Flp 4
4
Che tzalajxe' kukxju' ti'j Qajaw
1Qu'mtzun e'ntzik ex e'witz'in, atixi'x nku'je' kyi'je', wajb'ilxi'xe' tu'n kyok nka'yi'ne'; aye'ye' nche nk'u'jla'ne', aye'ye' ntzalajb'ile' ex twitzlalil waq'unb'ene', che lpekye' kukxju' ti'j Qajaw.
2Nchin kub'sane' te Eb'odya, ex te Sintikye, tu'n kymojb'ante kyol kse'n kyitz'inkyib' toj Qajaw. 3Ex nchin kub'sane' teya, wuk'i'l kuxi'xa toju' aq'untl, tu'n tonina kyi'ju' qanab' ojexi'x che onin wuk'i'le' tu'n tpakb'et tpakb'al b'a'n, junx tuk'i'l Klement exqe' txqantl e'aq'unan wuk'i'le'. Tz'ib'a'ntl kyb'i toju' u'j te chwinqlal.
4Che tzalajxe' kukxju' ti'j Qajaw. Nxinma'ntle' kyeye': ¡Che tzalajxe'! 5Tu'n kyojtzqinjtze' kyu'n kykyaqil xjal qa b'a'nwmaq qe'ye'. Naqch'inxtl tulte Qajaw.
6Mixti'xte tu'n kyb'isuna'ye', kymanxe' tkyaqilju' tb'is kyk'u'je' te Dyos toj kyna'j Dyose'; kyqaninxe' te, ex kyq'onx chjonteye' te. 7Kqeb'eltzun kyk'u'jtze' tu'n Dyos, nimxi'x kyetwitz ktb'incha' jun xjal; kxel tka'yi'n kyanmiye' ex kyximb'e'tze' tu'nel Jesukrist.
Atzuntzu' che ximana'ye'
8Te b'ajsb'iltzun e'ntzik ex e'witz'in, che ximanqe'ye' ti'ju' ax, ti'j tkyaqilju' b'a'n tnimet, ti'j tkyaqil ttzinunal, ti'j tkyaqil ẍtilun, ti'j tkyaqilju' b'a'n, ti'j tkyaqil b'a'n tyolinjtz. Che ximanqe'ye' ti'j tkyaqil tb'anilxi'x, ti'j tkyaqilju' b'a'n tajwalinjtz.
9Kyb'inchame' tkyaqil b'ajx nxnaq'tza'ne' kyeye', jni'xju' kyb'iye' tb'ajx nma'ne', jni'xju' ok kyka'yi'ne' wi'je': ikytzun kyb'inchame', atzunte Dyos nq'onte nak'b'il ktenb'el kyuk'i'le'.
Tk'am Pawl kyoyaj okslal aj Pilipos
10Inxi'x chin tzalaje' ti'j Qajaw tu'n mache ximantle' wi'je'. Mya ma'wt tzik'nna'le' kyu'ne', ate' mixti'toq anb'il tu'n kyonine' wi'je'. 11Mya tu'nwtju' ati nojqelan weye' nxinma'ne' lu, matxi' chin nq'etwe' machin tzalaje' ti'j aju' ati weye'. 12Wojtzqi'ntle' tu'n ntene' toj prowil, ex wojtzqi'ntle' tu'n tten nim ti'xti' weye'. Naq'li qintle' tu'n wanq'ine' se'nxku' nchwinqlale', ikx nela' weye' qa ati nim weye' exqa mixti' nwaye', qa min nb'aj wu'ne' exqa mixti'x ati weye'. 13Oni'n qine' tu'n Krist tu'n tik'x wu'ne' toj tkyaqil. 14B'a'ntzunte' xkyb'inchaye' mache onine' wuk'i'le' toju' yajb'ilweye'.
15Ex tej ttzyetku' pakb'ab'lte tpakb'al b'a'n, tej wik'b'ete' Masedon, oqe'kxe' okslalqe'ye' toj Masedon tzaj kyq'o'ne' o'nb'il weye' ti'ju' ati kyeye'. 16Expena' tej ntene' toj Tesalonik, mya naq jumaj tzaj kysma'ne' kyoyaje' tu'n tajb'en toju' nojqelan weye'. 17Mya awttzu' toka' nk'u'je' tu'n nk'monteye' oyaj; awe' wajb'il tu'n tten kyaq'unb'ene' twitz Qman Dyos. 18Mank'ame' te Epaprodit tkyaqilju' tzaj kysma'ne' weye', nim saj kyq'o'ne' weye', nchin tzalaje'. B'a'nxi'xju' tzaj kysma'ne' weye' kse'n jun tb'anil oyaj npuk'chaj ntzalaj Dyos ti'j. 19Tu'ntzunju', ktzajel tq'o'n Qman Dyos tu'nel Qajaw Jesukrist tkyaqilju' nojqelan kyeye' ti'ju' tq'inumal tb'anilxi'x. 20¡Ajwalintzxwit Qman Dyos! Ikyxwitju'.
Q'olb'eb'l te b'ajsb'il
21Kyq'olb'enqe'x ch'ine' kykyaqilju' ate' kyxol ttanam Dyos tu'ne'l Jesukrist. Nche'x q'olb'e'ne' kyu'n qtzik mo qitz'in ate' nk'etze'. 22Ex nche'x q'olb'e'ne' kyu'n kykyaqilju' ttanam Dyos okslalqe', axi'xpe' kyu'n ajb'el te ninimaqkawil aj Rom.
23Tenwttzun t-xtalb'il Qajaw Jesukrist kyuk'i'le'.
Currently Selected:
Flp 4: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999