Ap 17

Tz'e'ysb'il twitzju' qya nimaq ajpajil

1Tzajtzun jun kyxolju' wuq anjl q'i'nqe' wuk k'wab'l kyu'n, tzaj tma'n weye' kjalu: Kutzaja, kxel nyek'u'ne' tz'e'ysb'il twitzu' qya nimaq ajpajil teya ati kyib'aju' a'. 2Mache ajpajinju' nimaqkawil twitz tx'otx' tuk'i'l, ex mache tx'ojtu xjal najlqe' twitz tx'otx' tu'n b'in te tajpaji'n, chij.

3Inxi'tzun tiq'i'ne' anjl toj chq'ajlaj toju' tzaj tyek'u'n Xewb'aj weye'.

Wile' jun qya atzu' tokx tib'aj jun txkup kyeqti'j, tokyile b'iyj xmayb'ilte Dyos ti'jile, ate'toq wuq twi' ex lajoj tuk'a. 4Toktoq t-xb'alunju' qya lu kyaq ex tb'anil ka'yin, ex wiqo'nti'j kyu'n q'anpwaq, tb'anil ab'j ex cha'x ab'j. Tzyu'ntoq jun k'wab'l q'anpwaq tu'n nojni kyu'n ti'xti' ik'b'ajilx ex tu'n ttz'ilil tajpaji'n; 5tz'ib'a'ntoq jun tb'i tplaj te lab'te'n kjalu: Aju' nin B'ab'ilon, txub'aj kye ajpajil ex kye kykyaqilju' ik'b'ajilqe'x twitz tx'otx'. 6Eltzun nnik'tze' ti'ju' qya tx'ojteniltoq tu'n kychk'elju' xjan tnam ex tu'n kychk'elju' eb'ajkub'yo'n tu'n tpaj tziyalqe' ti'j Jesus.

Majx njaw sak'puje' tej nka'yinteye'. 7Tzajtzun tma'n anjl weye' kjalu: ¿Tiqu'n xsak'puja'ya? Kxe'l nma'ne' teya titi' tz'elpuna' qya lu exju' txkup iqalte, aju' ate' wuq twi' ex lajoj tuk'a. 8Ate' txkup xtila junte' itz'toq nejtl, ex mixti'tl ja'lo; oktzun jawitz toju' jul jaloja t-xelo na'mxtoq txi' toju' tz'e'ysb'il witzb'aj tejumajx. Aye'tzu'n xjal najlqe' twitz tx'otx' min tku'x kyb'i toju' u'j te chwinqlal tzajx tkub'len b'incha'n twitz tx'otx', che jawil sak'puj ajkyka'yinte txkup lu itz'toq nejtl ex mixti'tl, extzun tzul jumajtl.

9Nim nab'l tajb'il tu'n tkane ja'lu: Aye' wuq twi' in techla'n wuq witz q'uqliju' qya lu kyib'aj; ex nkyechla'n wuq nimaqkawil. 10Jwe'tzun kyxolju' nimaqkawil lu oje che kyim, atzun jun in kawin ja'lo, atzun juntl na'mx tkawin. Ajtzun tul, naq jte' q'ij kkawil. 11Aju' txkup itz'toq nejtl ex mixti'tl ja'lo, aju' twajxaqi'n nimaqkawil; jun kyxolju' wuq, tzul jumajtl kawil, ex kxe'l toj tz'e'ysb'il witzb'aj tejumajx.

12Aye' lajoj tuk'a ẍetila, lajoj nimaqkawilqe' na'mx ttzyet kykawin; tojtzun junkmuj che tenb'el te nimaqkawil junx tuk'i'lju' txkup. 13Che okyelju' lajoj nimaqkawil lu toj junx kyxim, ex kxel kyq'o'n toklen ex tipumalju' txkup. 14Che q'ojil ti'ju' Qpoj Tman rit; oktzun b'elkyi'j tu'n Qpoj Tman rit, aye' che tenb'elju' tuk'i'l aye' txko'nqe' ex sk'o'nqe' tu'n Dyos ex q'uqli kyk'u'j ti'j, qu'n ate' Qpoj Tman rit ati Toklen kyib'aj nimaq kyoklen ex kyib'aj nimaqkawil, chiju' anjl.

15Ex tzaj tma'n anjl weye' kjalu: Aye' a' ẍe'x tka'yi'na ja q'uqla' qya ajpajil, tnam qekye', xjalqe' chukchaq kyol ex txqan nimaqtnam. 16Aye'tzu'n lajoj tuk'a ẍe'x tka'yi'na exju' txkup, k'elel kyik'o'n qya ajpajil, ex kjel kykolb'e'n ex kjel kyẍb'iqb'a'n; kb'ajel kych'yo'n t-xmilal ex kb'ajel kytz'e'ysa'n tu'n q'aq'. 17Kub' tq'o'n Dyos toj kyanmi tu'n kyb'inchanteju' tajb'il Dyos: kb'antelti'j kyu'n tu'n txikyq'o'n kyoklen te nimaqkawil teju' txkup, tzmax ajtjapunju' oje tma Dyos. 18Aju' qya xitka'yi'na ate nimaq nintnamju' nkawin kyib'aj nimaqkawil twitz tx'otx', chiju' anjl.

Currently Selected:

Ap 17: MAMO

Highlight

Copy