Lc 20

Toklen Jesus

(Mt 21.23-27; Mc 11.27-33)

1Tojtzun jun q'ij intoq q'on Jesus xnaq'tzb'il kye xjal toju' tja Dyos ex intoq tq'o'n b'a'n tpakb'alil, eponju' kynejel pale exqe' xnaq'tzal kawb'il, kyuk'i'lju' tijwnaq, 2ex xikyma'n te Jesus:

—¿Alkye xiq'onte toklena tu'n tb'inchanteju'ya lu? chechij.

3Xi'tzun ttzaq'we'n Jesus kye:

—Ikxwe' kxe'l nqani'n jun nxjele' kyeye'. Kytzaq'wentze': 4¿Alkye tzaj chq'onte Xwan jawsal a', ma a Dyos mujqa aye' xjal? chij.

5E'aq'witzuntz wuljel kyxolx: Qama txiqtzaq'we'n qa a Dyos tzaj chq'onte, oktma': ¿Tiqu'ntzun min eokslane' te? chilo. 6Ex lay b'ent t-xiqma'n qa aye' xjal, qu'n jaku' qokub' kyb'yo'n xjal toj ab'j, qu'n kykyaqil xjal oksla'n kyu'n qa jun t-sanjelal Dyos toqju' Xwan, chechij. 7Xikytzaq'we'ntzuntz qa min b'i'n kyu'n alkye tzaj chq'onte Xwan jawsal a'. 8Xi'tzun ttzaq'we'n Jesus kye:

—Ex lay txinma'nwe' kyeye' alkye tzaj q'onte woklene' tu'n nb'inchanteye' lu, chij.

Techlal kyi'ju' myab'a'n aq'unal

(Mt 21.33-44; Mc 12.1-11)

9Aq'witzun Jesus yolil kye xjal, xitma'n techlal lu: Jun xjal b'ajx tawa'n tawal, xitq'o'ntzuntz majin kye junjun aq'unal ex xi' toj jun tb'e najchaq. 10Tetzunj tpon tq'ijlalil, tzaj tchq'o'n jun tmajin qanilteju' twitz awal ati tu'n txikyq'o'n aq'unal teju' tajaw; aye'tzu'n aq'unal eokten b'yolte ex anj kychq'o'nti'j mixti'te xikyq'o'n te. 11Tzajtzun tchq'o'n tajaw juntl tmajin; ex ikx b'aj kyili'n, b'aj kyb'yo'n ex anj kychq'o'nti'j mixti'te xikyq'o'n te. 12Tzajx tchq'o'n juntl, ex ikx b'aj kyk'ixb'sa'n aq'unal tx'otx' ex exkyjwo'n ti'jxi' awal.

13Tmatzun tajaw tx'otx'tz: ¿Titi' knse'ye'? Kxe'l nchq'o'ne' nk'wale' k'u'jla'nxi'x wu'ne'; qajlo che nimal te, chij. 14Tetzunj kyka'yinte aq'unal tx'otx', kyma kyxolx: Ate' lu kk'molte etzb'il; qb'yoku', tu'ntzun tkyaju' tx'otx' qe, chechij. 15Etz kyiq'i'ntzuntz ti'jxi' awal ex kub' kyb'yo'n.

¿Ti'tzunkye' nkyxima'n, ti'tzuloti' ktb'incha' tajaw awal? 16Tzulku' ex che kb'el tb'yo'n aq'unal na'j, ex kxe'l tq'o'n tqan awal kye txqantl xjal, chi Jesus.

Tetzunj kyb'inte ja'lu, kyma:

—¡Miwtjun xtaj Dyos tu'n tjapun kju'na'j! chechij.

17Atzunte Jesus xika'yin kyi'j ex tma:

—¿Ti'tzu'n tz'elpuna' ntma'n kyoju' Tu'jil kjalu?:

Aju' ab'j selkyik'o'n b'inchal ja

matxi' tz'ok te ab'j nimxi'x toklen.

18Alkyexku' makub' tz'aq tib'aju' ab'j lu, majx kb'el b'uchj; qatzun makub' tz'aqju' ab'j tib'aj jun xjal, majx kb'el quqix tjaq', chi Jesus.

19Kyajb'iltoqju' kynejel pale exqe' xnaq'tzal kawb'il tu'n ttzyet Jesus kyu'n texju' kmuj lu, qu'n elkynik' ti'j qa kyi'jtoq nyolina' techlal lu. Exob'tzun kye xjal.

Xjel kyi'ju' chojb'il te kawb'il

(Mt 22.15-22; Mc 12.13-17)

20Epon kychq'o'n junjun nenul toj ewaj, naku'j ichan tnik'alkyi'j, naqxwitlo tu'n tel yal jun til Jesus kyu'n toju' tyol, tu'n t-xikyiq'i'n toj tq'ob'ju' kawil aj Rom. 21Xikyqani'n xjal lu te Jesus:

—Xnaq'tzal, b'i'n qu'ne' tojxi'x tu'me'lju' intma'na ex nb'ajx t-xnaq'tza'na, ex mya nt-xnaq'tza'na kyajb'il xjal. Axxi'x a nt-xnaq'tza'na tb'eyil Dyos. 22¿Ma b'a'n tu'n qchjonteye' chojb'il te ninimaqkawil aj Rom mujqa mya? chechij.

23Eltzun tnik' Jesus ti'ju' kyxim myab'a'n, xitma'n kye:

24—Kyek'untze' jun pwaq weye'. ¿Alqilb'ilal tok ti'j ex alqb'i tz'ib'a'n ti'j? chij.

Xikytzaq'we'n te:

—Tilb'ilal ex tb'i ninimaqkawil, chechij.

25Xi'tzun tma'n Jesus kye:

—Kyq'onxe' te ninimaqkawil aju' tex ninimaqkawil, ex kyq'onxe' te Dyos aju' te Dyos, chij.

26Ex mixti'xte jun til Jesus elyal kyu'n toju' b'aj tma'n kye xjal tu'nwt ttzyet kyu'n, eb'jaw lab'ti ti'ju' tzaq'web'l tu'n ex mixti'tlte kyma.

Xjel ti'ju' kyjawel anq'in kyimni

(Mt 22.23-33; Mc 12.18-27)

27Yajxi'tzuntl e'pon junjun sadusey tk'etz Jesus. A nkyma'n Saduseyju' qa lay che jaw anq'in kyimni; qu'mtzun xikyma'n jun b'aj kjalu:

28—Xnaq'tzal, kyej ttz'ib'a'n Moyses qama kyim jun ichan mjeb'ni tuk'i'l t-xu'jil ex min xten jun tk'wal tuk'i'l, ati tu'n tmje itz'inb'aj tuk'i'l t-xu'jil qtzan ttzik tu'ntzun tten tk'wal tuk'i'l te tk'wal qtzan ttzik. 29Atitzun jumaj ate'toq wuq ichan kyitz'inkyib', mjeju' tnejel kytzik, ex kyim mixti'x kyej tk'wal. 30Mjeju' tkab' k'walb'aj tuk'i'l t-xu'jil qtzan ttzik, ex kyim mixti'x kyej tk'wal, 31ex mjeju' toxi'n tuk'i'l t-xu'jil qtzan kytzik, ex ikx b'ajkye txqantlju', kykyaqilxtzu'n wuq ichan eb'aj kyim mixti'x ekyej kyk'wal. 32Yajxi'tzuntl kyimju' qya. 33Ajtzun kyjaw anq'in, ¿alqxu'jil xi'xtzun k'okyela' qya lu, extzunqa ale'xju' wuq ichan emje tuk'i'l? chechij.

34Xittzaq'we'n Jesus kye:

—Inche mjekye ichan kyuk'i'l qya toju' chwinqlal ja'lo; 35aye'tzunkye' b'a'n toj twitz Dyos tu'n kytzalaj toju' chwinqlal tzul, ajkyjaw anq'in, b'a'ntzun ichan mo qya, mixti' tu'n kymjetl, 36qu'n lay che kyimtl. Ikyche okyela' kse'nqe' anjl, ex che okyel te tk'wal Dyos tu'nju' mache jaw anq'in. 37Expe' aku' Moyses, ja ntma'na' tej intoq k'ent q'aq' ti'ju' ch'i'x k'ul, intyek'u'n qe qa nche jaw anq'in kyimni. Atzu' ntma'na' qa a Qman Dyos ja k'uluna' Ab'raam, Isaak ex Jakob'. 38¡Ex mya Dyos kye kyimni, kye itz'qe', tu'n kykyaqil itz'qe' te!

39Xikyma'n junjun xnaq'tzal kawb'il te:

—B'a'nxi'x chik'b'ab'ente tu'na Xnaq'tzal, chechij.

40Ex min eoktentl xjelul te.

¿Alqyajajilju' Krist?

(Mt 22.41-46; Mc 12.25-27)

41Xi'tzun tqani'n Jesus kye:

—¿Tiqu'ntzun nq'manjtz qa tyajajil Dab'iju' Krist? 42A pena' Dab'i q'mante kyoju' tu'jil b'itz, kjalu:

Intma'n Qman Dyos te Wajawe':

Qeku'ya toj nb'anq'ob'e',

43Tzmax ajkykub' nq'o'ne' tajq'oja

kyjaq' tqana, chij.

44¿Se'n taq'witzun ktzulela' Krist ti'j tyajajil Dab'i, extzun ax Dab'i inq'mante qa Tajaw? chij.

Exi' tpoqo'n Jesus xnaq'tzal kawb'il

(Mt 23.1-36; Mc 12.38-40; Lc 11.37-54)

45Kykyaqilju' xjal intoq che b'in, ex xitma'n Jesus kye t-xnaq'tzb'en: 46B'a'nqe'xe' kyeju' xnaq'tzal kawb'il, axi'x kyajb'ilju' tu'n kyb'et tuk'i'l kyxb'alun ku'j, ex kyajb'il tu'n kyq'olb'en xjal kye tuk'i'l ninb'il kyoj xky'ichb'e. Nche kyjyo'n q'uqb'il te oklenj kyoj ja te k'u'lb'il ex etb'anil q'uqb'il kyoj wan; 47ex nche elkyiq'i'n kyjaju' qya kyimni kychmil, tu'ntzun lalun tz'el kynik'tzil inxi'x che na'n Dyos nimtoj. Nimxi'x tz'e'ysb'il kywitz tzul, chi Jesus.

Currently Selected:

Lc 20: MAMO

Highlight

Copy