulo sa simbahan o obispo: Sa Grego, episkupo, sa ato pa, tiglantaw sa tibuok simbahan. nagtinguha ug maayong buhat. 2Busa#Tit. 1:6-9. kinahanglang dili masaway ang pangulo sa simbahan, usa ray asawa,#3:2 usa ray asawa: o kausa ra maminyo. maugdang, mapugnganon sa kaugalingon, mahigugmaon sa kalinaw, maabiabihon, ug maantigong motudlo. 3Kinahanglang dili siya palahubog ug dili palaaway kondili malumo ug makigdaiton. Kinahanglan dili siya nawong ug kuwarta. 4Kinahanglang maayo siyang modumala sa iyang kaugalingong panimalay ug makapanton sa iyang mga anak aron sila magmasinugtanon ug magmatinahuron kaniya. 5Kay kon ang usa ka tawo dili maantigong modumala sa iyang kaugalingong panimalay, unsaon man niya pagdumala sa simbahan sa Dios? 6Kinahanglan nga siya dili bag-o pa lang nakabig kay tingali unyag magmapagarbohon siya pag-ayo ug tungod niini silotan siya ingon sa nahitabo sa Yawa. 7Kinahanglan nga tinahod usab siya sa mga dili sakop sa simbahan aron dili siya kaulawan ug mahulog sa lit-ag sa Yawa.
Mga Katabang diha sa Simbahan
8Kinahanglan nga ang mga katabang diha sa simbahan#3:8 katabang diha sa simbahan: Sa Grego, diakono, sa ato pa, alagad. Tan-awa sa Buhat 6:1-6. maayo usab ug kinaiya ug matinud-anon, dili magpalabig inom ug dili hakog ug salapi. 9Kinahanglan nga magpadayon sila sa paghupot sa gipadayag nga kamatuoran sa pagtuo inubanan sa putli nga konsensya. 10Ug kinahanglan nga sulayan una sila ug kon makita nga wala gayoy ikasaway kanila, makaalagad na sila. 11Kinahanglan nga ang mga babayeng katabang#3:11 mga babayeng katabang: o ilang mga asawa. maayo usab ug kinaiya ug dili tiglibak, maugdang, ug dili limbongan. 12Ang katabang sa simbahan kinahanglan usa ray asawa ug maantigong modumala sa iyang mga anak ug panimalay. 13Ug kadtong maayo sa ilang pag-alagad makaangkon ug dungog ug makahimo sa pagsulti nga maisogon mahitungod sa ilang pagtuo kang Cristo Jesus.
Ang Dakong Tinago
14Samtang gisulat ko kini, gilaoman ko nga sa dili madugay makaanha ako kanimo. 15Apan kon malangan ako, kining sulata maoy magtudlo kanimo kon unsaon nato sa pagkinabuhi diha sa balay sa Dios. Kanang balaya mao ang simbahan sa buhi nga Dios, ang haligi ug ang sukaranan sa kamatuoran! 16Walay makalimod unsa kadako ang tinago sa atong relihiyon:
Nagpakita siya ingon nga tawo,
ug namatud-an nga matarong pinaagi sa Espiritu,#3:16 namatud-an nga matarong pinaagi sa Espiritu: o diha sa espirituhanong kahimtang namatud-an nga matarong.
ug nakita siya sa mga anghel.
Giwali siya ngadto sa kanasoran,
gituohan dinhi sa kalibotan,
ug gibayaw ngadto sa langit.
Currently Selected:
1 Timoteo 3: RCPV
Highlight
Share
Copy
Want to have your highlights saved across all your devices? Sign up or sign in
© 1999 Philippine Bible Society
