Ap 14

Kyb'itzju' qaqlajmutx' lajk'al (144,000)

1Wile' Qpoj Tman rit wa'ltoq twi' witz Syon. Ate'toq qaqlajmutx' lajk'al (144,000) xjal tk'etz, tz'ib'a'ntoq tb'i Qpoj Tman rit ex tb'i Qman Dyos kyplaj. 2Ex nb'iye' jun tq'ojq'ojil tzaj toj kya'j; iky tq'ojq'ojil kse'n a' njukyin ajtku'tz twitz xaq, ex kse'n tq'ojq'ojel q'ankyaq; iky tb'inxju' kse'n tq'ojq'ojil txqan chnab' arpa. 3Intoq kyb'itza'n jun ak'a'j b'itz twitzju' q'uqb'il ex kywitzju' kyaje' itz'qe' ex kywitzju' tijwnaq. Mix-a'lo'x toqjun nb'ant t-xnaq'tzante tib' ti'ju' b'itz lu, oqe'kxkye' qaqlajmutx' lajk'al (144,000) e'klet kyxolju' ate' twitz tx'otx' nb'ant kyb'itzante. 4Qpoj qekye' lu, min kytz'ilsa kyib' kyuk'i'l qya; aye' lepchqe'k ti'ju' Qpoj Tman rit jaxjaku' matxa'. E'klet kyxolju' xjal tu'n kyok te tnejel oyaj te Dyos ex te Qpoj Tman rit. 5Min etz jun chajyolil toj kytzi, mixti'x jun il kyb'incha.

Kypakb'ab'l oxe' anjl

6Wile' juntl anjl, intoq lik'ik'in twitz kya'j ex q'i'ntoq jun tpakb'al tu'n, tu'n txitma'n kyeju' najlqe' twitz tx'otx', kye kykyaqil xjal kyoj kykyaqil nimaqtnam, chukchaq kyajil, chukchaq kyol ex te chukchaq kytanam. 7Intoq jawtma'n kuw kjalu: Che xob'e' te Qman Dyos ex che b'itzan qe'ye' te, qu'n matxi' pon kmoj tu'n kyok xjal toj xjel tu'n. Che k'ulun qe'ye' teju' b'inchante kya'j ex tx'otx', ninnjab' exqe' t-xiklil a', chij.

8Lepchix juntl anjl ti'j, intoq tma'n: ¡Matxi' kub' tz'aq, matxi' kub' tz'aqu' B'ab'ilon nimtipumal, aju' kub' tx'ojsankye kykyaqil nimaqtnam tu'n b'in te tajpaji'n!, chij.

9Xi' lpe juntl toxi'n anjl kyi'j, intoq jawtma'n kuw kjalu: Qa ati jun mak'ulun teju' txkup ex teju' tilb'ilal, ex matk'amu' techel txkup tplaj mo ti'j tq'ob', 10kk'wal ti'ju' ttx'u'jil Dyos, b'incha'ntl; kyajtel tu'n k'ixk'oj tuk'i'l q'aq' ex ta'l q'ol kywitzju' xjan anjl ex twitzju' Qpoj Tman rit. 11Njaw t-sb'elu' yajb'il lu toj tkyaqil tab'q'iyil, ex mixti'x ojb'il q'ijtl ex qonik'an kyeju' nche k'ulun teju' txkup ex te tilb'ilal ex makyk'amu' tb'i te kyechel, chij.

12¡Atzuntzu' tu'n kyyek'unteya' xjan tnam tu'n tik'xkyu'n ex tu'n tten kypasens, aye' nche kyanq'i'n tchaq'b'il Dyos ex q'uqlok kyk'u'j ti'j Jesus! chij.

13Nb'itzune' jun tzaj yolin weye' toj kya'j, tma kjalu: Tz'ib'anku'ya lu: B'a'nxi'xte' kyeju' mache kyim ate'qe' tuk'i'l Qajaw, chij.

Iku'—chi Xewb'aj—, che ojlal te kyaq'un, qu'n lepchixju' kyaq'unb'en kyi'j, chij.

Jaw chmo'n twitz awal

14Nxi' ka'yine' ex wile' jun saq muj, q'uqlitoq jun tib'aju' muj naku'j Tk'wal Dyos. Tokxtoq jun tkoron q'anpwaq toj twi' ex q'i'n jun semu'l tu'n jqu'n twitzte. 15Ex etz juntl anjl toju' tja Dyos, intoq ẍch'inx kuw teju' q'uqli tib'aj muj kjalu: ¡Jonktza tu'n t-semu'la ex b'uyinktza twitz awal; qu'n matxi' pon kmoj tu'n tb'uyet, ex matxi' b'entu' twitz awal! chij. 16Tzajtzun tnuqpi'n anjl q'uqli tib'aju' muj tq'ob' tuk'i'l t-semu'l, ex jaw tb'uyi'n twitz awal twitz tx'otx'.

17Etz juntl anjl toju' tja Dyos ati toj kya'j, ex q'i'n jun t-semu'l jqu'n twitzte. 18Ex etz juntl anjl tk'etzu' q'olb'eb'l, atitoq toklen tib'aju' q'aq' ex xiẍch'in kuw teju' q'i'n t-semu'l jqu'n twitzte, tma kjalu: ¡Jonqe'mila txijtwitz ub'a ati twitz tx'otx' tu'n t-semu'la jqu'n twitzte, qu'n matxi' che q'anax! chij. 19B'jeltzun tjon anjl twitz ub'a twitz tx'otx' tu'n t-semu'l, b'ajku'x tq'o'ntzuntz toju' nin tkb'el ja nela' ytz'o'n ta'l, in techla'n ttx'u'jil Dyos. 20B'je'l ytz'o'n ta'lu' ub'a ti'jxi' nintnam, ex b'je'tz txqan chik' toju' tkb'el, qapelo jun metr tk'i' nik'jan jawa' lq'e tib'aj tx'otx', te oxnaq o'lajoj ajlab' ik'a'.

Currently Selected:

Ap 14: MAMO

Highlight

Copy