Lc 22
22
Kyjoy xjal tu'me'l tu'n ttzyet Jesus
(Mt 26.1-5,14-16; Mc 14.1-2,10-11; Jn 11.45-53)
1Ch'inxtoqtzun tul kanunju' tq'ij wab'j mixti' ttx'amal, mujqa aju' tq'ij Tzaqpib'l. 2Intoq kyjyo'n kynejel pale exqe' xnaq'tzal kawb'il tu'me'l tu'n tkub' kyb'yo'n Jesus, ex ntoq che xob' kye xjal.
3Okxtzun Tajaw il toj tanmi Judas, ajun kyxolju' kab'lajoj xnaq'tzb'en, ju' nok q'o'n juntl tb'i Skaryot. 4Xi' kyk'etzju' kynejel pale exqe' nejenel toj tja Dyos, yolin kyuk'i'l se'ntoq tu'n txa' tq'o'n Jesus toj kyq'ob'. 5Ejaw tzalaj ex xikytziya'n tu'n txikyq'o'n pwaq te Judas. 6Kub'tzun toj twitz ex aq'wi ximalte alkye kmuj mixti'qe' xjal, tu'n txitq'o'n Jesus toj kyq'ob'.
Wan Jesus kyuk'i'lju' t-xnaq'tzb'en toju' tq'ij Tzaqpib'l
(Mt 26.17-29; Mc 14.12-25; Jn 13.21-30; 1 Co 11.23-26)
7Pon kanunju' tq'ij waj wab'j mixti' ttx'amal, ajtkub'ju' qpoj tman rit te chojb'il te tq'ij Tzaqpib'l. 8Exi' tchq'o'n Jesus Luch ex Xwan, xitma'n kye:
—Kukyxi'ye' b'inchalte qwa te tq'ij Tzaqpib'l, chij.
9Xi'tzun kyqani'n te:
—¿Jatzun tajb'ila'ya tu'n qb'inchanteye'? chechij.
10Xittzaq'we'n Jesus kye:
—Ajkyokxe' toju' nintnam, k'okyel yal jun ichan kywitze' q'i'n jun ẍoq' tu'n nojni tu'n a'. Che lpexe' ti'j tzmax toju' ja, jamatz'okxa', 11ex kymanxe' teju' tajaw ja: Intqani'n Xnaq'tzal alkye mqo'n jakwala' te tq'ij Tzaqpib'l kyuk'i'l t-xnaq'tzb'en, chechiku'ye'. 12Ktzajel tyek'u'n jun mqo'n nimin ex b'incha'ntl teju' wan toju' kol jawl. Kyb'incham tzune' qwa in nojqelan atzu', chi Jesus kye.
13Exi'tzuntz ex tkyaqil okyal kyu'n kse'nx xitma'n Jesus kye, ex kub' kyb'incha'n wab'j te Tzaqpib'l.
14Tetzunj tponju' kmuj, kub' qe Jesus kyuk'i'lju' chq'o'nqe' ti'j mes. 15Xitma'n Jesus kye:
—¡Matxi' b'et q'ij wajb'ile' tu'n wik'santeye' wan lu te tq'ij Tzaqpib'l kyuk'i'le' na'mxtoq nkyime'! 16Qu'n kxe'l nma'ne' kyeye' lay kub' wik'sa'ntle' tzmax ajtjapun toj tkawb'il Dyos, chij.
17Jawtzun ttzyu'n jun k'wab'l, ex t-xilenxi' tq'o'n chjonte te Dyos, tma:
—Kytzyunxe' lu ex kysipanxe' kyxole'; 18qu'n kxe'l nma'ne' kyeye' lay chin k'wantle' ti'ju' ta'l ub'a, tzmax ajtulju' tkawb'il Dyos, chij.
19Yajxi'tzuntl jaw ttzyu'n wab'j, ex t-xilenxi' tq'o'n chjonte te Dyos, kub' taq'pu'n ex xitq'o'n kye, tma:
—Ate nxmilal ju'ye' lu, q'o'n tu'n nkyime' tu'n kpaje'. Kyb'inchame' lu te nab'ab'lweye' kukxju', chij.
20Ikx tb'inchaju' tuk'i'lju' k'wab'j kyb'ajlenxi' wan, tma:
—Aju' k'wab'j lu ate ak'a'j yolju', kuwsa'n tu'nju' nchk'ele' k'elel qojli tu'n kpaje'. 21Atzunte' kxe'l k'ayin weye' lu ati wuk'i'le' ti'j mes. 22Ma chinxwe' toj kyq'ob' xjal, kse'nx b'antniti'j tu'n wik'a'ye', ayine' Tk'wal Dyos, ¡qab'anxte' twitzju' kxe'l k'ayin weye'! chij.
23E'aq'witzuntz xjelul toj junjunali'n alkyeju' kxe'l k'ayinte.
¿Alkye nimxi'x toklen?
24Tzaj jun wuljtib'il kyxolju' t-xnaq'tzb'en ti'j alkye tu'n tok nimxi'x toklen kyxol. 25Xitma'n Jesus kye: Ate' kyxol xjal te twitz tx'otx', inxi'x che kawinju' nimaqkawil kuw kyib'aj nimaqtnam, exqe' nejenel nok kyq'o'n kyib' te b'inchal b'a'nqe'. 26Atzunkye' mikxa'ju'. Apete' nimxi'x toklen kyxole' tu'n toktq'o'ntib' mixti' toklen, ex aju' nejenel kyxole' ku'wtloj ate ajb'elju'. 27¿Alkyetzu'n nimxi'x toklen, ma aju' nkub' qe wal ti'j mes mujqa aju' nsipan wab'j? ¿Ma myatzun aju' nkub' qe ti'j mes? Ayintzunwe' atinqine' kyxole' kse'n sipal wab'j.
28Matxi' che tene' wuk'i'le' toju' yajb'ilweye'. 29Qu'mtzun kxe'l nq'o'ne' jun kawb'il kyeye', kse'n saj tq'o'n Nmane' weye', 30che wale' ex che k'wale' ti'ju' nmese' toj nkawb'ile', ex che b'elqeye' kyoj q'uqb'il tu'n kyokju' kab'lajoj tnej tyajajil Israel toj xjel kyu'ne', chi Jesus kye t-xnaq'tzb'en.
Tma Jesus tqanil qa kb'el e'wa'n tu'n Luch
(Mt 26.31-35; Mc 14.27-31; Jn 13.36-38)
31Ex ikx tma Qajaw:
—Simon, Simon, matxi' che qaninjtze' tu'n tajaw il tu'n kyxtulinjtze' tu'n kse'n triy; 32ayintzunwe' matxi' chin kub'sante' ti'ja tu'n lalun b'aju' tokslab'la. Ex ajttzajtla wuk'i'le', oninqe'xa ttzika mo titz'ina tu'n kywe' toj kyokslab'l, chi Jesus te Luch.
33Xitma'n Simon te:
—Taye, luqinwe' q'o'ntl wib'e' tu'n nxi'ye' tuk'i'la toj kars, expe' tu'n nkyime' tuk'i'la, chi Simon.
34Xi'tzun ttzaq'we'n Jesus te:
—Luch, kxe'l nma'ne' teya, kb'el tewa'n oxmaja ja'lo qa ojtzqi'nqine' tu'na na'mxtoq toq' ek', chij.
Xi' tponju' kmuj tu'n tyajti Jesus
35Xit-xjelu'n Jesus kye:
—Tej kyxi' nchq'o'ne' pakb'al, mixti' kypwaqe' ex kywaye' ex kyxajab'e', ¿ma ati jun ti'xti' min kanun kyeye'? chij.
Aye'tzunkye xikytzaq'we'n:
—Kanun tkyaqil, chechij.
36Xi'tzun tma'ntz kye:
—Atzunte' ja'lo, alkye ati tmedi, iq'intz tuk'i'l twa; ex alkyetzun mixti' tk'uẍtx'e'nb'il, k'ayinx ttxo'w tu'n tlq'onte jun. 37Qu'n axxi'x kxe'l nma'ne' kyeye', ilti'j tu'n tjapunju' q'ma'n wi'je' toj Tu'jil kjalu: Ex okq'o'n kyxolju' b'inchal myab'a'n, chij. Tkyaqilju' tz'ib'a'n wi'je', ilti'j tu'n kyjapun, chi Jesus.
38Xi'tzun kyma'n te:
—Taye, ati kab'e' k'uẍtx'e'nb'il tzalu, chechij.
Xi'tzun ttzaq'we'n kye:
—Tenkuna'j, b'a'nte', chij.
Na'n Dyos Jesus toj Jetzemani
(Mt 26.36-46; Mc 14.32-42)
39Etztzun Jesus, xi'tzuntz twi' witz Olib'o, kse'nju' ntb'incha'n; ex exilpe t-xnaq'tzb'en ti'j. 40Tetzunj kypon, xitma'n kye:
—Che na'nqe' Dyose' tu'n lalun che kub' tz'aqe' toj joyb'ilkyi'je', chij.
41El lq'etzuntz kyi'j, qapelo te oxe' kyjaj, kub' mejetzuntz na'l Dyos. 42Tma: Taye, qa tajb'ila, chin tkloma teju' yajb'il kuwxi'x lu; naq a myaju' wajb'ile', aju' tajb'ila tu'n tb'inchet, chij.
43Kub'tzun tyek'u'ntib' jun anjl tzaj tk'etz Dyos q'olte tipumal. 44Intoq na'nxi'xtl Dyos Jesus toju' yajb'il kuw nik'a', inxi'xtoq tz'ujin, atzunju' ttz'uj nel tx'atj twitz tx'otx' naku'j chik'.
45Tetzunj tjawe' toju' tna'j Dyos, ul lq'e kyk'etzju' t-xnaq'tzb'en, intoq che wtan, matxi'toq che kub'aj tu'n b'is. 46Xitma'n kye:
—¿Tiqu'n nche wtana'ye'? che we'qe'ktze' ex che na'nqe' Dyose', tu'n lalun che kub' tz'aqe' toj joyb'ilkyi'je'.
Tzyet Jesus
(Mt 26.47-56; Mc 14.43-50; Jn 18.2-11)
47Inxtoqtzun yolin Jesus tej kypon txqan xjal. Nejlitoq Judas kywitz, ju' ajuntoq kyxolju' kab'lajoj t-xnaq'tzb'en Jesus. Pon lq'e Judas ma'tzilte Jesus, 48atzunte Jesus xitma'n te:
—Judas, ¿ma tu'n jun ma'tz ẍinxa' tk'a'yi'na ayine' Tk'wal Dyos? chij.
49Aye'tzu'n ate'toq tk'etz Jesus, tej kyka'yinteju' ntoq b'aj, xikyqani'n te:
—Taye, ¿maqo q'ojile' kyi'j tu'n k'uẍtx'e'nb'il? chechij.
50Juntzunkye ok k'ixb'sante tmajin kynejel pale, majx el ttx'e'mu'n t-ẍkyin toj tb'a'nq'ob'. 51Xi'tzun tma'n Jesus te:
—Chetenku'j; tk'i'xtzu'n, chij.
Okttzyu'n t-ẍkyinju' tmajin kynejel pale, ex q'anet tu'n. 52Xitma'ntzuntz kyeju' kynejel pale, kye ajb'el toj tja Dyos ex kye tijwnaq matxitoq che pon tzyulte, kjalu:
—¿Tiqu'ntzun ẍetzaja'kye' kyuk'i'l k'uẍtx'e'nb'il ex tze, kuxi'xtej jun nimaq eleq' qine'? 53Tkyaqil q'ij matxi' chin tene' kyuk'i'le' toj tja Dyos, ex min ntzyete' kyu'ne'. Atzunte' ja'lo a kmuju' kyeye', a kmuju' te tipumal qlolj, chi Jesus kye.
Kub' tewa'n Luch qa tojtzqi'n Jesus
(Mt 26.57-58,69-75; Mc 14.53-54,66-72; Jn 18.12-18,25-27)
54Tzyettzun Jesus kyu'n ex xikyiq'i'n tja kynejel pale. Lepchixtoq Luch najchaq ti'j.
55Kub' kyq'o'n q'aq' twipe'n, ex e'kub' qe ti'j; ex kub' qe Luch kyxol. 56Tetzunj tok ka'yi'n tu'n jun majin qya, q'uqlitoq ti'ju' q'aq', kyej ka'yin ti'j ex tma:
—Ex atitoqte' xjal lu tuk'i'l, chij.
57Atzunte Luch kub' tewa'n, tma:
—Qya, min wojtzqi'nwe', chij.
58Yajxi'tzun ch'i'ntl, ok ka'yi'n tu'n juntl ex tma:
—Ex a junta kyuk'i'l, chij.
Xittzaq'we'n Luch te:
—Minti' q'aye, min wojtzqi'nwe', chij.
59Tojtzun jun kmujtl yajxi'tl, okten juntl q'malte:
—Axxi'x ajuntoq te' xjal lu tuk'i'l. Expena' aj Kaliley, chij.
60Xitma'n Luch te.
—Q'aye, min nkane toj nwitze' titi' ntma'na, chij.
Textzu'n kmuj lu, inxtoq yolin Luch, jaw oq' jun tmanek'. 61Tzajtzun miltz'uj twitz Qajaw ex kyej ka'yin ti'j Luch, tzajtzun tna'n Luch qa matxitoq txitma'n Qajaw te kjalu: Chin kb'el tewa'n oxmaja ja'lo na'mxtoq toq' ek', chij. 62Etztzun Luch atzu' ex kub' oq' b'a'nxi'x.
Exmayin xjal ti'j Jesus
(Mt 26.67-68; Mc 14.65)
63Aye'tzu'n xjal ntoq che xq'uqinte Jesus, intoq che xmayin ti'j ex ntoq ok kyb'ju'n. 64Eok kyjpu'n twitz, ex xikyqani'n te:
—¡Ponx tnab'la ti'j alkye nok b'junteya! chechij.
65Ex intoq che ilin te, nim ti'xti' eokten q'malte te.
Pon q'i'n Jesus twitz K'loj Tzyul Kawb'il
(Mt 26.59-66; Mc 14.55-64; Jn 18.19-24)
66Tetzunj matxitoq jawu'l q'ij, b'aj kyb'u'yi'n kyib'ju' tijwnaq kyxol aj Juda, kynejel pale exqe' xnaq'tzal kawb'il, ex xikyiq'i'n Jesus twitzju' K'loj Tzyul Kawb'il. Atzuntzu' exjeluna' te kjalu:
67—Q'mantza qeye', ¿ma aya Krist? chechij.
Xittzaq'we'n kye kjalu:
—Qama txinma'ne' kyeye' qa ayine', lay chinx kyoksla'ne'. 68Qatzun machin xjelune' kyeye', lay tzaj kytzaq'we'ne' weye'. 69Oktzun xelqexte' ja'lo chin b'el qeye' toj tb'a'nq'ob' Dyos nimtipumal, ayine' Tk'wal Dyos, chij.
70Eoktentzuntz qanilte te kykyaqil:
—¿Ma atzuna Tk'wal Dyos? chechij.
Xittzaq'we'n Jesus kye:
—Aye'xe' matxi' che q'mante qa ayine', chij.
71Kymatzuntz kjalu:
—¿Ti'tzun nojqelana' juntl tziyal qe ja'lo? Matxi' qb'iku' toj ttzi, chechij.
Currently Selected:
Lc 22: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999
