Mt 3

Tpakb'ab'l Xwan jawsal a' toj chq'ajlaj

(Mc 1.1-8; Lc 3.1-9,15-17; Jn 1.19-28)

1Tojtzu'n tq'ijlalil lu etz Xwan aju' Jawsal a' toj chq'ajlaj te Judey. 2Intoq tma'n tpakb'ab'l kjalu: ¡Kutanjtzti'j kyanmiye', qu'n matxi' tzul lq'eju' tkawb'il Qman Dyos! chij.

3Atzu' yolina' t-sanjelal Dyos Isayiy ti'j Xwan tej tmante kjalu:

Nxib'i'n jun tq'ojq'ojel wi'yj njaw toj chq'ajlaj kjalu:

Kyb'inchame' tb'e Qman Dyos;

kyb'inchanxe' tb'e tzinun ti'j, chij.

4Ttz'umal kamey toq t-xb'alun Xwan tok, k'lo'ntoq tk'u'j tu'n jun piẍ tz'u'n, ẍt'ikt'u'lqe'toq twa ex toj k'ul ta'lkab'. 5Nche ponju' xjal najlqe' toj Jerusalen ex kykyaqilju' xjal te Judey exqe' najlqe' ttziyile a' Jordan b'ilte tpakb'ab'l Xwan. 6Intoq jaw tq'o'n a' kwiju' xjal njatz kypa'n kyil toju' a' Jordan.

7Tetzunj tka'yinte Xwan qa txqanju' parisey ex sadusey nche pontoq tu'ntjaw a' kywi'; xitma'n kye: ¡Tyajajil q'antin! ¿Alkye xiq'mante kyeye' qa che kletele' teju' tz'e'ysb'il witzb'aj tzul tu'n Qman Dyos? 8Kyb'inchamju'ye' b'a'n toj twitz Qman Dyos qa kyajb'ile', tu'n tq'ancha'lin qa matxi' tz'anjtzti'j kyanmiye', 9ex lalun kub' kximane' aye'xe' kjalu: Tyajajil Ab'raamqoqe'; qu'n jaku' b'entte' tu'n Qman Dyos tu'n kyjaw b'entju' ab'j lu te tyajajil Ab'raam. 10Matxi' b'ent tten tu'n kyjaw tx'emitju' tze kyuk'i'lxi' kylok'. Tkyaqilju' tze qa min nelb'a'n twitz njaw tx'emit ex nokx toj q'aq'. 11Axxi'x njaw a' kywi'ye' wu'ne' tu'n tanjtzti'j kyanmiye' twitz Qman Dyos; a tzunju' tzul wi'jxi'ye' kjawil tq'o'n a' kywiye' tuk'i'l Xewb'aj Xjan ex q'aq'. Qu'n ate nimxi'x toklen kye nwitze'; mixpe'ti'xwe' woklene' tu'n txi' wi'ne' t-xajab'. 12Tzyu'ntlju' yelb'i toj tq'ob', ex kxq'iq'il triy tu'n texju' ttxa triy. Kb'el tk'u'nju' ttriy toj k'uja, atzunju' ttxa triy kb'ajel tpati'n toj jun q'aq' mixjun nyupj, chi Xwan.

Tej tjaw a' twi' Jesus

(Mc 1.9-11; Lc 3.21-22)

13Tzaj Jesus toju' tx'otx' Kaliley ex pon tk'etz Xwan ttziju' a' Jordan, tu'n tjaw a' twi'. 14Mitoqjun tajte' Xwan tu'n tjaw tq'o'n a' twi' Jesus, ape' xitma'ntlju' te:

—Ape'wtlota xjaw q'onte a' nwiye' ¿Ma xi'tzu'n nula'tla nk'etze'? chij.

15Atzunte Jesus xittzaq'we'n te:

—B'inchamta ja'lo, tu'ntzun tjapunju' tchaq'b'il Qman Dyos qu'n, chij.

Tb'inchatzun Xwantz tej tb'inte. 16Jawtzun a'tz twi' Jesus, tetzunj tjatz toj a', majx xi'jaqli kya'j ex xitka'yi'n Jesus tku'tzju' Xewb'aj Xjan naku'j jun paloms. 17Tzajtzun yolin jun toj kya'j tma kjalu: Ate' nk'walju'ye' lu, k'u'jlanxi'x ex sk'o'n wu'ne', chij.

Currently Selected:

Mt 3: MAMO

Highlight

Copy